https://m.egwwritings.org/en/book/132.2168#2168
ຜູ້ເຜີຍພຣະທຳດານີເອນກ່າວວ່າ: “ຂະນະທີ່ຂ້າພະເຈົ້າຫຼຽວເບິ່ງ ບັນລັງຫຼາຍບັນລັງຖືກຕັ້ງໄວ້ ອົງຜູ້ດຳລົງຊີວິດຢັ້ງຢືນຕະຫຼອດການໄດ້ນັ່ງລົງ, ເຄື່ອງແຕ່ງກາຍຂອງພຣະອົງຂາວຄືກັບຫິມະ, ຜົມຂອງພຣະອົງຂາວດັ່ງຂົນແກະ, ບັນລັງຂອງພຣະອົງດຸດດັ່ງແປວໄຟ ລໍ້ບັນລັງດັ່ງໄຟລຸກ, ບຶງໄຟພຸ່ງອອກມາຈາກເບື້ອງໜ້າພຣະອົງ. ຄົນນັບພັນນັບໝື່ນຮັບໃຊ້ພຣະອົງ ແລະ ຄົນນັບແສນນັບລ້ານຢືນຮັບຄຳສັ່ງຢູ່ເບື້ອງໜ້າພຣະອົງ ແລ້ວສານກໍເລີ່ມພິຈາລະນາຄະດີ ແລະ ໜັງສືຫຼາຍຫົວໄດ້ເປີດອອກ.” (ດານີເອນ 7:9–10 ດັດແປງຈາກສະບັບ NTV). {GC 479.1}
ນິມິດນີ້ໄດ້ສະແດງໃຫ້ຜູ້ເຜີຍພຣະທຳດານີເອນເຫັນເຖິງວັນສຳຄັນຍິ່ງໃຫຍ່ ເມື່ອອຸປະນິໄສ ແລະ ວິຖີຊີວິດຂອງມະນຸດທຸກຄົນຈະຖືກທົບທວນຄືນຕໍ່ໜ້າຜູ້ພິພາກສາພິພົບໂລກ; ແລະທຸກຄົນຈະໄດ້ຮັບ “ຕາມການກະທຳຂອງຕົນ.” (ມັດທາຍ 16:27). ພຣະອົງຜູ້ດຳລົງຊີວິດ “ຢັ້ງຢືນຕະຫຼອດການ” ກໍຄືພຣະເຈົ້າພຣະບິດາ. ຜູ້ຂຽນເພງສັນລະເສີນກ່າວວ່າ: “ກ່ອນທີ່ພູຜາປ່າໄມ້ຖືກສ້າງຂຶ້ນມາ, ກ່ອນທີ່ໂລກເຮົາດຳລົງຄົງຕົວຢູ່ຢ່າງນີ້, ພຣະອົງເປັນພຣະເຈົ້າອົງເປັນຢູ່ຊົ່ວນິຣັນການ ແລະ ເປັນພຣະເຈົ້າທີ່ດຳລົງຢູ່ສືບໄປເປັນນິດ.” (ເພງສັນລະເສີນ 90:2). ພຣະບິດາຜູ້ຊົງເປັນຕົ້ນກຳເນີດຂອງທຸກຊີວິດ ແລະ ແຫຼ່ງທີ່ມາຂອງກົດບັນຍັດທັງປວງນັ້ນ ຈະຊົງເປັນປະທານໃນການພິພາກສາ. ບັນດາທູດສະຫວັນຜູ້ບໍຣິສຸດຈຳນວນ ‘ນັບເປັນພັນໆ ລ້ານໆ’ ກໍມາຮ່ວມໃນການພິພາກສາອັນຍິ່ງໃຫຍ່ນີ້ໃນຖານະພະຍານ ແລະ ຜູ້ຮັບໃຊ້. {GC 479.2}
“ຂ້າພະເຈົ້າເຫັນຜູ້ໜຶ່ງເໝືອນບຸດມະນຸດສະເດັດມາພ້ອມດ້ວຍໝູ່ເມກແຫ່ງຟ້າສະຫວັນ. ພຣະອົງສະເດັດເຂົ້າໄປໃກ້ ແລະ ເຂົ້າເຝົ້າອົງຜູ້ດຳລົງຢູ່ຕັ້ງແຕ່ດຶກດຳບັນ.” “ພຣະອົງໄດ້ຮັບສິດອຳນາດ, ສະຫງ່າຣາສີ ແລະ ອຳນາດປົກຄອງສູງສຸດ; ຄົນທຸກຊາດ ແລະ ທຸກພາສາໄດ້ນະມັດສະການພຣະອົງ. ອຳນາດຂອງພຣະອົງດຳລົງຢູ່ຕະຫຼອດໄປ ອຳນາດທີ່ຈະບໍ່ມີວັນສິ້ນສຸດ ແລະ ອານາຈັກຂອງພຣະອົງຈະບໍ່ມີວັນຖືກທຳລາຍ.” (ດານີເອນ 7:13 TNCV, 14 LCV). ການສະເດັດມາຂອງພຣະຄຣິສທີ່ບັນລະຍາຍໄວ້ນີ້ ບໍ່ແມ່ນການສະເດັດມາສູ່ແຜ່ນດິນໂລກຄັ້ງທີສອງຂອງພຣະອົງ. ພຣະອົງສະເດັດມາຫາ “ຜູ້ມີຊີວິດຢູ່ຕະຫຼອດໄປ” ໃນສະຫວັນ ເພື່ອຮັບເອົາອຳນາດການປົກຄອງ, ສະຫງ່າຣາສີ ແລະ ຣາຊອານາຈັກ, ເຊິ່ງຈະຖືກມອບໃຫ້ພຣະອົງ ເມື່ອສຳເລັດວຽກງານໃນຖານະຜູ້ເປັນກາງລະຫວ່າງພຣະເຈົ້າກັບມະນຸດ. ການສະເດັດມາຄັ້ງນີ້, ບໍ່ແມ່ນການສະເດັດມາຄັ້ງທີສອງຂອງພຣະອົງ, ແຕ່ເປັນການສະເດັດທີ່ໄດ້ຖືກພະຍາກອນໄວ້ລ່ວງໜ້າວ່າ ຈະເກີດຂຶ້ນເມື່ອສິ້ນສຸດ 2,300 ວັນໃນປີ 1844. ເຫຼົ່າທູດສະຫວັນໄດ້ຕິດຕາມມະຫາປະໂຣຫິດຜູ້ຍິ່ງໃຫຍ່ຂອງພວກເຮົາ ເມື່ອພຣະອົງສະເດັດເຂົ້າສູ່ສະຖານທີ່ສັກສິດທີ່ສຸດ. ພຣະອົງປະທັບຢູ່ຕໍ່ພຣະພັກພຣະເຈົ້າ ເພື່ອປະກອບພາລະກິດສຸດທ້າຍ ໃນຖານະມະຫາປະໂຣຫິດເພື່ອມະນຸດ. ໃນທີ່ນັ້ນພຣະອົງຈະດຳເນີນການພິພາກສາແບບສືບສວນ ແລະ ລຶບລ້າງຄວາມຜິດບາບໃຫ້ແກ່ທຸກຄົນທີ່ມີສິດໄດ້ຮັບພຣະພອນນີ້. {GC 479.3}
ໃນພິທີທີ່ເຮັດໃນສະໄໝພຣະຄຳພີເດີມນັ້ນ, ມີພຽງແຕ່ຜູ້ທີ່ມາຫາພຣະເຈົ້າດ້ວຍການສາລະພາບ ແລະ ການກັບໃຈໃໝ່ເທົ່ານັ້ນ ທີ່ໄດ້ມີສ່ວນໃນພິທີກຳຂອງວັນລຶບລ້າງບາບ, ກໍຄືຄົນທີ່ບາບຂອງພວກເຂົາໄດ້ຖືກໂອນໄປຍັງສະຖານນະມັດສະການ ໂດຍຜ່ານເລືອດຂອງເຄື່ອງບູຊາໄຖ່ບາບ. ໃນທຳນອງດຽວກັນ, ໃນວັນຍິ່ງໃຫຍ່ແຫ່ງການລຶບລ້າງບາບຄັ້ງສຸດທ້າຍ ແລະ ການພິພາກສາແບບສືບສວນ, ຈະພິຈາລະນາສະເພາະຄະດີຂອງຜູ້ທີ່ອ້າງຕົນວ່າເປັນໄພ່ພົນຂອງພຣະເຈົ້າເທົ່ານັ້ນ. ການພິພາກສາຄົນຊົ່ວເປັນວຽກງານອີກຢ່າງໜຶ່ງຕ່າງຫາກ ແລະ ຈະເກີດຂຶ້ນໃນພາຍຫຼັງ. “ການພິພາກສາຈະເລີ່ມຂຶ້ນທີ່ຄົວເຮືອນຂອງພຣະເຈົ້າ ແລະ ຖ້າການພິພາກສາເລີ່ມຕົ້ນທີ່ພວກເຮົາກ່ອນ ແລ້ວຜົນທີ່ຈະໄດ້ຮັບຂອງບັນດາຜູ້ທີ່ບໍ່ເຊື່ອຟັງຂ່າວປະເສີດຂອງພຣະເຈົ້າຈະເປັນຢ່າງໃດ?” (1 ເປໂຕ 4:17 LCV). {GC 480.1}
ປຶ້ມບັນທຶກໃນສະຫວັນທີ່ຈົດບັນທຶກຊື່ ແລະ ການກະທຳຂອງມະນຸດຈະເປັນຕົວກຳນົດຜົນຂອງການພິພາກສາ. ຜູ້ເຜີຍພຣະທຳດານີເອນກ່າວວ່າ: “ສານເລີ່ມການພິພາກສາ ແລະ ໜັງສືຕ່າງໆກໍຖືກເປີດອອກ.” ສ່ວນໂຢຮັນເມື່ອອະທິບາຍເຫດການດຽວກັນກໍເວົ້າຕື່ມວ່າ: “ມີໜັງສືອີກເຫຼັ້ມໜຶ່ງກໍໄດ້ເປີດອອກເໝືອນກັນ ເຊິ່ງເປັນໜັງສືແຫ່ງຊີວິດ. ຜູ້ທີ່ຕາຍແລ້ວກໍຖືກພິພາກສາຕາມການກະທຳທີ່ພວກເຂົາໄດ້ເຮັດ ຕາມທີ່ໄດ້ບັນທຶກໄວ້ໃນໜັງສືເຫຼົ່ານັ້ນ.” (ພຣະນິມິດ 20:12 LCV). {GC 480.2}
ທະບຽນແຫ່ງຊີວິດໄດ້ບັນທຶກລາຍຊື່ຂອງທຸກຄົນທີ່ເຄີຍຮັບໃຊ້ພຣະເຈົ້າ. ພຣະເຢຊູຊົງກ່າວແກ່ພວກສາວົກຂອງພຣະອົງວ່າ: “ຈົ່ງຍິນດີ ເພາະຊື່ຂອງພວກເຈົ້າຖືກຈົດໄວ້ແລ້ວໃນສະຫວັນ.” (ລູກາ 10:20 LCV). ອາຈານໂປໂລໄດ້ເວົ້າເຖິງເພື່ອນຮ່ວມງານທີ່ສັດຊື່ວ່າ “ຄົນເຫຼົ່ານີ້ມີຊື່ຢູ່ໃນທະບຽນແຫ່ງຊີວິດແລ້ວ.” (ຟີລິບປອຍ 4:3 LCV). ດານີເອນໄດ້ເຫັນໃນນິມິດວ່າ ຈະມີ “ການລຳບາກໜັກເກີດຂຶ້ນຢ່າງບໍ່ເຄີຍມີມາ” ແລະ ປະກາດວ່າ ໄພ່ພົນຂອງພຣະເຈົ້າຈະໄດ້ຮັບການຊ່ວຍກູ້, “ຄືທຸກຄົນທີ່ຈະມີຊື່ພົບຂຽນໄວ້ໃນໜັງສືນັ້ນ.” ສ່ວນໂຢຮັນກ່າວວ່າ ມີແຕ່ຜູ້ທີ່ມີຊື່ “ຈົດໄວ້ໃນໜັງສືແຫ່ງຊີວິດຂອງລູກແກະຂອງພຣະເຈົ້າ” ເທົ່ານັ້ນ ທີ່ຈະໄດ້ເຂົ້າໄປໃນນະຄອນຂອງພຣະເຈົ້າ. (ດານີເອນ 12:1 ສະບັບລາວບູຮານ; ພຣະນິມິດ 21:27 LCV). {GC 480.3}
ມີ “ໜັງສືທີ່ລະລຶກ” ຢູ່ຕໍ່ພຣະພັກພຣະເຈົ້າ ທີ່ບັນທຶກການກະທຳດີຂອງ “ຄົນທັງຫຼາຍທີ່ຢ້ານຢຳພຣະເຢໂຮວາ ແລະ ສຳລັບຄົນທັງຫຼາຍທີ່ຄິດເຖິງນາມຊື່ຂອງພຣະອົງ.” (ມາລາກີ 3:16 ສະບັບລາວບູຮານ). ຖ້ອຍຄຳແຫ່ງຄວາມເຊື່ອ ແລະ ການກະທຳແຫ່ງຄວາມຮັກຂອງພວກເຂົາໄດ້ຖືກບັນທຶກໄວ້ໃນສະຫວັນ. ເນເຫມີຢາອ້າງເຖິງເລື່ອງນີ້ໂດຍກ່າວວ່າ: “ຂໍຊົງໂຜດຈົດຈຳສິ່ງດີໆທັງໝົດເຫຼົ່ານີ້ທີ່ຂ້ານ້ອຍໄດ້ເຮັດສຳລັບວິຫານຂອງພຣະເຈົ້າຂອງຂ້ານ້ອຍ.” (ເນເຫມີຢາ 13:14). ໃນໜັງສືທີ່ລະລຶກຂອງພຣະເຈົ້າ ຫຼື ທີ່ພາສາໄທສະບັບປີ 1940 ເອີ້ນວ່າ “ໜັງສືບັນທຶກຄວາມຈຳ,” ທຸກການກະທຳທີ່ຊອບທຳຈະຄົງຢູ່ຕະຫຼອດໄປ. ທຸກຄັ້ງທີ່ມີການຕໍ່ຕ້ານການທົດລອງ, ທຸກຄັ້ງທີ່ເອົາຊະນະຄວາມຊົ່ວ ແລະ ທຸກຖ້ອຍຄຳແຫ່ງຄວາມເມດຕາ ລ້ວນຖືກບັນທຶກໄວ້ຢ່າງຄົບຖ້ວນ. ນອກຈາກນັ້ນ, ທຸກຄັ້ງທີ່ມີການເສຍສະຫຼະ, ທຸກຄັ້ງທີ່ຕ້ອງທົນຕໍ່ຄວາມທຸກ ແລະ ຄວາມໂສກເສົ້າເພື່ອພຣະຄຣິສ ກໍຖືກບັນທຶກໄວ້ເຊັ່ນກັນ. ຜູ້ຂຽນເພງສັນລະເສີນກ່າວວ່າ: “ພຣະອົງຮູ້ວ່າ ຂ້ານ້ອຍຖືກເດືອດຮ້ອນສໍ່າໃດ ຈຶ່ງຊົງບັນຈຸນໍ້າຕາໃສ່ແກ້ວໄວ້. ນໍ້າຕາຂອງຂ້ານ້ອຍໄດ້ຖືກບັນທຶກໄວ້ໃນປຶ້ມບັນຊີຂອງພຣະອົງແລ້ວບໍ່ແມ່ນຫຼື?” (ເພງສັນລະເສີນ 56:8). {GC 481.1}
ມີການບັນທຶກຄວາມບາບຂອງມະນຸດໄວ້ເຊັ່ນກັນ. “ພຣະເຈົ້າຈະຕັດສິນທຸກສິ່ງທີ່ພວກເຮົາເຮັດ ບໍ່ວ່າດີຫຼືຊົ່ວ ແມ່ນແຕ່ສິ່ງທີ່ພວກເຮົາໄດ້ເຮັດໃນທີ່ລັບລີ້ດ້ວຍ.” (ປັນຍາຈານ 12:14). ພຣະຜູ້ຊ່ວຍໃຫ້ລອດຊົງກ່າວວ່າ: “ໃນວັນພິພາກສາ ມະນຸດຈະຕ້ອງຮັບຜິດຊອບຕໍ່ຖ້ອຍຄຳເປົ່າໆທຸກຄຳທີ່ພວກເຂົາເວົ້າອອກມາ, ເພາະເຈົ້າຈະພົ້ນໂທດໄດ້ ກໍດ້ວຍຄຳເວົ້າຂອງເຈົ້າ ແລະ ເຈົ້າຈະຖືກໂທດ ກໍດ້ວຍຄຳເວົ້າຂອງເຈົ້າ.” (ມັດທາຍ 12:36, 37 LCV). ເຈດຕະນາ ແລະ ແຮງຈູງໃຈລັບໆທັງໝົດ ລ້ວນຖືກບັນທຶກໄວ້ໃນປຶ້ມຢ່າງບໍ່ມີຄວາມຜິດພາດ; ດ້ວຍວ່າພຣະເຈົ້າຈະ “ນຳເອົາສິ່ງທີ່ເຊື່ອງໄວ້ຢູ່ໃນຄວາມມືດມາສູ່ຄວາມສະຫວ່າງ ແລະ ຈະເປີດເຜີຍບັນດາແຮງຈູງໃຈທີ່ຢູ່ໃນໃຈ.” (1 ໂກຣິນໂທ 4:5 LCV). “‘ຂໍ້ຄວາມນີ້ຂຽນໄວ້ຕໍ່ໜ້າເຮົາ’…ພຣະເຢໂຮວາກ່າວວ່າ ‘ທັງການອະທຳຂອງພວກທ່ານ ກັບການອະທຳຂອງປູ່ຍ່າຕາຍາຍນັ້ນ.’” (ເອຊາຢາ 65:6, 7 ສະບັບລາວບູຮານ). {GC 481.2}
ການກະທຳຂອງແຕ່ລະຄົນຖືກນຳມາພິຈາລະນາຕໍ່ພຣະພັກພຣະເຈົ້າ ແລະ ຖືກຈົດບັນທຶກໄວ້ວ່າສັດຊື່ຫຼືບໍ່ສັດຊື່. ຢູ່ຂ້າງຊື່ຂອງທຸກຄົນໃນປຶ້ມບັນທຶກແຫ່ງສະຫວັນ ທູດສະຫວັນໄດ້ຈົດບັນທຶກທຸກສິ່ງຢ່າງລະອຽດທີ່ສຸດ: ບໍ່ວ່າຈະເປັນຄຳເວົ້າຜິດໆ, ການກະທຳທີ່ເຫັນແກ່ຕົວ, ໜ້າທີ່ທີ່ບໍ່ໄດ້ເຮັດສຳເລັດ, ບາບທີ່ເຊື່ອງຊ່ອນໄວ້ ແລະ ການປອມແປງຢ່າງມີເລ່ລ່ຽມ. ນອກຈາກນີ້, ຍັງບັນທຶກການບໍ່ເອົາໃຈໃສ່ຕໍ່ຄຳຕັກເຕືອນວ່າກ່າວຈາກສະຫວັນ, ເວລາທີ່ເສຍໄປລ້າໆ, ໂອກາດທີ່ບໍ່ໄດ້ໃຊ້ໃຫ້ເປັນປະໂຫຍດ ແລະ ການກະທຳທີ່ສົ່ງຜົນດີ ຫຼື ຜົນຮ້າຍຕໍ່ຄົນອື່ນ ເຊິ່ງມີຜົນສະທ້ອນອັນກວ້າງໄກ. {GC 482.1}
ພຣະບັນຍັດຂອງພຣະເຈົ້າເປັນມາດຕະຖານທີ່ຈະໃຊ້ໃນການພິພາກສາເພື່ອທົດສອບອຸປະນິໄສ ແລະ ຊີວິດຂອງມະນຸດ. ກະສັດໂຊໂລໂມນກ່າວວ່າ: “ຈົ່ງຢ້ານຢຳພຣະເຈົ້າ ແລະ ຈົ່ງຖືຮັກສາຄຳສັ່ງທັງຫຼາຍຂອງພຣະອົງ, ເຫດວ່າການນີ້ເປັນສັບພະທຸກສິ່ງແກ່ມະນຸດ, ເຫດວ່າພຣະເຈົ້າຈະຕັດສິນກິດຈະການທຸກປະການ.” (ປັນຍາຈານ 12:13, 14 ສະບັບລາວບູຮານ). ອັກຄະສາວົກຢາໂກໂບເຕືອນພວກພີ່ນ້ອງຂອງເພິ່ນວ່າ: “ເຈົ້າທັງຫຼາຍຈົ່ງເວົ້າ ແລະ ເຮັດເໝືອນຢ່າງຄົນທີ່ກຳລັງຈະໄດ້ຮັບການພິພາກສາດ້ວຍກົດທີ່ໃຫ້ມີເສລີພາບ.” (ຢາໂກໂບ 2:12). {GC 482.2}
ໃນການພິພາກສານັ້ນ “ຄົນທີ່ຖືວ່າສົມຄວນ” ຈະໄດ້ມີສ່ວນໃນການຟື້ນຄືນຊີວິດຂອງຜູ້ຊອບທຳ. ພຣະເຢຊູຊົງກ່າວວ່າ: “ຄົນທີ່ຖືວ່າສົມຄວນ ມີສ່ວນໃນຍຸກທີ່ຈະມາເຖິງ ແລະ ໃນການເປັນຄືນມາຈາກຕາຍນັ້ນ,…ພວກເຂົາຈະເປັນເໝືອນເທວະດາທີ່ຕາຍບໍ່ເປັນ. ພວກເຂົາເປັນລູກຂອງພຣະເຈົ້າ ເພາະພວກເຂົາເປັນລູກແຫ່ງການເປັນຄືນມາຈາກຕາຍ.” (ລູກາ 20:35, 36 LCV). ພຣະອົງຊົງປະກາດອີກວ່າ “ຜູ້ທີ່ເຮັດດີກໍຈະເປັນຄືນມາສູ່ຊີວິດ.” (ໂຢຮັນ 5:29 LCV). ຜູ້ຊອບທຳທີ່ລ່ວງລັບໄປແລ້ວຈະບໍ່ເປັນຄືນມາ ຈົນກວ່າຈະມີການພິພາກສາທີ່ປະກາດວ່າ ພວກເຂົາສົມຄວນໄດ້ຮັບ “ການເປັນຄືນມາສູ່ຊີວິດ.” ສະນັ້ນ, ພວກເຂົາຈະບໍ່ໄດ້ປາກົດຕົວຢູ່ທີ່ບັນລັງພິພາກສາ ໃນເວລາທີ່ມີການກວດສອບການບັນທຶກ ແລະ ຕັດສິນຄະດີຂອງພວກເຂົາ. {GC 482.3}
ພຣະເຢຊູຈະປາກົດໃນຖານະ ຜູ້ວິງວອນແທນພວກເຂົາຕໍ່ພຣະພັກພຣະເຈົ້າ. “ຖ້າຜູ້ໃດເຮັດບາບ ພວກເຮົາກໍມີຜູ້ແກ້ຄວາມຕໍ່ພຣະບິດາເຈົ້າ ຄືພຣະເຢຊູຄຣິສເຈົ້າ ອົງຜູ້ຊອບທຳ.” (1 ໂຢຮັນ 2:1 LCV). “ເພາະພຣະຄຣິສເຈົ້າບໍ່ໄດ້ເຂົ້າສູ່ສະຖານນະມັດສະການທີ່ມະນຸດສ້າງຂຶ້ນ ເຊິ່ງເປັນພຽງແບບຈຳລອງມາຈາກຂອງແທ້, ພຣະອົງເຂົ້າສູ່ສະຫວັນໂດຍກົງ, ບັດນີ້ ໄດ້ປາກົດຢູ່ຕໍ່ໜ້າພຣະເຈົ້າເພື່ອພວກເຮົາທັງຫຼາຍ.” “ເຫດສະນັ້ນ, ພຣະອົງຈຶ່ງສາມາດຊ່ວຍບັນດາຜູ້ທີ່ມາຫາພຣະເຈົ້າໂດຍທາງພຣະອົງໄດ້ຢ່າງສົມບູນ ເພາະພຣະອົງມີຊີວິດຢູ່ ເພື່ອຈະອ້ອນວອນເພື່ອພວກເຂົາສະເໝີ.” (ເຮັບເຣີ 9:24 LCV; 7:25 LCV). {GC 482.4}
ເມື່ອເປີດປຶ້ມບັນທຶກໃນການພິພາກສາ, ຊີວິດຂອງທຸກຄົນທີ່ເຄີຍມີຄວາມເຊື່ອໃນພຣະເຢຊູ ຈະຖືກທົບທວນຕໍ່ພຣະພັກພຣະເຈົ້າ. ພຣະເຢຊູຊົງເຮັດໜ້າທີ່ຜູ້ອ້ອນວອນເພື່ອເຮົາ ຊົງນຳສະເໜີຄະດີຂອງທຸກຊົ່ວອາຍຸຄົນຕາມລຳດັບ ຕັ້ງແຕ່ສະໄໝເລີ່ມຕົ້ນ ຈົນປິດທ້າຍກັບຜູ້ທີ່ຍັງມີຊີວິດຢູ່. ມີການກວດສອບທຸກຊື່ ແລະ ມີການພິຈາລະນາທຸກຄະດີຢ່າງຖີ່ຖ້ວນ. ບາງຄົນຖືກຍອມຮັບ, ບາງຄົນຖືກປະຕິເສດ. ຖ້າຜູ້ໃດມີຄວາມບາບທີ່ຍັງຢູ່ໃນປຶ້ມບັນທຶກເຫຼົ່ານັ້ນ ໂດຍຍັງບໍ່ໄດ້ປະຖິ້ມ ແລະ ຍັງບໍ່ໄດ້ຮັບການອະໄພ, ຊື່ຂອງຜູ້ນັ້ນຈະຖືກລຶບອອກຈາກທະບຽນແຫ່ງຊີວິດ ແລະ ການກະທຳດີຂອງລາວ ຈະຖືກລຶບອອກຈາກໜັງສືທີ່ລະລຶກຂອງພຣະເຈົ້າ. ພຣະຜູ້ເປັນເຈົ້າຊົງກ່າວກັບໂມເຊວ່າ: “ຜູ້ໃດເຮັດບາບຕໍ່ສູ້ເຮົາ ເຮົາຈະລຶບຊື່ຜູ້ນັ້ນອອກຈາກປຶ້ມບັນຊີຂອງເຮົາ.” (ອົບພະຍົບ 32:33). ສ່ວນຜູ້ເຜີຍພຣະທຳເອເຊກຽນກ່າວວ່າ: “ຖ້າຄົນຊອບທຳຜູ້ໜຶ່ງເຊົາເຮັດການດີ ແລະ ເລີ່ມເຮັດແຕ່ການຊົ່ວ…ການດີທີ່ລາວໄດ້ເຮັດມານັ້ນ ຈະບໍ່ມີຜູ້ໃດລະນຶກເຖິງເລີຍ.” (ເອເຊກຽນ 18:24). {GC 483.1}
ທຸກຄົນທີ່ໄດ້ກັບໃຈຈາກຄວາມບາບຢ່າງແທ້ຈິງ ແລະ ຮັບເຊື່ອວ່າ ພຣະໂລຫິດຂອງພຣະຄຣິສເປັນເຄື່ອງບູຊາໄຖ່ບາບຂອງຕົນ ໄດ້ຮັບຄຳວ່າ “ອະໄພ” ຈົດໄວ້ຄຽງຂ້າງຊື່ຂອງຕົນໃນປຶ້ມບັນທຶກແຫ່ງສະຫວັນ. ເມື່ອພວກເຂົາມີສ່ວນຮ່ວມໃນຄວາມຊອບທຳຂອງພຣະຄຣິສ ແລະ ມີອຸປະນິໄສສອດຄ່ອງກັບພຣະບັນຍັດຂອງພຣະເຈົ້າ, ບາບຂອງພວກເຂົາກໍຈະຖືກລຶບລ້າງອອກໄປ ແລະ ພຣະເຈົ້າຈະຖືວ່າພວກເຂົາສົມຄວນໄດ້ຮັບຊີວິດນິຣັນ. ອົງພຣະຜູ້ເປັນເຈົ້າຊົງປະກາດ ໂດຍຜ່ານຜູ້ເຜີຍພຣະທຳເອຊາຢາວ່າ: “ເຮົາຄືພຣະອົງນັ້ນ ຜູ້ລຶບລ້າງການລະເມີດຂອງເຈົ້າ ດ້ວຍເຫັນແກ່ເຮົາເອງ; ແລະເຮົາຈະບໍ່ຈົດຈຳບາບທັງຫຼາຍຂອງເຈົ້າໄວ້.” (ເອຊາຢາ 43:25 ດັດແປງຈາກສະບັບ TKJV). ພຣະເຢຊູຊົງກ່າວວ່າ: “ຜູ້ທີ່ມີໄຊຊະນະ ຜູ້ນັ້ນຈະໄດ້ຫົ່ມເຄື່ອງຂາວ ແລະ ເຮົາຈະບໍ່ລຶບຊື່ຂອງຜູ້ນັ້ນອອກຈາກທະບຽນແຫ່ງຊີວິດ, ແຕ່ເຮົາຈະຮັບຮອງຊື່ຜູ້ນັ້ນຊ້ອງພຣະພັກພຣະບິດາເຈົ້າຂອງເຮົາ ແລະ ຕໍ່ໜ້າຝູງເທວະດາຂອງພຣະອົງ.” “ຜູ້ໃດກໍຕາມຍອມຮັບເຮົາຕໍ່ໜ້າມະນຸດ, ເຮົາກໍຈະຍອມຮັບຜູ້ນັ້ນ ຕໍ່ໜ້າພຣະບິດາເຈົ້າຂອງເຮົາໃນສະຫວັນເໝືອນກັນ. ແຕ່ຜູ້ໃດທີ່ປະຕິເສດເຮົາຕໍ່ໜ້າມະນຸດ, ເຮົາກໍຈະປະຕິເສດຜູ້ນັ້ນ ຕໍ່ໜ້າພຣະບິດາເຈົ້າຂອງເຮົາໃນສະຫວັນ.” (ພຣະນິມິດ 3:5; ມັດທາຍ 10:32, 33 LCV). {GC 483.2}
ເຖິງແມ່ນວ່າ ມະນຸດຈະສົນໃຈການຕັດສິນຂອງສານຫຼາຍປານໃດກໍຕາມ ກໍຍັງທຽບບໍ່ໄດ້ກັບຄວາມສົນໃຈຂອງເຫຼົ່າທູດສະຫວັນ ເມື່ອລາຍຊື່ທີ່ບັນທຶກໄວ້ໃນໜັງສືແຫ່ງຊີວິດຖືກນຳມາທົບທວນຕໍ່ໜ້າພຣະພັກຂອງພຣະເຈົ້າ. ພຣະເຢຊູຊົງຂໍໃຫ້ທຸກຄົນທີ່ມີໄຊຊະນະໂດຍຄວາມເຊື່ອໃນພຣະໂລຫິດຂອງພຣະອົງນັ້ນ ໄດ້ຮັບການອະໄພການລະເມີດຂອງພວກເຂົາ, ໃຫ້ພວກເຂົາໄດ້ຮັບການຟື້ນຟູຄືນສູ່ບ້ານເດີມໃນສວນເອເດນ ແລະ ໄດ້ສວມມົງກຸດເປັນຜູ້ຮັບມໍລະດົກຮ່ວມກັນກັບພຣະອົງໃນ “ອານາຈັກດັ້ງເດີມ” (ມີກາ 4:8 THSV). ເຖິງແມ່ນວ່າຊາຕານພະຍາຍາມຫຼອກລວງ ແລະ ລໍ້ລວງມະນຸດຊາດ ເພື່ອຂັດຂວາງແຜນການຂອງພຣະເຈົ້າໃນການສ້າງມະນຸດກໍຕາມ; ແຕ່ບັດນີ້ພຣະຄຣິສຊົງຂໍຮ້ອງໃຫ້ແຜນການດັ້ງເດີມນັ້ນສຳເລັດ ສະເໝືອນໜຶ່ງວ່າມະນຸດບໍ່ເຄີຍລົ້ມລົງໃນຄວາມບາບ. ສຳລັບໄພ່ພົນຂອງພຣະອົງແລ້ວ ພຣະອົງບໍ່ພຽງແຕ່ຂໍໃຫ້ພວກເຂົາໄດ້ຮັບການອະໄພ ແລະ ຄວາມຊອບທຳຢ່າງຄົບຖ້ວນເທົ່ານັ້ນ, ແຕ່ຍັງຂໍໃຫ້ພວກເຂົາມີສ່ວນໃນພຣະຣັດສະໝີພາບຂອງພຣະອົງ ແລະ ຮ່ວມນັ່ງເທິງບັນລັງກັບພຣະອົງອີກດ້ວຍ. {GC 483.3}
ໃນຂະນະທີ່ພຣະເຢຊູກຳລັງອ້ອນວອນເພື່ອຜູ້ທີ່ໄດ້ຮັບພຣະຄຸນຂອງພຣະອົງ, ຊາຕານກໍກ່າວຫາພວກເຂົາຕໍ່ພຣະພັກພຣະເຈົ້າ ວ່າເປັນຜູ້ລະເມີດພຣະບັນຍັດ. ມັນໄດ້ພະຍາຍາມຊັກນຳຄົນຂອງພຣະອົງໃຫ້ສົງໄສ ແລະ ເຮັດໃຫ້ພວກເຂົາສູນເສຍຄວາມໝັ້ນໃຈໃນພຣະເຈົ້າ. ມັນພະຍາຍາມແຍກພວກເຂົາອອກຈາກຄວາມຮັກຂອງພຣະອົງ ແລະ ຊັກນຳພວກເຂົາໃຫ້ລ່ວງລະເມີດພຣະບັນຍັດຂອງພຣະອົງ. ບັດນີ້, ມັນຊີ້ໃສ່ປຶ້ມທີ່ບັນທຶກຊີວິດຂອງຄົນເຫຼົ່ານີ້ ແລະ ອ້າງວ່າພວກເຂົາເປັນຂອງມັນ ຍ້ອນຄວາມບົກຜ່ອງໃນຕົວຕົນ, ຍ້ອນການກະທຳທີ່ບໍ່ເໝືອນພຣະຄຣິສ ທີ່ໄດ້ສ້າງຄວາມອັບອາຍໃຫ້ແກ່ພຣະຜູ້ໄຖ່ຂອງພວກເຂົາ, ແລະຍ້ອນຄວາມບາບທັງໝົດທີ່ມັນໄດ້ລໍ້ລວງໃຫ້ພວກເຂົາເຮັດ. {GC 484.1}
ພຣະເຢຊູບໍ່ໄດ້ແກ້ຕົວໃຫ້ກັບຄວາມຜິດບາບຂອງຄົນເຫຼົ່ານີ້, ແຕ່ພຣະອົງຊົງຊີ້ໃຫ້ເຫັນການກັບໃຈໃໝ່ ແລະ ຄວາມເຊື່ອຂອງພວກເຂົາ. ເມື່ອຂໍການອະໄພໃຫ້ແກ່ພວກເຂົາ ພຣະອົງຊົງຍົກພຣະຫັດທີ່ມີຮອຍບາດແຜຂຶ້ນຕໍ່ພຣະພັກພຣະບິດາ ແລະ ຕໍ່ໜ້າເຫຼົ່າທູດສະຫວັນໂດຍກ່າວວ່າ ‘ຂ້າພະເຈົ້າຮູ້ຈັກຊື່ຂອງຄົນເຫຼົ່ານີ້ ຍ້ອນວ່າໄດ້ຈາລຶກໄວ້ທີ່ຝ່າມືຂອງຂ້າພະເຈົ້າແລ້ວ’ ແລະຊົງກ່າວອີກວ່າ: “ເຄື່ອງບູຊາທີ່ພຣະເຈົ້າພໍພຣະໄທນັ້ນ ແມ່ນຈິດວິນຍານທີ່ຖ່ອມຕົວລົງ ພຣະເຈົ້າບໍ່ໄດ້ຊົງລັງກຽດຈິດໃຈທີ່ຖ່ອມຕົວລົງ ແລະ ການກັບໃຈໃໝ່ແທ້.” (ເພງສັນລະເສີນ 51:17). ພຣະອົງຊົງກ່າວຕໍ່ຊາຕານຜູ້ກ່າວຫາໄພ່ພົນຂອງພຣະອົງວ່າ: “ມານຊາຕານເອີຍ ຂໍໃຫ້ພຣະເຈົ້າຢາເວລົງໂທດເຈົ້າເຖີດ ຂໍໃຫ້ພຣະເຈົ້າຢາເວ ອົງຊົງຮັກນະຄອນເຢຣູຊາເລັມ ລົງໂທດເຈົ້າ. ຊາຍຄົນນີ້ເປັນດັ່ງດົ້ນຟືນທີ່ມີໄຟລຸກໄໝ້ຢູ່.” (ເຊກາຣີຢາ 3:2). ພຣະຄຣິສຈະຊົງຫຸ້ມຫໍ່ຜູ້ທີ່ສັດຊື່ຂອງພຣະອົງດ້ວຍຄວາມຊອບທຳຂອງພຣະອົງເອງ ເພື່ອພຣະອົງຈະນຳພວກເຂົາມາຢູ່ຕໍ່ພຣະພັກພຣະບິດາເປັນ “ຄຣິສຕະຈັກທີ່ສະຫງ່າງາມ, ປາສະຈາກຮອຍດ່າງ ຫຼື ຮອຍຫຍໍ່ ຫຼື ຕຳໜິໃດໆ.” (ເອເຟໂຊ 5:27 LCV). ຊື່ຂອງພວກເຂົາຖືກບັນທຶກໄວ້ໃນໜັງສືແຫ່ງຊີວິດ ແລະ ມີຖ້ອຍຄຳຂຽນໄວ້ກ່ຽວກັບພວກເຂົາວ່າ: “ພວກເຂົາຈະຍ່າງໄປກັບເຮົາ, ນຸ່ງຊຸດສີຂາວ, ເພາະພວກເຂົາສົມຄວນແລ້ວ.” (ພຣະນິມິດ 3:4 LCV). {GC 484.2}
ດ້ວຍເຫດນີ້, ພັນທະສັນຍາໃໝ່ຈະສຳເລັດຢ່າງຄົບຖ້ວນ ຕາມທີ່ພຣະອົງຊົງສັນຍາໄວ້ວ່າ: “ເຮົາຈະອະໄພການບາບຂອງພວກເຂົາ ແລະ ເຮົາຈະບໍ່ຈົດຈຳຄວາມຜິດຂອງພວກເຂົາອີກຕໍ່ໄປ.” “‘ເມື່ອເວລານັ້ນມາເຖິງ ຈະບໍ່ພົບການບາບໃນອິດສະຣາເອນ ແລະ ຄວາມຜິດໃນຢູດາ…’ ພຣະເຈົ້າຢາເວກ່າວດັ່ງນີ້ແຫຼະ.” (ເຢເຣມີຢາ 31:34; 50:20). “ໃນວັນນັ້ນ ຍອດກິ່ງຂອງພຣະເຢໂຮວາຈະງົດງາມ ແລະ ມີສະຫງ່າຣາສີ ແລະ ຜົນຜະລິດຂອງແຜ່ນດິນຈະອຸດົມສົມບູນ ແລະ ສວຍສົດງົດງາມສຳລັບຊາວອິດສະຣາເອນທັງຫຼາຍທີ່ໜີລອດປອດໄພ, ແລ້ວຜູ້ທີ່ຍັງເຫຼືອຢູ່ໃນຊີໂອນ ແລະ ຜູ້ທີ່ຍັງຢູ່ໃນເຢຣູຊາເລັມຈະຖືກເອີ້ນວ່າຜູ້ບໍຣິສຸດ ກໍຄືທຸກຄົນທີ່ມີການຈົດບັນທຶກໄວ້ທ່າມກາງເຫຼົ່າຜູ້ມີຊີວິດໃນເຢຣູຊາເລັມ.” (ເອຊາຢາ 4:2, 3 ແປຈາກສະບັບ KJV). {GC 485.1}
ວຽກງານການພິພາກສາແບບສືບສວນ ແລະ ການລຶບລ້າງບາບ ຈະຕ້ອງສຳເລັດກ່ອນການສະເດັດມາຄັ້ງທີສອງຂອງພຣະຄຣິສ. ຄົນຕາຍຈະຖືກພິພາກສາຕາມສິ່ງທີ່ບັນທຶກໄວ້ໃນໜັງສື; ສະນັ້ນ, ບາບຂອງມະນຸດຈະຖືກລຶບລ້າງໄດ້ ກໍຕໍ່ເມື່ອການສືບສວນຄະດີຂອງພວກເຂົາສິ້ນສຸດລົງເທົ່ານັ້ນ. ແຕ່ອັກຄະສາວົກເປໂຕໄດ້ກ່າວໄວ້ຢ່າງຈະແຈ້ງວ່າ ບາບຂອງຜູ້ທີ່ເຊື່ອຈະຖືກລຶບລ້າງໃນ “ວາລະແຫ່ງການຟື້ນໃຈ” ທີ່ມາຈາກອົງພຣະຜູ້ເປັນເຈົ້າ ແລະ ພຣະອົງຈະໄດ້ຊົງສົ່ງພຣະເຢຊູມາ. (ກິດຈະການ 3:19, 20 TNCV). ເມື່ອການພິພາກສາແບບສືບສວນສິ້ນສຸດລົງ, ພຣະຄຣິສຈະສະເດັດມາ ພ້ອມກັບບຳເໜັດລາງວັນ ເພື່ອມອບໃຫ້ແຕ່ລະຄົນຕາມການກະທຳຂອງເຂົາ. {GC 485.2}
ໃນພິທີອັນເປັນສັນຍະລັກທີ່ເຮັດຢູ່ໃນຫໍເຕັນສັກສິດນັ້ນ ຫຼັງຈາກມະຫາປະໂຣຫິດໄດ້ລຶບລ້າງບາບໃຫ້ແກ່ຊາວອິດສະຣາເອນແລ້ວ ເພິ່ນກໍໄດ້ອອກມາອວຍພອນປະຊາຊົນ. ໃນທຳນອງດຽວກັນ, ເມື່ອພຣະຄຣິສສິ້ນສຸດວຽກງານການເປັນຄົນກາງ, ພຣະອົງຈະປາກົດ “ບໍ່ແມ່ນເພື່ອຮັບແບກຄວາມບາບ ແຕ່ເພື່ອນຳເອົາຄວາມພົ້ນມາສູ່ບັນດາຜູ້ທີ່ລໍຄອຍພຣະອົງ.” (ເຮັບເຣີ 9:28). ໃນເວລານັ້ນ, ພຣະເຢຊູຈະປະທານຊີວິດນິຣັນໃຫ້ແກ່ປະຊາກອນຂອງພຣະອົງທີ່ລໍຄອຍພຣະອົງ. ເຊັ່ນດຽວກັບປະໂຣຫິດທີ່ໄດ້ເອົາບາບອອກຈາກສະຖານນະມັດສະການ ແລະ ວາງມັນໃສ່ຫົວຂອງແບ້ຮັບບາບ ໂດຍການສາລະພາບບາບເຫຼົ່ານັ້ນ, ພຣະຄຣິສກໍຈະໃຫ້ຊາຕານຮັບຜິດຊອບຕໍ່ບາບທັງໝົດ ເພາະມັນເປັນຕົ້ນເຫດຂອງຄວາມບາບ ແລະ ເປັນຜູ້ຍົວະໃຫ້ຄົນເຮັດບາບ. ໃນສະໄໝພຣະຄຳພີເດີມ, ແບ້ຮັບບາບຈະແບກບາບຂອງຊາວອິດສະຣາເອນອອກໄປສູ່ “ຖິ່ນເປົ່າປ່ຽວ.” (ລະບຽບພວກເລວີ 16:22). ໃນທຳນອງດຽວກັນ, ຊາຕານຈະຕ້ອງແບກຮັບເອົາຄວາມຜິດບາບທັງປວງທີ່ມັນໄດ້ຍົວະໃຫ້ໄພ່ພົນຂອງພຣະເຈົ້າກະທຳ. ມັນຈະຖືກກັກຂັງໄວ້ໃນໂລກທີ່ຮົກຮ້າງເປົ່າປ່ຽວປາສະຈາກຜູ້ຄົນອາໄສເປັນເວລາໜຶ່ງພັນປີ. ແລ້ວໃນທີ່ສຸດມັນຈະໄດ້ຮັບໂທດຢ່າງຄົບຖ້ວນຂອງຄວາມບາບ ໃນໄຟທີ່ຈະທຳລາຍຄົນຊົ່ວທັງປວງ. ດັ່ງນັ້ນ, ແຜນການໄຖ່ອັນຍິ່ງໃຫຍ່ ຈະບັນລຸຜົນສຳເລັດໃນການລຶບລ້າງຄວາມບາບຄັ້ງສຸດທ້າຍ ແລະ ການຊ່ວຍກູ້ທຸກຄົນທີ່ເຕັມໃຈປະຕິເສດຄວາມຊົ່ວ. {GC 485.3}
ພຣະເຈົ້າຊົງກຳນົດເວລາໄວ້ສຳລັບການພິພາກສາ ຄືເມື່ອໄລຍະເວລາ 2,300 ວັນສິ້ນສຸດລົງໃນປີ 1844; ໃນເວລານັ້ນ, ການພິພາກສາແບບສືບສວນ ແລະ ການລຶບລ້າງບາບໄດ້ເລີ່ມຕົ້ນຂຶ້ນ. ທຸກຄົນທີ່ເຄີຍຮັບເອົາພຣະນາມຂອງພຣະຄຣິສ ຕ້ອງຜ່ານການກວດສອບຢ່າງລະອຽດນີ້. ທັງຄົນເປັນ ແລະ ຄົນຕາຍຈະຖືກພິພາກສາ “ຕາມການກະທຳທີ່ພວກເຂົາໄດ້ເຮັດ ຕາມທີ່ໄດ້ບັນທຶກໄວ້ໃນໜັງສືເຫຼົ່ານັ້ນ.” (ພຣະນິມິດ 20:12 LCV). {GC 486.1}
ຄວາມບາບທີ່ຍັງບໍ່ທັນໄດ້ສາລະພາບ ແລະ ປະຖິ້ມນັ້ນຈະບໍ່ໄດ້ຮັບການໃຫ້ອະໄພ ແລະ ຈະບໍ່ຖືກລຶບອອກຈາກປຶ້ມບັນທຶກ. ບາບເຫຼົ່ານັ້ນ ຈະເປັນຫຼັກຖານກ່າວໂທດຄົນບາບໃນວັນສຳຄັນຂອງອົງພຣະຜູ້ເປັນເຈົ້າ. ບໍ່ວ່າຄົນຈະເຮັດຊົ່ວໃນຕອນກາງເວັນ ຫຼື ໃນຄວາມມືດຂອງກາງຄືນ ແຕ່ການກະທຳທັງໝົດກໍຍັງເປີດເຜີຍ ແລະ ປະຈັກແຈ້ງຕໍ່ພຣະພັກຂອງພຣະອົງຜູ້ທີ່ພວກເຮົາຕ້ອງໃຫ້ການນັ້ນ. ທູດສະຫວັນໄດ້ເຫັນການບາບທຸກຢ່າງ ແລະ ໄດ້ບັນທຶກໄວ້ໃນການບັນທຶກທີ່ບໍ່ມີຄວາມຜິດພາດ. ຄວາມບາບອາດຖືກປົກປິດ, ອາດຖືກປະຕິເສດ ຫຼື ເຊື່ອງຊ່ອນຈາກພໍ່ແມ່, ລູກເມຍ ແລະ ໝູ່ເພື່ອນ. ອາດມີພຽງແຕ່ຜູ້ກະທຳຜິດເທົ່ານັ້ນ ທີ່ຮູ້ເຖິງຄວາມຊົ່ວທີ່ລາວເຮັດ ແຕ່ມັນຖືກເປີດເຜີຍຢ່າງຈະແຈ້ງຕໍ່ໜ້າຊາວສະຫວັນ. ບໍ່ວ່າຈະເປັນຄວາມມືດຂອງຄ່ຳຄືນທີ່ມືດມິດທີ່ສຸດ ຫຼື ການຫຼອກລວງໃນຮູບແບບໃດໆ ກໍບໍ່ສາມາດປິດບັງແມ່ນແຕ່ຄວາມຄິດດຽວຈາກພຣະເຈົ້າອົງນິຣັນ. ພຣະເຈົ້າມີການບັນທຶກທີ່ລະອຽດຖີ່ຖ້ວນກ່ຽວກັບທຸກການກະທຳທີ່ບໍ່ຍຸຕິທຳ ແລະ ການເຮັດທຸລະກິດທີ່ບໍ່ສັດຊື່ທຸກຢ່າງ. ທ່າທາງທີ່ເຄັ່ງສາສະໜາ ກໍບໍ່ສາມາດຫຼອກລວງພຣະອົງໄດ້ ແລະ ການທີ່ພຣະອົງຊົງປະເມີນອຸປະນິໄສຂອງມະນຸດ ກໍບໍ່ເຄີຍຜິດພາດ. ມະນຸດອາດຖືກຫຼອກລວງໂດຍຜູ້ທີ່ມີໃຈເສື່ອມຊາມ ແຕ່ພຣະເຈົ້າເຫັນຜ່ານການແອບແຝງປອມແປງທຸກຢ່າງ ແລະ ຊົງຮູ້ເຖິງຊີວິດພາຍໃນໃຈທັງສິ້ນ. {GC 486.2}
ສິ່ງເຫຼົ່ານີ້ຊ່າງເປັນເລື່ອງທີ່ໜ້າຄິດແທ້ໆ! ທຸກມື້ທີ່ຜ່ານໄປ ບໍ່ມີວັນກັບຄືນມາໄດ້ຕະຫຼອດການ ແລະ ແຕ່ລະມື້ນັ້ນມີການຈົດໄວ້ໃນປຶ້ມບັນທຶກແຫ່ງສະຫວັນ. ຖ້ອຍຄຳທີ່ກ່າວຈາ ແລະ ການກະທຳທີ່ເຮັດໄປແລ້ວ ບໍ່ສາມາດຮຽກຄືນມາໄດ້. ທູດສະຫວັນໄດ້ບັນທຶກທັງຄວາມດີ ແລະ ຄວາມຊົ່ວ. ແມ່ນແຕ່ນັກສູ້ຜູ້ພິຊິດທີ່ຍິ່ງໃຫຍ່ທີ່ສຸດໃນໂລກ ກໍບໍ່ສາມາດຮຽກເອົາການບັນທຶກຂອງພຽງມື້ດຽວໃຫ້ກັບຄືນມາໄດ້. ການກະທຳ, ຄຳເວົ້າຈາ, ແມ່ນແຕ່ຄວາມຕັ້ງໃຈອັນເປັນຄວາມລັບທີ່ສຸດຂອງພວກເຮົາ, ລ້ວນແຕ່ມີນ້ຳໜັກໃນການຕັດສິນຊະຕາກຳວ່າ ເຮົາຈະໄດ້ຮັບພຣະພອນ ຫຼື ຈະຖືກລົງໂທດ. ເຖິງແມ່ນວ່າພວກເຮົາອາດລືມໄປແລ້ວ, ແຕ່ສິ່ງເຫຼົ່ານີ້ຈະເປັນຫຼັກຖານສະໜັບສະໜູນ ຫຼື ກ່າວໂທດພວກເຮົາ. {GC 486.3}
ຮູບຖ່າຍສະແດງໃຫ້ເຫັນໃບໜ້າຢ່າງຈະແຈ້ງຄົບຖ້ວນສັນໃດ, ອຸປະນິໄສຂອງມະນຸດ ກໍຖືກຈົດໄວ້ຢ່າງລະອຽດໃນປຶ້ມບັນທຶກເບື້ອງເທິງສັນນັ້ນ. ແຕ່ໜ້າເສຍດາຍທີ່ຄົນພັດບໍ່ຄ່ອຍສົນໃຈກ່ຽວກັບການບັນທຶກທີ່ຈະຖືກເປີດເຜີຍຕໍ່ໜ້າຊາວສະຫວັນ. ຖ້າຜ້າກັ້ງລະຫວ່າງໂລກທີ່ເຫັນໄດ້ ກັບໂລກທີ່ເບິ່ງບໍ່ເຫັນຖືກເປີດອອກ ແລະ ມະນຸດໄດ້ເຫັນທູດສະຫວັນກຳລັງບັນທຶກທຸກຄຳເວົ້າ ແລະ ການກະທຳທີ່ພວກເຂົາຈະຕ້ອງພົບອີກໃນການພິພາກສາ, ຫຼາຍຄົນຄົງຈະລະມັດລະວັງໃນການເວົ້າຈາ ແລະ ຄິດໃຫ້ດີກ່ອນຈະເຮັດສິ່ງໃດ. {GC 487.1}
ໃນການພິພາກສາ ພຣະເຈົ້າຈະກວດເບິ່ງວ່າ ພວກເຮົາໄດ້ນຳໃຊ້ຂອງປະທານແຕ່ລະຢ່າງແນວໃດ. ພວກເຮົາໄດ້ໃຊ້ຄວາມສາມາດທີ່ສະຫວັນມອບໃຫ້ແນວໃດ? ເມື່ອອົງພຣະຜູ້ເປັນເຈົ້າສະເດັດມາ ພຣະອົງຈະເຫັນວ່າພວກເຮົາໄດ້ເພີ່ມພູນສິ່ງທີ່ພຣະອົງຊົງມອບໃຫ້ຫຼືບໍ່? ພວກເຮົາໄດ້ພັດທະນາຄວາມສາມາດທີ່ພຣະອົງມອບໃຫ້ແກ່ເຮົາໃນດ້ານຮ່າງກາຍ, ຈິດໃຈ ແລະ ສະຕິປັນຍາ ເພື່ອຖວາຍກຽດແດ່ພຣະເຈົ້າ ແລະ ເປັນພອນໃຫ້ແກ່ເພື່ອນມະນຸດບໍ? ພວກເຮົາໄດ້ໃຊ້ເວລາ, ຄວາມສາມາດໃນການເວົ້າ ແລະ ການຂຽນ, ຊັບສິນ ແລະ ອິດທິພົນຂອງພວກເຮົາແນວໃດ? ພວກເຮົາໄດ້ເຮັດຫຍັງແດ່ເພື່ອຮັບໃຊ້ພຣະຄຣິສ ໂດຍຜ່ານການຊ່ວຍເຫຼືອຄົນທຸກຍາກ, ຄົນເຈັບປ່ວຍ, ລູກກຳພ້າ ຫຼື ແມ່ໝ້າຍ? ພຣະເຈົ້າຊົງມອບໝາຍໃຫ້ພວກເຮົາຮັບຜິດຊອບການຖ່າຍທອດພຣະຄຳອັນສັກສິດຂອງພຣະອົງ; ພວກເຮົາໄດ້ເຮັດແນວໃດກັບຄວາມສະຫວ່າງ ແລະ ຄວາມຈິງທີ່ພຣະອົງປະທານໃຫ້ ເພື່ອນຳພາຄົນໄປສູ່ຄວາມລອດພົ້ນ? ການອ້າງວ່າເຊື່ອໃນພຣະຄຣິສພຽງແຕ່ປາກເປົ່າ ບໍ່ມີຄຸນຄ່າຫຍັງ. ມີແຕ່ຄວາມຮັກທີ່ສະແດງອອກມາດ້ວຍການກະທຳເທົ່ານັ້ນທີ່ແທ້ຈິງ. ສຳລັບສະຫວັນແລ້ວ ມີແຕ່ຄວາມຮັກເທົ່ານັ້ນທີ່ເຮັດໃຫ້ການກະທຳມີຄຸນຄ່າ. ສິ່ງໃດກໍຕາມທີ່ເຮັດດ້ວຍຄວາມຮັກ, ເຖິງວ່າຈະເບິ່ງເປັນເລື່ອງເລັກນ້ອຍໃນສາຍຕາຂອງມະນຸດ, ພຣະເຈົ້າກໍຊົງຍອມຮັບ ແລະ ປະທານບຳເໜັດລາງວັນໃຫ້. {GC 487.2}
ຄວາມເຫັນແກ່ຕົວທີ່ຊ່ອນຢູ່ໃນຈິດໃຈຂອງມະນຸດ ຖືກເປີດເຜີຍຢູ່ໃນປຶ້ມບັນທຶກໃນສະຫວັນ. ປຶ້ມເຫຼົ່ານັ້ນໄດ້ບັນທຶກການລະເລີຍຕໍ່ໜ້າທີ່ ທີ່ບໍ່ໄດ້ປະຕິບັດຕໍ່ເພື່ອນມະນຸດ ແລະ ການລະເລີຍຕໍ່ສິ່ງທີ່ພຣະຜູ້ຊ່ວຍໃຫ້ລອດຊົງຮຽກຮ້ອງ. ໃນປຶ້ມເຫຼົ່ານັ້ນພວກເຂົາຈະເຫັນວ່າ ຕົນໄດ້ມອບເວລາ, ຄວາມຄິດ ແລະ ກຳລັງທີ່ຄວນເປັນຂອງພຣະຄຣິສ ໃຫ້ແກ່ຊາຕານຫຼາຍຄັ້ງຫຼາຍຫົນ. ການບັນທຶກທີ່ພວກທູດສະຫວັນນຳຂຶ້ນສະຫວັນນັ້ນ ເປັນເລື່ອງໜ້າເສົ້າໃຈ. ມະນຸດຜູ້ມີສະຕິປັນຍາ ທີ່ອ້າງວ່າເປັນຜູ້ຕິດຕາມພຣະຄຣິສ ກັບຫຼົງລະເລີງກັບການສະສົມຊັບສົມບັດຝ່າຍໂລກ ຫຼື ຄວາມສຸກຕາມແບບຊາວໂລກ. ພວກເຂົາໃຊ້ເງິນ, ເວລາ ແລະ ກຳລັງໄປກັບການອວດອ້າງ ແລະ ການເຮັດຕາມໃຈຕົນເອງ, ແຕ່ພັດອຸທິດເວລາໃຫ້ການອະທິຖານ, ການຄົ້ນຄວ້າພຣະຄຳພີ, ການຖ່ອມໃຈລົງ ແລະ ການສາລະພາບບາບພຽງເລັກໜ້ອຍ. {GC 487.3}
ຊາຕານຄິດຄົ້ນອຸບາຍອັນນັບບໍ່ຖ້ວນ ເພື່ອຄອບງຳຈິດໃຈຂອງພວກເຮົາ ບໍ່ໃຫ້ພວກເຮົາສົນໃຈກັບວຽກງານທີ່ສຳຄັນທີ່ສຸດ ທີ່ພວກເຮົາຄວນຈະຮູ້. ຈອມຫຼອກລວງກຽດຊັງຄວາມຈິງອັນຍິ່ງໃຫຍ່ ທີ່ກ່ຽວກັບການຖວາຍບູຊາເພື່ອລຶບລ້າງບາບ ແລະ ພຣະຄຣິສຜູ້ຊົງເປັນຄົນກາງທີ່ຊົງຣິດອຳນາດສູງສຸດ. ມັນຮູ້ວ່າຄວາມສຳເລັດຂອງມັນຂຶ້ນຢູ່ກັບການເຮັດໃຫ້ຈິດໃຈຂອງມະນຸດຫັນອອກຈາກພຣະເຢຊູ ແລະ ຄວາມຈິງຂອງພຣະອົງ. {GC 488.1}
ຜູ້ທີ່ຈະຮັບພຣະພອນຈາກການເປັນຄົນກາງຂອງພຣະຜູ້ຊ່ວຍໃຫ້ລອດ ບໍ່ຄວນປ່ອຍໃຫ້ສິ່ງໃດມາຂັດຂວາງໜ້າທີ່ຂອງຕົນທີ່ຈະ “ເຮັດໃຫ້ຄວາມບໍຣິສຸດສົມບູນ ປາກົດອອກມາຈາກຄວາມຢຳເກງພຣະເຈົ້າ.” (2 ໂກຣິນໂທ 7:1 LCV). ຄວນອຸທິດເວລາອັນມີຄ່ານັ້ນ ໃຫ້ແກ່ການສຶກສາພຣະຄຳແຫ່ງຄວາມຈິງດ້ວຍການອະທິຖານຢ່າງຈິງຈັງ ແທນທີ່ຈະໃຊ້ມັນໄປກັບຄວາມມ່ວນຊື່ນ, ການອວດອ້າງ ຫຼື ການຊອກຫາຜົນກຳໄລ. ປະຊາກອນຂອງພຣະເຈົ້າຕ້ອງເຂົ້າໃຈເລື່ອງສະຖານນະມັດສະການ ແລະ ການພິພາກສາແບບສືບສວນຢ່າງແຈ່ມແຈ້ງ. ທຸກຄົນຈຳເປັນຕ້ອງຮູ້ດ້ວຍຕົນເອງ ກ່ຽວກັບໜ້າທີ່ວຽກງານຂອງມະຫາປະໂຣຫິດຜູ້ຍິ່ງໃຫຍ່ຂອງພວກເຂົາ. ຖ້າບໍ່ດັ່ງນັ້ນ ພວກເຂົາຈະບໍ່ສາມາດມີຄວາມເຊື່ອທີ່ຈຳເປັນໃນຍຸກນີ້ ຫຼື ເຮັດໜ້າທີ່ຕາມພຣະປະສົງຂອງພຣະເຈົ້າ. ທຸກຄົນມີໜ້າທີ່ຮັບຜິດຊອບຕໍ່ຄວາມລອດພົ້ນ ຫຼື ຄວາມພິນາດຂອງຕົນເອງ. ແຕ່ລະຄົນມີຄະດີທີ່ລໍຖ້າການຕັດສິນຢູ່ໜ້າບັນລັງແຫ່ງການພິພາກສາຂອງພຣະເຈົ້າ. ທຸກຄົນຈະຕ້ອງຢືນຢູ່ຕໍ່ໜ້າພຣະພັກຂອງອົງຜູ້ພິພາກສາຍິ່ງໃຫຍ່. ສະນັ້ນ, ມັນຈຶ່ງສຳຄັນທີ່ສຸດທີ່ທຸກຄົນຈະຕ້ອງຄຳນຶງເຖິງເຫດການອັນໜ້າຢ້ານກົວຢູ່ເລື້ອຍໆ ເມື່ອການພິພາກສາເລີ່ມຂຶ້ນ ແລະ ໜັງສືຖືກເປີດອອກ, ຄືໃນຍຸກສຸດທ້າຍເມື່ອທຸກຄົນຈະຕ້ອງ “ຢືນຂຶ້ນໃນສ່ວນທີ່ກຳນົດໃຫ້” ນັ້ນ ເໝືອນກັບດານີເອນ. (ເບິ່ງ ດານີເອນ 12:13 TKJV). {GC 488.2}
ທຸກຄົນທີ່ໄດ້ຮັບຄວາມສະຫວ່າງໃນເລື່ອງເຫຼົ່ານີ້ ຕ້ອງເປັນພະຍານເຖິງຄວາມຈິງອັນຍິ່ງໃຫຍ່ ທີ່ພຣະເຈົ້າໄດ້ມອບໝາຍໄວ້ໃຫ້ພວກເຂົາ. ສະຖານນະມັດສະການໃນສະຫວັນ ເປັນສູນກາງຂອງວຽກງານທີ່ພຣະຄຣິສຊົງກະທຳເພື່ອມະນຸດ ແລະ ກ່ຽວຂ້ອງກັບທຸກຄົນທີ່ມີຊີວິດຢູ່ໃນໂລກ. ມັນເປີດເຜີຍແຜນການຊົງໄຖ່ຕັ້ງແຕ່ອະດີດຕະການ ຈົນເຖິງໂລກອະວະສານ ແລະ ສະແດງໃຫ້ເຫັນໄຊຊະນະໃນການຕໍ່ສູ້ລະຫວ່າງຄວາມຊອບທຳກັບຄວາມບາບ. ສິ່ງເຫຼົ່ານີ້ສຳຄັນຍິ່ງທີ່ທຸກຄົນຄວນສຶກສາຢ່າງເລິກເຊິ່ງ ເພື່ອຈະສາມາດອະທິບາຍເຫດຜົນແຫ່ງຄວາມຫວັງຂອງຕົນໃຫ້ແກ່ທຸກຄົນທີ່ຖາມ. {GC 488.3}
ການທີ່ພຣະຄຣິສຊົງອ້ອນວອນເພື່ອມະນຸດ ໃນສະຖານນະມັດສະການເບື້ອງເທິງ ສຳຄັນຕໍ່ແຜນການແຫ່ງຄວາມລອດເທົ່າກັບການສິ້ນພຣະຊົນຂອງພຣະອົງເທິງໄມ້ກາງແຂນ. ດ້ວຍການສິ້ນພຣະຊົນ ພຣະອົງໄດ້ເລີ່ມພາລະກິດ ເຊິ່ງຫຼັງຈາກການຟື້ນຄືນພຣະຊົນແລ້ວ ພຣະອົງໄດ້ສະເດັດຂຶ້ນໄປສະຫວັນເພື່ອເຮັດໃຫ້ສຳເລັດ. ພວກເຮົາຕ້ອງເຂົ້າໄປພາຍໃນຜ້າກັ້ງດ້ວຍຄວາມເຊື່ອ, “ທີ່ພຣະເຢຊູເຈົ້າຜູ້ຊົງນຳໜ້າ ໄດ້ສະເດັດເຂົ້າໄປກ່ອນແທນພວກເຮົາແລ້ວ.” (ເຮັບເຣີ 6:20). ແສງສະຫວ່າງຈາກໄມ້ກາງແຂນຂອງພຣະຄຣິສ ໄດ້ສະທ້ອນອອກມາຈາກສະຖານນະມັດສະການ. ຢູ່ບ່ອນນັ້ນ, ພວກເຮົາສາມາດເຂົ້າໃຈຢ່າງເລິກເຊິ່ງຂຶ້ນ ເຖິງຄວາມເລິກລັບແຫ່ງການຊົງໄຖ່. ສະຫວັນໄດ້ຈ່າຍລາຄາສູງເກີນທີ່ຈະປະເມີນໄດ້ ເພື່ອຄວາມລອດພົ້ນຂອງມະນຸດ; ການເສຍສະຫຼະຂອງພຣະອົງພຽງພໍກັບຂໍ້ຮຽກຮ້ອງອັນກວ້າງຂວາງທີ່ສຸດຂອງພຣະບັນຍັດຂອງພຣະເຈົ້າທີ່ຖືກລະເມີດ. ພຣະເຢຊູໄດ້ເປີດທາງໄປສູ່ບັນລັງຂອງພຣະບິດາ, ແລະໂດຍຜ່ານການເປັນຄົນກາງຂອງພຣະອົງ ຄວາມປາຖະໜາອັນຈິງໃຈຂອງທຸກຄົນທີ່ມາຫາພຣະອົງດ້ວຍຄວາມເຊື່ອຈະຖືກນຳສະເໜີຕໍ່ພຣະພັກພຣະເຈົ້າ. {GC 489.1}
“ຜູ້ທີ່ຊ່ອນເຊື່ອງບາບກຳໄວ້ ຊີວິດຈະບໍ່ຈະເລີນຮຸ່ງເຮືອງ. ຜູ້ທີ່ສາລະພາບບາບກຳຂອງຕົນ ພຣະເຈົ້າຈະເມດຕາຜູ້ນັ້ນ.” (ສຸພາສິດ 28:13). ຖ້າຜູ້ທີ່ປິດບັງ ແລະ ແກ້ຕົວເລື່ອງຄວາມຜິດຂອງຕົນໄດ້ເຫັນວ່າຊາຕານພໍໃຈຫຼາຍພຽງໃດກັບການກະທຳຂອງພວກເຂົາ ແລະ ເຫັນວິທີທີ່ມັນເອົາການກະທຳເຫຼົ່ານັ້ນມາເຍາະເຍີ້ຍພຣະຄຣິສ ແລະ ເຫຼົ່າທູດສະຫວັນບໍຣິສຸດ, ພວກເຂົາຄົງຈະຮີບຟ້າວມາສາລະພາບ ແລະ ປະຖິ້ມບາບເຫຼົ່ານັ້ນ. ຊາຕານໃຊ້ຄວາມບົກຜ່ອງໃນອຸປະນິໄສຂອງມະນຸດ ເພື່ອຄວບຄຸມຄວາມຄິດທັງໝົດຂອງພວກເຂົາ. ມັນຮູ້ວ່າ ຖ້າຜູ້ໃດຍັງບໍ່ຍອມປ່ອຍວາງຄວາມບົກຜ່ອງເຫຼົ່ານັ້ນ ມັນກໍຈະສຳເລັດຕາມຈຸດປະສົງຂອງມັນ. ສະນັ້ນ, ມັນຈຶ່ງພະຍາຍາມຢູ່ສະເໝີ ທີ່ຈະຫຼອກລວງຜູ້ຕິດຕາມພຣະຄຣິສ ດ້ວຍຄຳສອນຜິດທີ່ເປັນອັນຕະລາຍຕໍ່ຊີວິດວ່າ ພວກເຂົາບໍ່ສາມາດເອົາຊະນະໄດ້. ແຕ່ພຣະເຢຊູຊົງອ້ອນວອນເພື່ອພວກເຂົາ ໂດຍຊົງຊີ້ໃຫ້ເຫັນພຣະຫັດທີ່ຖືກບາດເຈັບ ແລະ ພຣະກາຍທີ່ຟົກຊ້ຳຂອງພຣະອົງ. ພຣະອົງຊົງປະກາດແກ່ທຸກຄົນທີ່ຢາກຕິດຕາມພຣະອົງວ່າ: “ພຣະຄຸນຂອງເຮົາກໍພຽງພໍແລ້ວສຳລັບເຈົ້າ.” (2 ໂກຣິນໂທ 12:9 LCV). “ຈົ່ງເອົາແອກຂອງເຮົາແບກໄວ້ ແລະ ຮຽນຮູ້ຈາກເຮົາ ເພາະວ່າເຮົາເປັນຜູ້ໃຈອ່ອນສຸພາບ ແລະ ຖ່ອມລົງ, ແລ້ວຈິດໃຈຂອງພວກເຈົ້າຈະໄດ້ພົບຄວາມເຊົາເມື່ອຍ. ເພາະແອກຂອງເຮົານັ້ນກໍພໍເໝາະ ແລະ ພາລະຂອງເຮົາກໍເບົາ.” (ມັດທາຍ 11:29, 30 LCV). ດັ່ງນັ້ນ, ຢ່າໃຫ້ຜູ້ໃດຄິດວ່າຄວາມບົກຜ່ອງຂອງຕົນປັບປຸງບໍ່ໄດ້. ພຣະເຈົ້າຈະປະທານຄວາມເຊື່ອ ແລະ ພຣະຄຸນເພື່ອເອົາຊະນະສິ່ງເຫຼົ່ານັ້ນ. {GC 489.2}
ປັດຈຸບັນນີ້, ພວກເຮົາກຳລັງມີຊີວິດຢູ່ໃນເວລາແຫ່ງການລຶບລ້າງຄວາມບາບອັນຍິ່ງໃຫຍ່. ໃນພິທີກຳອັນເປັນເງົາສັນຍະລັກນັ້ນ, ຂະນະທີ່ມະຫາປະໂຣຫິດກຳລັງເຮັດການລຶບລ້າງຄວາມຜິດບາບໃຫ້ແກ່ຊົນຊາດອິດສະຣາເອນ, ທຸກຄົນຕ້ອງສຳຫຼວດຈິດໃຈ, ມີຄວາມເສົ້າເສຍໃຈຕໍ່ຄວາມບາບ ແລະ ຖ່ອມຕົວລົງຕໍ່ພຣະພັກອົງພຣະຜູ້ເປັນເຈົ້າ; ບໍ່ດັ່ງນັ້ນ, ພວກເຂົາຈະຖືກຕັດອອກຈາກທ່າມກາງປະຊາຊົນ. ເຊັ່ນດຽວກັນ, ໃນເວລາແຫ່ງການທົດສອບທີ່ເຫຼືອຢູ່ບໍ່ເທົ່າໃດມື້ ທຸກຄົນທີ່ຢາກຮັກສາຊື່ຂອງຕົນໄວ້ໃນທະບຽນແຫ່ງຊີວິດ ຄວນຈະຖ່ອມຈິດໃຈຂອງຕົນລົງຕໍ່ພຣະພັກພຣະເຈົ້າ ດ້ວຍຄວາມເສຍໃຈຕໍ່ຄວາມບາບ ແລະ ການກັບໃຈໃໝ່ຢ່າງແທ້ຈິງ. ຈະຕ້ອງມີການສຳຫຼວດຈິດໃຈຢ່າງເລິກເຊິ່ງ ແລະ ຈິງຈັງ. ຄຣິສຕຽນຈຳນວນຫຼາຍທີ່ໃຊ້ຊີວິດແບບຜິວເຜີນ ແລະ ເຫຼາະແຫຼະ ຈະຕ້ອງປ່ຽນແປງຕົນເອງ. ທຸກຄົນຈະຕ້ອງຕໍ່ສູ້ຢ່າງໜັກ ເພື່ອເອົາຊະນະເນື້ອໜັງທີ່ມີແນວໂນ້ມໃນການເຮັດຊົ່ວ. ການກຽມພ້ອມນີ້ເປັນວຽກງານສ່ວນຕົວ ເພາະພວກເຮົາຈະບໍ່ໄດ້ລອດເປັນໝູ່ຄະນະ. ຄວາມບໍຣິສຸດ ແລະ ການອຸທິດຖວາຍຂອງຄົນໜຶ່ງ ບໍ່ສາມາດທົດແທນການທີ່ອີກຄົນໜຶ່ງຂາດຄຸນສົມບັດເຫຼົ່ານີ້. ເຖິງແມ່ນວ່າທຸກຊົນຊາດຈະຖືກພິພາກສາຕໍ່ພຣະພັກພຣະເຈົ້າ, ແຕ່ພຣະອົງຈະກວດສອບຄະດີຂອງແຕ່ລະຄົນຢ່າງລະອຽດຖີ່ຖ້ວນ ເໝືອນກັບວ່າໃນໂລກນີ້ມີພຽງແຕ່ລາວຜູ້ດຽວ. ທຸກຄົນຈະຕ້ອງຖືກທົດສອບ ແລະ ຈະຕ້ອງບໍ່ພົບມົນທິນ ຫຼື ຮອຍດ່າງພອຍຢູ່ໃນຕົວເຂົາ. {GC 489.3}
ການລຶບລ້າງຄວາມຜິດບາບໃນຍຸກສຸດທ້າຍ ເປັນເຫດການສຳຄັນທີ່ສຸດ ແລະ ເປັນເລື່ອງຂອງຊະຕາກຳຊົ່ວນິຣັນດອນ. ການພິພາກສາກຳລັງດຳເນີນຢູ່ໃນສະຖານນະມັດສະການເທິງສະຫວັນ; ວຽກງານນີ້ໄດ້ດຳເນີນມາຫຼາຍປີແລ້ວ. ໃນບໍ່ຊ້ານີ້, ການພິພາກສາຈະມາເຖິງຄະດີຂອງຜູ້ທີ່ຍັງມີຊີວິດຢູ່, ເຖິງແມ່ນວ່າ ບໍ່ມີຜູ້ໃດຮູ້ວ່າຈະມາເຖິງໄວປານໃດ. ຊີວິດຂອງພວກເຮົາຈະຖືກພິຈາລະນາຕໍ່ພຣະພັກອັນໜ້າຢຳເກງຂອງພຣະເຈົ້າ. ໃນຍາມນີ້ຍິ່ງກວ່າສະໄໝອື່ນໃດ, ທຸກຄົນຄວນເອົາໃຈໃສ່ຕໍ່ຄຳເຕືອນຂອງພຣະຜູ້ຊ່ວຍໃຫ້ລອດທີ່ວ່າ: “ຈົ່ງລະມັດລະວັງ! ຈົ່ງເຝົ້າລະວັງຢູ່! ພວກເຈົ້າບໍ່ຮູ້ວ່າເວລານັ້ນຈະມາເຖິງເມື່ອໃດ.” (ມາຣະໂກ 13:33 LCV). “ແຕ່ຖ້າພວກເຈົ້າບໍ່ຕື່ນຂຶ້ນ, ເຮົາຈະມາເໝືອນດັ່ງຂະໂມຍ ແລະ ພວກເຈົ້າກໍຈະບໍ່ຮູ້ວ່າ ເຮົາຈະມາຫາເຈົ້າເວລາໃດ.” (ພຣະນິມິດ 3:3). {GC 490.1}
ເມື່ອການພິພາກສາແບບສືບສວນສິ້ນສຸດລົງ, ຊະຕາກຳຂອງທຸກຄົນກໍໄດ້ຖືກຕັດສິນຊີ້ຂາດໄປແລ້ວວ່າ ຈະໄດ້ຮັບຊີວິດ ຫຼື ຄວາມຕາຍ. ເວລາແຫ່ງພຣະກະລຸນາຈະສິ້ນສຸດລົງໃນໄລຍະສັ້ນໆກ່ອນທີ່ອົງພຣະຜູ້ເປັນເຈົ້າຈະສະເດັດມາໃນເມກແຫ່ງຟ້າສະຫວັນ. ໃນພຣະທຳພຣະນິມິດ, ພຣະຄຣິສໄດ້ຊົງເປີດເຜີຍລ່ວງໜ້າກ່ຽວກັບເວລານັ້ນວ່າ: “ຜູ້ໃດທີ່ເຮັດຊົ່ວ ກໍໃຫ້ເຮັດຊົ່ວຕໍ່ໄປ, ຜູ້ໃດທີ່ເປັນຄົນຊົ່ວຊ້າ ກໍໃຫ້ເປັນຄົນຊົ່ວຊ້າຕໍ່ໄປ, ຜູ້ໃດທີ່ເປັນຄົນຊອບທຳ ກໍໃຫ້ເຮັດການຊອບທຳຕໍ່ໄປ ແລະ ຜູ້ໃດທີ່ເປັນຄົນບໍຣິສຸດ ກໍໃຫ້ເປັນຄົນບໍຣິສຸດຕໍ່ໄປ.” “ເບິ່ງແມ! ເຮົາຈະມາໃນໄວໆນີ້ ເຮົາຈະເອົາບຳເໜັດຂອງເຮົາມານຳ ເພື່ອຕອບແທນຕາມການປະຕິບັດຂອງແຕ່ລະຄົນ.” (ພຣະນິມິດ 22:11, 12). {GC 490.2}
ຄົນຊອບທຳ ແລະ ຄົນຊົ່ວຈະຍັງມີຊີວິດຢູ່ໃນໂລກໃນສະພາບມະນຸດທີ່ຕາຍໄດ້. ຄົນທັງຫຼາຍຈະຍັງປູກຝັງ ແລະ ກໍ່ສ້າງ, ກິນ ແລະ ດື່ມ ໂດຍບໍ່ຮູ້ວ່າການຕັດສິນຊີ້ຂາດຄັ້ງສຸດທ້າຍ ໄດ້ຖືກປະກາດແລ້ວໃນສະຖານນະມັດສະການເທິງສະຫວັນ. ກ່ອນນ້ຳຖ້ວມໂລກ, ຫຼັງຈາກໂນອາເຂົ້າໄປໃນເຮືອ, ພຣະເຈົ້າໄດ້ອັດປະຕູໃຫ້ເພິ່ນຢູ່ພາຍໃນ ແລະ ກີດກັນຄົນອະທຳໄວ້ພາຍນອກ. ເປັນເວລາເຈັດມື້ທີ່ຄົນຊົ່ວບໍ່ຮູ້ວ່າຊະຕາກຳຂອງຕົນໄດ້ຖືກກຳນົດແລ້ວ. ພວກເຂົາຍັງສືບຕໍ່ໃຊ້ຊີວິດຢ່າງບໍ່ລະມັດລະວັງ, ມົວເມົາກັບຄວາມມ່ວນຊື່ນ ແລະ ເຍາະເຍີ້ຍຄຳເຕືອນເລື່ອງການພິພາກສາທີ່ໃກ້ຈະມາເຖິງ. ອົງພຣະຜູ້ຊ່ວຍໃຫ້ລອດຊົງກ່າວວ່າ: “ເມື່ອບຸດມະນຸດມາກໍຈະເປັນດັ່ງນີ້.” (ມັດທາຍ 24:39 LCV). ຊົ່ວໂມງແຫ່ງການຕັດສິນຈະມາເຖິງຢ່າງງຽບໆ ໂດຍບໍ່ມີໃຜສັງເກດເຫັນ ຄືກັບໂຈນທີ່ຈອບມາໃນຍາມທ່ຽງຄືນ. ມັນຈະເປັນເວລາທີ່ກຳນົດຊະຕາກຳຂອງທຸກຄົນ ແລະ ເປັນການສິ້ນສຸດໂອກາດແຫ່ງພຣະກະລຸນາສຳລັບຄົນບາບ. {GC 491.1}
“ເຫດສະນັ້ນທ່ານທັງຫຼາຍຈົ່ງເຝົ້າລະວັງຢູ່…ຢ້ານວ່າຈະມາໃນທັນທີ ແລະ ພົບທ່ານນອນຫຼັບຢູ່.” (ມາຣະໂກ 13:35, 36 LO1972). ຊ່າງເປັນອັນຕະລາຍແທ້ ສຳລັບຜູ້ທີ່ເລີ່ມເມື່ອຍລ້າໃນການເຝົ້າຄອຍ ແລ້ວປ່ອຍໃຈໃຫ້ຫຼົງໄຫຼໄປກັບສິ່ງດຶງດູດໃຈຂອງຊາວໂລກ. ໃນຂະນະທີ່ນັກທຸລະກິດກຳລັງມົວວົນຢູ່ກັບການຊອກຫາກຳໄລ; ໃນຂະນະທີ່ຄົນມັກຄວາມສຳລານຊອກຫາຄວາມບັນເທີງ; ໃນຂະນະທີ່ຍິງສາວທີ່ຫຼົງໄຫຼແຟຊັ້ນກຳລັງຈັດແຈງເຄື່ອງປະດັບຂອງຕົນ; ໃນເວລານັ້ນແຫຼະ, ອາດເປັນຍາມທີ່ພຣະຜູ້ພິພາກສາແຫ່ງສາກົນລະໂລກ ຈະຊົງປະກາດຄຳຕັດສິນວ່າ: “ພຣະເຈົ້າໄດ້ຊັ່ງນ້ຳໜັກຂອງທ່ານ ແລະພົບວ່ານ້ຳໜັກຂອງທ່ານຂາດໄປ.” (ດານີເອນ 5:27 THA-ERV). {GC 491.2}