30 ຄວາມກຽດຊັງລະຫວ່າງມະນຸດກັບຊາຕານ

ຕົ້ນສະບັບພາສາອັງກິດ

ກຳລັງໃນການຕ້ານທານຊາຕານ

“ເຮົາຈະໃຫ້ເຈົ້າກັບຜູ້ຍິງເປັນສັດຕູກັນ ແລະ ເຊື້ອສາຍຂອງເຈົ້າກັບເຊື້ອສາຍຂອງຜູ້ຍິງເປັນສັດຕູກັນ. ເຊື້ອສາຍຂອງຜູ້ຍິງຈະຢຽບຫົວເຈົ້າໃຫ້ແຕກ ແລະ ເຈົ້າຈະທຳໃຫ້ສົ້ນຕີນເພິ່ນບວມຊ້ຳໄປ.” (ປະຖົມມະການ 3:15 ສະບັບລາວບູຮານ). ຄຳພິພາກສາຂອງພຣະເຈົ້າທີ່ກ່າວໂທດຊາຕານ ຫຼັງຈາກມະນຸດຫຼົງສູ່ຄວາມບາບນັ້ນ ຍັງເປັນຄຳພະຍາກອນທີ່ກວມເອົາທຸກຍຸກທຸກສະໄໝ ຈົນເຖິງວັນອະວະສານ, ແລະເປັນເງົາສະທ້ອນເຖິງການຂັດແຍ້ງອັນຍິ່ງໃຫຍ່ ທີ່ກ່ຽວຂ້ອງກັບມະນຸດທຸກເຊື້ອຊາດທີ່ຈະອາໄສຢູ່ເທິງແຜ່ນດິນໂລກ. {GC 505.1}

ພຣະເຈົ້າຊົງກ່າວວ່າ: “ເຮົາຈະໃຫ້ເຈົ້າກັບຜູ້ຍິງເປັນສັດຕູກັນ.” ການເປັນສັດຕູນີ້ບໍ່ໄດ້ເກີດຂຶ້ນເອງຕາມທຳມະຊາດ. ເມື່ອມະນຸດລະເມີດພຣະບັນຍັດຂອງພຣະເຈົ້າ, ທຳມະຊາດຂອງພວກເຂົາກໍເສື່ອມຊາມລົງ ເຊິ່ງເຮັດໃຫ້ພວກເຂົາປອງດອງກັບຊາຕານແທນທີ່ຈະຂັດແຍ້ງກັບມັນ. ຕາມທຳມະຊາດແລ້ວ, ບໍ່ມີຄວາມຂັດແຍ້ງກັນລະຫວ່າງຄົນບາບກັບຊາຕານ ຜູ້ເປັນຕົ້ນເຫດຂອງຄວາມບາບ. ທັງສອງຝ່າຍມີທຳມະຊາດອັນຊົ່ວຮ້າຍ ຍ້ອນການປະຖິ້ມຄວາມເຊື່ອ. ຜູ້ທີ່ປະຖິ້ມຄວາມເຊື່ອບໍ່ມີຄວາມສະຫງົບໃຈເລີຍ ເວັ້ນເສຍແຕ່ເຂົາຈະໄດ້ຮັບການສະໜັບສະໜູນ ແລະ ການເຂົ້າຂ້າງຈາກຜູ້ອື່ນ ໂດຍການຫຼອກລໍ້ພວກເຂົາໃຫ້ເຮັດຕາມແບບຢ່າງຂອງຕົນ. ດ້ວຍເຫດນີ້, ຄົນຊົ່ວ ແລະ ທູດສະຫວັນທີ່ຫຼົງຜິດຈຶ່ງຈຳໃຈຮ່ວມມືກັນ. ຖ້າພຣະເຈົ້າບໍ່ໄດ້ເຂົ້າມາຂັດຂວາງເປັນພິເສດ ຊາຕານກັບມະນຸດຄົງຈະຈັບມືກັນເພື່ອຕໍ່ສູ້ກັບສະຫວັນ, ແລ້ວແທນທີ່ຈະຮັກສາຄວາມເປັນສັດຕູຕໍ່ຊາຕານ ມະນຸດສະໂລກທັງໝົດຄົງຈະຮ່ວມກັບມັນໃນການຕໍ່ຕ້ານພຣະເຈົ້າ. {GC 505.2}

ຊາຕານໄດ້ຫຼອກລວງມະນຸດໃຫ້ເຮັດບາບ ຄືກັນກັບທີ່ມັນໄດ້ຊັກນຳເຫຼົ່າທູດສະຫວັນໃຫ້ກະບົດ ເພື່ອມັນຈະໄດ້ຮັບການຮ່ວມມືໃນການເຮັດສົງຄາມຕໍ່ສູ້ກັບສະຫວັນ. ໃນເລື່ອງຄວາມກຽດຊັງທີ່ມີຕໍ່ພຣະຄຣິສ ຊາຕານກັບເຫຼົ່າທູດສະຫວັນທີ່ຫຼົງຕິດຕາມມັນກໍບໍ່ມີຄວາມຂັດແຍ້ງກັນ. ເຖິງແມ່ນວ່າພວກມັນຈະບໍ່ລົງລອຍກັນໃນເລື່ອງອື່ນໆກໍຕາມ ແຕ່ກໍເປັນນ້ຳໜຶ່ງໃຈດຽວກັນໃນການຕໍ່ຕ້ານສິດອຳນາດຂອງພຣະເຈົ້າ ຜູ້ປົກຄອງແຫ່ງຈັກກະວານ. ຢ່າງໃດກໍຕາມ, ເມື່ອຊາຕານໄດ້ຍິນຄຳປະກາດວ່າ ລະຫວ່າງຕົວມັນເອງກັບຍິງນັ້ນ ແລະ ລະຫວ່າງເຊື້ອສາຍຂອງມັນກັບເຊື້ອສາຍຂອງນາງຈະເປັນສັດຕູກັນ, ມັນກໍຮູ້ວ່າ ມັນຈະຖືກຂັດຂວາງໃນການເຮັດໃຫ້ທຳມະຊາດຂອງມະນຸດເສື່ອມຊາມລົງ ທັງຮູ້ວ່າມະນຸດຈະສາມາດຕ້ານທານອຳນາດຂອງມັນໄດ້ໂດຍທາງໃດທາງໜຶ່ງ. {GC 505.3}

ຊາຕານມີຄວາມກຽດຊັງຕໍ່ມະນຸດ ຍ້ອນວ່າພວກເຂົາໄດ້ຮັບຄວາມຮັກ ແລະ ພຣະເມດຕາຈາກພຣະເຈົ້າ ຜ່ານທາງພຣະ­ເຢຊູ­ຄຣິສ. ມັນປາຖະໜາທີ່ຈະຂັດຂວາງແຜນການອັນສູງສົ່ງຂອງພຣະເຈົ້າໃນການໄຖ່ມະນຸດໃຫ້ລອດພົ້ນ. ມັນຕ້ອງການເຮັດໃຫ້ພຣະເຈົ້າເສື່ອມເສຍພຣະກຽດ ດ້ວຍການທຳລາຍພຣະລັກສະນະຂອງພຣະອົງທີ່ມີໃນມະນຸດ ແລະ ດ້ວຍການເຮັດໃຫ້ອຸປະນິໄສຂອງພວກເຂົາເປິເປື້ອນມົນທິນ. ມັນຕ້ອງການເຮັດໃຫ້ມີຄວາມໂສກເສົ້າໃນສະຫວັນ ແລະ ໃຫ້ແຜ່ນດິນໂລກເຕັມໄປດ້ວຍຄວາມທຸກເວດທະນາກັບຄວາມເພພັງຫາຍະນະ. ແລ້ວມັນກໍຊີ້ໄປຍັງຄວາມຊົ່ວຮ້າຍທັງໝົດນີ້ວ່າ ເປັນໝາກຜົນແຫ່ງການຊົງສ້າງມະນຸດຂອງພຣະເຈົ້າ. {GC 506.1}

ພຣະຄຸນຂອງພຣະຄຣິສ

ສິ່ງທີ່ເຮັດໃຫ້ມະນຸດເປັນສັດຕູກັບຊາຕານໄດ້ ຄືພຣະຄຸນທີ່ພຣະຄຣິສໃສ່ໄວ້ໃນໃຈຂອງພວກເຂົາ. ຖ້າປາສະຈາກພຣະຄຸນທີ່ເຮັດໃຫ້ກັບໃຈໃໝ່ ແລະ ຣິດອຳນາດທີ່ຟື້ນຟູຈິດວິນຍານ, ມະນຸດກໍຈະສືບຕໍ່ໃນການເປັນຂ້າທາດຂອງຊາຕານ ໂດຍຈະຕ້ອງຍອມເຮັດຕາມຄວາມປະສົງຂອງມັນຢູ່ສະເໝີ. ແຕ່ເມື່ອພຣະຄຣິສຊົງໃສ່ຫຼັກການໃໝ່ໄວ້ໃນຈິດໃຈຂອງມະນຸດແລ້ວ ພວກເຂົາກໍເລີ່ມເປັນສັດຕູກັບຊາຕານ ເຊິ່ງເມື່ອກ່ອນເຄີຍເປັນມິດກັບມັນ. ພຣະຄຣິສປະທານກຳລັງໃຫ້ມະນຸດສາມາດຕໍ່ຕ້ານຊາຕານ ຜູ້ເປັນຈອມຜະເດັດການ ແລະ ເປັນຜູ້ຍາດເອົາອຳນາດໂດຍພະລະການ. ຜູ້ໃດທີ່ກຽດຊັງຄວາມບາບແທນທີ່ຈະຮັກມັນ, ພ້ອມດ້ວຍຜູ້ຄົນທີ່ຕໍ່ຕ້ານ ແລະ ມີໄຊຕໍ່ຄວາມຢາກທີ່ເຄີຍຄອບງຳຈິດໃຈນັ້ນ, ກໍສະແດງເຖິງຫຼັກການທີ່ມາຈາກເບື້ອງເທິງໂດຍແທ້ຈິງ. {GC 506.2}

ຄວາມຂັດແຍ້ງທີ່ມີຢູ່ລະຫວ່າງແນວຄິດຂອງພຣະຄຣິສກັບແນວຄິດຂອງຊາຕານ ໄດ້ສະແດງອອກຢ່າງຈະແຈ້ງທີ່ສຸດໃນທ່າທີທີ່ຊາວໂລກມີຕໍ່ພຣະເຢຊູ. ສາເຫດສ່ວນໃຫຍ່ທີ່ຊາວຢິວປະຕິເສດພຣະອົງ ບໍ່ແມ່ນຍ້ອນພຣະອົງສະເດັດມາໂດຍບໍ່ມີຊັບສົມບັດ ຫຼື ຄວາມໂອ່ອ່າຟູຟ້າທາງຝ່າຍໂລກ. ພວກເຂົາເຫັນວ່າ ພຣະອົງຊົງມີຣິດອຳນາດທີ່ຊົງຄຸນຄ່າຫຼາຍກວ່າສິ່ງຂອງພາຍນອກ. ແຕ່ຄົນອະທຳກຽດຊັງພຣະຄຣິສ ຍ້ອນຄວາມສະອາດບໍຣິສຸດຂອງພຣະອົງ. ການດຳລົງຊີວິດຂອງພຣະອົງທີ່ປະຕິເສດຕົນເອງ ແລະ ອຸທິດຕົນໂດຍປາສະຈາກຄວາມບາບນັ້ນ ເປັນສິ່ງທີ່ໄດ້ປະນາມຜູ້ຄົນທີ່ຈອງຫອງຢູ່ຕະຫຼອດເວລາ ແລະ ເປັນສິ່ງທີ່ຕຳໜິຄົນທີ່ຕິດພັນໃນເນື້ອໜັງຢ່າງບໍ່ຢຸດຢ່ອນ. ເລື່ອງນີ້ແຫຼະທີ່ເຮັດໃຫ້ຊາວໂລກກຽດຊັງພຣະບຸດຂອງພຣະເຈົ້າ. ຊາຕານກັບເຫຼົ່າທູດຮ້າຍຂອງມັນໄດ້ເຂົ້າຮ່ວມກັບຄົນຊົ່ວ; ຝ່າຍທີ່ປະຕິເສດພຣະເຈົ້າໄດ້ຮ່ວມພະລັງທັງໝົດ ເພື່ອຕໍ່ຕ້ານພຣະຄຣິສຜູ້ປົກປ້ອງຄວາມຈິງ. {GC 506.3}

ຜູ້ຕິດຕາມພຣະຄຣິສໄດ້ຖືກກຽດຊັງເໝືອນດັ່ງພຣະອາຈານຂອງພວກເຂົາ. ທຸກຄົນທີ່ເຫັນວ່າ ຄວາມບາບເປັນສິ່ງທີ່ໜ້າລັງກຽດ ແລະ ຕ້ານທານການທົດລອງດ້ວຍພະລັງທີ່ໄດ້ຮັບຈາກເບື້ອງເທິງ ກໍຈະຖືກຊາຕານກັບສະໝຸນຂອງມັນລຸກຂຶ້ນຕໍ່ຕ້ານດ້ວຍຄວາມໂກດຮ້າຍຢ່າງແນ່ນອນ. ຄວາມກຽດຊັງຕໍ່ຫຼັກການອັນບໍຣິສຸດແຫ່ງຄວາມຈິງ ພ້ອມທັງການປະນາມ ແລະ ການຂົ່ມເຫັງຄົນທັງຫຼາຍທີ່ສະໜັບສະໜູນຄວາມຈິງ ຈະຍັງຄົງມີຢູ່ຕາບໃດທີ່ຄວາມບາບ ແລະ ຄົນບາບຍັງມີຢູ່ໃນໂລກ. ສາວົກຂອງພຣະຄຣິສ ແລະ ຜູ້ຮັບໃຊ້ຂອງຊາຕານບໍ່ສາມາດຈະປອງດອງກັນໄດ້. ການຖືກຂົ່ມເຫັງຍ້ອນໄມ້ກາງແຂນກໍຍັງສືບຕໍ່ບໍ່ສິ້ນສຸດ. “ຕາມຄວາມຈິງແລ້ວ, ຜູ້ໃດກໍຕາມ ທີ່ປາຖະໜາຈະດຳເນີນຊີວິດຕາມທາງຂອງພຣະເຈົ້າ ໃນພຣະຄຣິສເຈົ້າເຢຊູນັ້ນ ກໍຈະຖືກຂົ່ມເຫັງ.” (2 ຕີໂມທຽວ 3:12 LCV). {GC 507.1}

ພວກຜູ້ຮັບໃຊ້ຂອງຊາຕານກຳລັງເຮັດວຽກຢູ່ຕະຫຼອດເວລາພາຍໃຕ້ການນຳພາຂອງມັນ ເພື່ອສ້າງຕັ້ງສິດອຳນາດ ແລະ ອານາຈັກຂອງມັນໃຫ້ເຂັ້ມແຂງ ໂດຍເລັງທີ່ຈະຕໍ່ຕ້ານການປົກຄອງຂອງພຣະເຈົ້າ. ເພື່ອທີ່ຈະບັນລຸຈຸດປະສົງນີ້, ພວກມັນພະຍາຍາມຫຼອກລວງຜູ້ຕິດຕາມພຣະຄຣິສ ແລະ ລໍ້ລວງພວກເຂົາໃຫ້ປະຖິ້ມຄວາມສັດຊື່ທີ່ມີຕໍ່ພຣະອົງ. ໃນການບິດເບືອນ ແລະ ພິກແພງຂໍ້ພຣະຄຳພີ ເພື່ອໃຫ້ສຳເລັດຕາມຈຸດປະສົງຂອງຕົນ, ຄົນເຫຼົ່ານີ້ບໍ່ຕ່າງຫຍັງກັບຊາຕານຜູ້ເປັນນາຍຂອງພວກເຂົາ. ຊາຕານພະຍາຍາມຊັກນຳໃຫ້ຄົນດູໝິ່ນພຣະເຈົ້າຢ່າງໃດ ຜູ້ຮັບໃຊ້ຂອງມັນກໍພະຍາຍາມດູໝິ່ນໃສ່ຮ້າຍປະຊາຊົນຂອງພຣະອົງຢ່າງນັ້ນ. ແນວຄິດທີ່ນຳໄປສູ່ການປະຫານອົງພຣະຄຣິສ ກໍຍັງຄອບງຳຄົນຊົ່ວໃຫ້ທຳລາຍພວກສາວົກຂອງພຣະອົງ. ທັງໝົດນີ້, ໄດ້ຖືກທຳນວາຍໄວ້ລ່ວງໜ້າໃນຄຳພະຍາກອນທຳອິດທີ່ກ່າວວ່າ: “ເຮົາຈະໃຫ້ເຈົ້າກັບຜູ້ຍິງເປັນສັດຕູກັນ ແລະ ເຊື້ອສາຍຂອງເຈົ້າກັບເຊື້ອສາຍຂອງຜູ້ຍິງເປັນສັດຕູກັນ.” (ປະຖົມມະການ 3:15 ສະບັບລາວບູຮານ). ສິ່ງເຫຼົ່ານີ້ຈະດຳເນີນຕໍ່ໄປຈົນເຖິງວາລະສຸດທ້າຍ. {GC 507.2}

ຊາຕານຮວບຮວມພັກພວກ ແລະ ພະລັງທັງໝົດຂອງມັນເພື່ອການຕໍ່ສູ້, ແຕ່ເປັນຫຍັງມັນຈຶ່ງບໍ່ພົບກັບການຕໍ່ຕ້ານຫຼາຍກວ່ານີ້? ເປັນຫຍັງທະຫານຂອງພຣະຄຣິສຈຶ່ງງ່ວງເຫງົາຫາວນອນ ແລະ ເມີນເສີຍຕໍ່ສິ່ງເຫຼົ່ານີ້? ສາເຫດກໍຍ້ອນວ່າ ພວກເຂົາບໍ່ໄດ້ສະໜິດຕິດພັນກັບພຣະຄຣິສຢ່າງແທ້ຈິງ ແລະ ຍ້ອນວ່າພວກເຂົາຂາດພຣະວິນຍານຂອງພຣະອົງ. ພຣະເຢຊູຊົງເຫັນວ່າ ຄວາມບາບເປັນສິ່ງທີ່ໜ້າກຽດຊັງ ແລະ ໜ້າລັງກຽດ ແຕ່ບັນດາລູກສິດຂອງພຣະອົງບໍ່ໄດ້ເຫັນຢ່າງນັ້ນ. ພວກເຂົາບໍ່ໄດ້ຕໍ່ສູ້ກັບຄວາມບາບຢ່າງເດັດດ່ຽວໜຽວແໜ້ນ ເໝືອນດັ່ງທີ່ພຣະຄຣິສຊົງຕໍ່ສູ້ກັບມັນ. ທະຫານຂອງພຣະຄຣິສໃນຍຸກນີ້ ບໍ່ເຂົ້າໃຈເຖິງຄວາມຊົ່ວຮ້າຍ ແລະ ພິດອັນຕະລາຍຂອງຄວາມບາບ. ພວກເຂົາຕາບອດເບິ່ງບໍ່ເຫັນອຸປະນິໄສ ແລະ ອຳນາດຂອງເຈົ້າແຫ່ງຄວາມມືດ. ຄົນສ່ວນຫຼາຍບໍ່ເຫັນຊາຕານເປັນສັດຕູ ແລະ ບໍ່ໄດ້ກຽດຊັງວຽກງານຂອງມັນ ຍ້ອນວ່າພວກເຂົາບໍ່ເຂົ້າໃຈກ່ຽວກັບອຳນາດ ແລະ ເຈດຕະນາຮ້າຍຂອງມັນ. ນອກຈາກນີ້, ພວກເຂົາບໍ່ຄ່ອຍໄດ້ຮັບຮູ້ເຖິງສົງຄາມທີ່ຊາຕານເຮັດຕໍ່ພຣະເຢຊູ ແລະ ຄຣິສຕະຈັກຂອງພຣະອົງອັນແຜ່ອອກໄປຢ່າງກວ້າງຂວາງ. ມີຄົນຈຳນວນຫຼວງຫຼາຍຖືກຫຼອກລວງໃນເລື່ອງນີ້; ພວກເຂົາບໍ່ຮູ້ວ່າ ສັດຕູຂອງມະນຸດແມ່ນແມ່ທັບຜູ້ເກັ່ງກ້າສາມາດທີ່ຄວບຄຸມຄວາມຄິດຂອງເຫຼົ່າທູດສະຫວັນຜູ້ຫຼົງຜິດ; ແລະບໍ່ຮູ້ວ່າ ຊາຕານກຳລັງຕໍ່ສູ້ກັບພຣະຄຣິສຕາມແຜນການທີ່ວາງໄວ້ຢ່າງລະອຽດ ແລະ ດ້ວຍການເຄື່ອນໄຫວຢ່າງຊຳນິຊຳນານ ເພື່ອຂັດຂວາງບໍ່ໃຫ້ມະນຸດໄດ້ຮັບຄວາມລອດພົ້ນ. ໃນໝູ່ຄຣິສຕຽນ ແລະ ແມ່ນແຕ່ທ່າມກາງເຫຼົ່າສາສະໜາຈານເກືອບຈະບໍ່ມີການເວົ້າເຖິງຊາຕານເລີຍ ນອກຈາກບາງຄັ້ງທີ່ກ່າວເຖິງແບບຜ່ານໆໃນຄຳເທດສະໜາເທົ່ານັ້ນ. ພວກເຂົາເບິ່ງຂ້າມຫຼັກຖານທີ່ສະແດງໃຫ້ເຫັນເຖິງການເຄື່ອນໄຫວ ແລະ ຜົນສຳເລັດອັນຕໍ່ເນື່ອງຂອງມັນ. ຫຼາຍຄົນທີ່ອ້າງຕົນເປັນຄຣິສຕຽນ ໄດ້ລະເລີຍຄຳເຕືອນທີ່ມີຢ່າງຫຼວງຫຼາຍກ່ຽວກັບກົນອຸບາຍຂອງຊາຕານ ແລະ ເຮັດຄືກັບວ່າຊາຕານບໍ່ມີຈິງ. {GC 507.3}

ສັດຕູຜູ້ບໍ່ເຄີຍຫຼັບໄຫຼ

ໃນຂະນະທີ່ມະນຸດບໍ່ຮູ້ເຖິງກົນອຸບາຍຂອງສັດຕູຜູ້ນີ້, ມັນກໍຄອຍຕິດຕາມພວກເຂົາຢູ່ຕະຫຼອດເວລາ. ມັນໄດ້ແຊກແຊງເຂົ້າໄປໃນທຸກພາກສ່ວນຂອງຄອບຄົວ, ຕາມຖະໜົນຫົນທາງທຸກສາຍໃນເມືອງຂອງພວກເຮົາ, ໃນຄຣິສຕະຈັກຕ່າງໆ, ໃນສະພາແຫ່ງຊາດ ແລະ ໃນສານຍຸຕິທຳ. ມັນຫຼອກລວງ, ສ້າງຄວາມສັບສົນ, ຊັກຈູງໃຫ້ຫຼົງ, ທຳລາຍຈິດວິນຍານ ແລະ ຮ່າງກາຍຂອງຜູ້ຊາຍ, ຜູ້ຍິງ ແລະ ເດັກນ້ອຍໃນທຸກຫົນແຫ່ງ. ມັນທຳລາຍຄອບຄົວ, ຍຸຍົງໃຫ້ເກີດຄວາມກຽດຊັງ, ປຸກລະດົມໃຫ້ມີການຊິງດີຊິງເດັ່ນກັນ, ຍຸແຍ່ໃຫ້ເກີດການຜິດຖຽງກັນ, ການກໍ່ກະບົດ ແລະ ການຂ້າຟັນລັນແທງກັນ. ແຕ່ວົງການຄຣິສຕຽນທົ່ວໂລກກັບຖືວ່າ ເປັນສິ່ງທີ່ພຣະເຈົ້າຊົງກຳນົດໄວ້ ແລະ ບໍ່ອາດຫຼີກລ່ຽງໄດ້. {GC 508.1}

ຊາຕານກຳລັງຊອກເຊາະເຈາະຈີ້ມຫາທາງເອົາຊະນະຄົນຂອງພຣະເຈົ້າຢູ່ສະເໝີ ໂດຍການທຳລາຍກຳແພງທີ່ແຍກພວກເຂົາອອກຈາກຊາວໂລກ. ເມື່ອຊາວອິດສະຣາເອນໃນສະໄໝບູຮານ ໄດ້ຝ່າຝືນການຊົງຫ້າມຂອງພຣະເຈົ້າ ແລະ ໄປພົວພັນກັບຊົນຊາດທີ່ບໍ່ນັບຖືພຣະອົງ, ພວກເຂົາກໍຖືກຊັກຈູງໃຫ້ເຮັດບາບ. ຄົນຂອງພຣະເຈົ້າໃນປັດຈຸບັນ ກຳລັງຖືກຊັກນຳໃຫ້ຫຼົງທາງໃນລັກສະນະແບບດຽວກັນ. “ພຣະຂອງຍຸກນີ້ເຮັດໃຫ້ຈິດໃຈຂອງບັນດາຄົນທີ່ບໍ່ເຊື່ອບອດໄປ, ເພື່ອວ່າພວກເຂົາຈະບໍ່ສາມາດເຫັນແສງສະຫວ່າງຂອງຂ່າວປະເສີດ ທີ່ສະແດງສະຫງ່າຣາສີຂອງພຣະຄຣິສເຈົ້າ ຜູ້ເປັນເໝືອນພຣະເຈົ້າທຸກຢ່າງ.” (2 ໂກຣິນໂທ 4:4 LCV). ທຸກຄົນທີ່ບໍ່ໄດ້ຕັດສິນໃຈຕິດຕາມພຣະຄຣິສ ກໍເປັນຜູ້ຮັບໃຊ້ຂອງຊາຕານ. ໃນຈິດໃຈທີ່ຍັງບໍ່ທັນໄດ້ບັງເກີດໃໝ່ນັ້ນ ມີໃຈຮັກຄວາມບາບ ແລະ ມີແນວໂນ້ມທີ່ຈະທະນຸຖະໜອມຫຼໍ່ລ້ຽງຄວາມບາບ ແລະ ແກ້ຕົວໃຫ້ກັບມັນ. ແຕ່ຈິດໃຈທີ່ບັງເກີດໃໝ່ແລ້ວນັ້ນ ຈະມີຄວາມກຽດຊັງຕໍ່ຄວາມບາບ ແລະ ມີຄວາມຕັ້ງໃຈຢ່າງຈົດຈໍ່ແນ່ວແນ່ ທີ່ຈະຕ້ານທານຄວາມບາບ. ເມື່ອຄຣິສຕຽນເລືອກທີ່ຈະຄົບຄ້າສະມາຄົມກັບຄົນອະທຳ ແລະ ຄົນທີ່ບໍ່ເຊື່ອ, ພວກເຂົາກໍເປີດໂອກາດໃຫ້ຕົນເອງຖືກທົດລອງ. ຊາຕານເຊື່ອງຊ່ອນຕົວບໍ່ໃຫ້ພວກເຂົາເຫັນ ແລະ ຫຼອກລວງໂດຍການຄ່ອຍໆຂຶງຜ້າປົກຕາຂອງພວກເຂົາຢ່າງຊ້າໆ. ພວກເຂົາບໍ່ເຫັນວ່າການຄົບຄ້າກັບຄົນເຊັ່ນນີ້ ນຳຄວາມເສຍຫາຍມາສູ່ຕົນຢ່າງແນ່ນອນ. ໃນຂະນະທີ່ພວກເຂົາປັບຕົວໃຫ້ເຂົ້າກັບຊາວໂລກທັງໃນດ້ານນິໄສ, ວາຈາ ແລະ ການກະທຳ, ຈິດໃຈຂອງພວກເຂົາກໍຍິ່ງມືດບອດຫຼາຍຂຶ້ນເລື້ອຍໆ. {GC 508.2}

ການເຮັດຕາມທຳນຽມຂອງຊາວໂລກ ຈະເຮັດໃຫ້ຄຣິສຕະຈັກກາຍເປັນແບບຊາວໂລກ ແຕ່ຈະບໍ່ມີວັນເຮັດໃຫ້ຊາວໂລກຫັນມາຫາພຣະຄຣິສ. ເມື່ອຄົນເຮົາລຶ້ງເຄີຍກັບຄວາມບາບ ຈະເຮັດໃຫ້ຄວາມບາບນັ້ນເບິ່ງຄືບໍ່ໜ້າກຽດຊັງເທົ່າທີ່ຄວນ. ຜູ້ທີ່ເລືອກຄົບຄ້າສະມາຄົມກັບຜູ້ຮັບໃຊ້ຂອງຊາຕານ ບໍ່ຊ້າກໍຈະເລີກຢ້ານກົວນາຍຂອງພວກເຂົາ. ເມື່ອພວກເຮົາຕ້ອງປະເຊີນກັບການທົດລອງໃນຂະນະທີ່ກຳລັງປະຕິບັດໜ້າທີ່, ເໝືອນດັ່ງດານີເອນຖືກທົດລອງໃນພຣະຣາຊວັງຂອງກະສັດ, ພວກເຮົາກໍແນ່ໃຈໄດ້ເລີຍວ່າ ພຣະເຈົ້າຈະຊົງປົກປ້ອງພວກເຮົາ; ແຕ່ຖ້າພວກເຮົານຳພາຕົນເອງເຂົ້າສູ່ການທົດລອງ ພວກເຮົາກໍຈະສະດຸດລົ້ມລົງຢ່າງແນ່ນອນ, ບໍ່ຊ້າກໍໄວ. {GC 509.1}

ວິທີທີ່ຊາຕານສາມາດລໍ້ລວງຄົນໄດ້ສຳເລັດດີທີ່ສຸດຢ່າງໜຶ່ງ ຄືການໃຊ້ຄົນທີ່ບໍ່ມີໃຜຄາດຄິດວ່າຜູ້ນັ້ນຢູ່ພາຍໃຕ້ການຄວບຄຸມຂອງມັນ. ຄົນທີ່ມີພອນສະຫວັນ ແລະ ການສຶກສາສູງ ມັກໄດ້ຮັບການນັບໜ້າຖືຕາເໝືອນກັບວ່າ ຄຸນສົມບັດເຫຼົ່ານີ້ສາມາດຊົດເຊີຍການທີ່ພວກເຂົາຂາດຄວາມຢຳເກງພຣະເຈົ້າ. ບາງຄົນເຂົ້າໃຈຜິດວ່າ ຄົນທີ່ມີຄວາມສາມາດ ຫຼື ການຮຽນສູງ ກໍສົມຄວນໄດ້ຮັບຄວາມໂປດປານຈາກພຣະອົງ ເພາະຄວາມເກັ່ງຂອງພວກເຂົາ. ແທ້ຈິງແລ້ວ, ພອນສະຫວັນ ແລະ ການສຶກສາເປັນຂອງປະທານຈາກພຣະເຈົ້າ, ແຕ່ເມື່ອນຳສິ່ງເຫຼົ່ານີ້ມາທົດແທນຄວາມເຊື່ອ, ແທນທີ່ຈະນຳຈິດວິນຍານເຂົ້າໃກ້ພຣະເຈົ້າ ຊ້ຳພັດພາໃຫ້ຫ່າງຈາກພຣະອົງ ແລະ ກາຍເປັນກັບດັກທີ່ເປັນເຫດໃຫ້ຕ້ອງຖືກສາບແຊ່ງ. ຫຼາຍຄົນເຊື່ອວ່າ, ທຸກສິ່ງທີ່ສະແດງອອກເຖິງຄວາມມີມາລະຍາດ ຫຼື ຄວາມສຸພາບຮຽບຮ້ອຍ ຕ້ອງກ່ຽວຂ້ອງກັບພຣະຄຣິສບໍ່ຫຼາຍກໍໜ້ອຍ. ແຕ່ນີ້ເປັນຄວາມເຂົ້າໃຈຜິດອັນໃຫຍ່ຫຼວງ. ຄຸນສົມບັດເຫຼົ່ານີ້ຄວນປະດັບອຸປະນິໄສຂອງຄຣິສຕຽນທຸກຄົນ ເພາະຈະມີພະລັງໃນການສົ່ງເສີມສາສະໜາທີ່ແທ້ຈິງ. ແຕ່ຖ້າບໍ່ໄດ້ອຸທິດຖວາຍໃຫ້ແກ່ພຣະເຈົ້າ ຄຸນສົມບັດເຫຼົ່ານີ້ຈະກາຍເປັນພະລັງໂນ້ມນ້າວໃຫ້ເກີດຄວາມຊົ່ວຮ້າຍ. ຫຼາຍຄົນທີ່ມີສະຕິປັນຍາສູງ, ມີມາລະຍາດດີ ແລະ ບໍ່ຍອມລົດຕົວລົງໄປເຮັດສິ່ງທີ່ຄົນທົ່ວໄປຖືວ່າຜິດສິນທຳ ແຕ່ແທ້ທີ່ຈິງແລ້ວພວກເຂົາເປັນພຽງເຄື່ອງມືທີ່ຖືກຂັດມັນໃຫ້ເຫຼື້ອມຢູ່ໃນມືຂອງຊາຕານເທົ່ານັ້ນ. ຍ້ອນຄົນເຊັ່ນນີ້ເຊື່ອງຊ່ອນລັກສະນະທີ່ແທ້ຈິງຂອງຕົນ, ຊາຕານຈຶ່ງສາມາດໃຊ້ພວກເຂົາເປັນເຄື່ອງມືທີ່ອັນຕະລາຍຕໍ່ພາລະກິດຂອງພຣະຄຣິສ ຫຼາຍກວ່າຄົນທີ່ຂາດຄວາມຮູ້ ແລະ ດ້ອຍການສຶກສາ. {GC 509.2}

ຍ້ອນການອະທິຖານຢ່າງຮ້ອນຮົນ ແລະ ການໄວ້ວາງໃຈໃນພຣະເຈົ້າ ກະສັດໂຊໂລໂມນໄດ້ຮັບສະຕິປັນຍາທີ່ເຮັດໃຫ້ຊາວໂລກປະຫຼາດໃຈ ແລະ ຊົມເຊີຍ. ແຕ່ເມື່ອເພິ່ນຫັນໄປຈາກພຣະອົງຜູ້ໃຫ້ປັນຍາ ແລະ ເຫື່ອແຮງກຳລັງ, ແລ້ວດຳເນີນຊີວິດໂດຍເພິ່ງພາຕົນເອງ, ເພິ່ນກໍຕົກເປັນເຫຍື່ອຂອງການທົດລອງ. ເມື່ອນັ້ນ, ຄວາມສາມາດອັນໜ້າອັດສະຈັນທີ່ພຣະເຈົ້າປະທານໃຫ້ແກ່ກະສັດຜູ້ສະຫຼາດທີ່ສຸດນີ້ ພັດເຮັດໃຫ້ເພິ່ນມີປະສິດທິພາບຫຼາຍຂຶ້ນ ໃນການຮັບໃຊ້ຊາຕານຜູ້ເປັນສັດຕູຂອງມະນຸດ. {GC 509.3}

ເຖິງແມ່ນວ່າຊາຕານພະຍາຍາມຢູ່ຕະຫຼອດເວລາ ເພື່ອເຮັດໃຫ້ຈິດໃຈຂອງຄຣິສຕຽນມືດບອດກໍຕາມ, ແຕ່ຂໍຢ່າໃຫ້ພວກເຂົາໄດ້ລືມໄປວ່າ “ພວກເຮົາບໍ່ໄດ້ຕໍ່ສູ້ກັບມະນຸດ ແຕ່ຕໍ່ສູ້ກັບພວກຜູ້ຄອບຄອງ ພວກຜູ້ມີອຳນາດ ຕໍ່ສູ້ກັບພວກເທບພະເຈົ້າທີ່ຄອງໂລກມືດນີ້ ແລະ ຕໍ່ສູ້ກັບພວກວິນຍານຊົ່ວຮ້າຍໃນໂລກຝ່າຍວິນຍານ.” (ເອເຟໂຊ 6:12 THA-ERV). ຄຳເຕືອນຂອງພຣະວິນຍານບໍຣິສຸດ ຍັງຄົງກ້ອງກັງວານຕະຫຼອດຫຼາຍຮ້ອຍປີ ມາຈົນເຖິງສະໄໝຂອງພວກເຮົາວ່າ: “ຈົ່ງຄອຍລະວັງຕົວ ແລະ ເຝົ້າຢູ່. ດ້ວຍວ່າ, ສັດຕູຂອງພວກເຈົ້າຄືມານ ທຽວວົນວຽນໄປມາເໝືອນໂຕສິງ ທີ່ແຜດສຽງຊອກຫາຄົນທີ່ມັນຈະກັດກິນໄດ້.” (1 ເປໂຕ 5:8). “ຈົ່ງສວມຍຸດທະພັນຄົບຊຸດຂອງພຣະເຈົ້າ ເພື່ອວ່າພວກເຈົ້າຈະສາມາດຢືນຕົວຕໍ່ສູ້ກັບກົນອຸບາຍຂອງມານຮ້າຍໄດ້.” (ເອເຟໂຊ 6:11 LCV). {GC 510.1}

ນັບຕັ້ງແຕ່ສະໄໝຂອງອາດາມມາເຖິງສະໄໝປັດຈຸບັນ ສັດຕູຮ້າຍຂອງພວກເຮົາໄດ້ໃຊ້ອຳນາດຂອງມັນໃນການກົດຂີ່ ແລະ ທຳລາຍ. ບັດນີ້, ມັນກຳລັງຈັດຕຽມການໂຈມຕີຄຣິສຕະຈັກເປັນຄັ້ງສຸດທ້າຍ. ທຸກຄົນທີ່ພະຍາຍາມຕິດຕາມພຣະເຢຊູ ຈະຕ້ອງປະເຊີນກັບສັດຕູຜູ້ບໍ່ຍອມລົດລະຜູ້ນີ້. ຍິ່ງຄຣິສຕຽນເຮັດຕາມແບບຢ່າງຂອງພຣະເຢຊູຫຼາຍເທົ່າໃດ, ກໍຍິ່ງຈະກາຍເປັນເປົ້າໝາຍການໂຈມຕີຂອງຊາຕານຫຼາຍຂຶ້ນເທົ່ານັ້ນ. ທຸກຄົນທີ່ເຮັດວຽກງານຂອງພຣະເຈົ້າຢ່າງຫ້າວຫັນ ໂດຍພະຍາຍາມເປີດໂປງການຫຼອກລວງຂອງຊາຕານ ແລະ ປະກາດເລື່ອງຂອງພຣະຄຣິສແກ່ປະຊາຊົນ, ຈະມີປະສົບການແບບດຽວກັນກັບອາຈານໂປໂລ ເມື່ອເພິ່ນກ່າວວ່າ: “ຂ້າພະເຈົ້າໄດ້ຮັບໃຊ້ອົງ­ພຣະ­ຜູ້­ເປັນ­ເຈົ້າ ດ້ວຍຄວາມຖ່ອມຕົວທຸກຢ່າງ ດ້ວຍນ້ຳຕາໄຫຼ ແລະ ໂດຍຜ່ານຜ່າຄວາມຍາກລຳບາກນາໆປະການ.” (ກິດຈະການ 20:19). {GC 510.2}

ຊາຕານໄດ້ໂຈມຕີພຣະຄຣິສດ້ວຍການທົດລອງທີ່ຮ້າຍກາດ ແລະ ມີເລ່ລ່ຽມຫຼາຍທີ່ສຸດ, ແຕ່ພຣະອົງຊະນະການຕໍ່ສູ້ໃນທຸກຄັ້ງ. ພຣະເຢຊູຊົງຕໍ່ສູ້ກັບການທົດລອງເພື່ອພວກເຮົາ ແລະ ໄຊຊະນະຂອງພຣະອົງເຮັດໃຫ້ພວກເຮົາສາມາດເອົາຊະນະໄດ້. ພຣະຄຣິສຈະປະທານກຳລັງແກ່ທຸກຄົນທີ່ສະແຫວງຫາກຳລັງຈາກພຣະອົງ. ບໍ່ມີຜູ້ໃດຈະພ່າຍແພ້ຕໍ່ຊາຕານນອກຈາກຈະຍິນຍອມໃຫ້ມັນຊະນະ. ຊາຕານບໍ່ມີອຳນາດຄວບຄຸມຄວາມຕັ້ງໃຈ ຫຼື ບັງຄັບຄົນໃຫ້ເຮັດບາບ. ມັນອາດສ້າງຄວາມທຸກໃຈ ແຕ່ບໍ່ສາມາດເຮັດໃຫ້ເສື່ອມເສຍໄດ້. ມັນສາມາດເຮັດໃຫ້ເຈັບປວດ ແຕ່ບໍ່ສາມາດເຮັດໃຫ້ເປິເປື້ອນມົນທິນໄດ້. ການທີ່ພຣະຄຣິສຊົງຊະນະການທົດລອງນັ້ນ ຄວນເປັນແຮງກຳລັງໃຈໃຫ້ເຫຼົ່າສາວົກຂອງພຣະອົງ ມີຄວາມກ້າຫານທີ່ຈະຕໍ່ສູ້ກັບຊາຕານ ແລະ ຕໍ່ສູ້ກັບຄວາມບາບຢ່າງເຕັມກຳລັງ. {GC 510.3}