https://m.egwwritings.org/en/book/132.69#69
“ໃນວັນນີ້ ຖ້າເຈົ້າໄດ້ຮູ້ເຖິງສິ່ງທີ່ເຮັດໃຫ້ເຈົ້າມີສັນຕິສຸກ ກໍເປັນການດີ ແຕ່ບັດນີ້ ສິ່ງເຫຼົ່ານັ້ນໄດ້ຖືກປິດບັງໄວ້ຈາກຕາຂອງເຈົ້າແລ້ວ. ດ້ວຍວ່າ ເວລາຈະມາເຖິງ ເມື່ອສັດຕູຂອງເຈົ້າຈະຂຸດຄູອ້ອມເຈົ້າ ແລະ ຕັນເຈົ້າໄວ້ທຸກດ້ານ. ພວກເຂົາຈະທຳລາຍເຈົ້າ ແລະ ລູກທັງຫຼາຍທີ່ຢູ່ນຳເຈົ້າໃຫ້ລົງພຽງດິນ. ພວກເຂົາຈະບໍ່ປະກ້ອນຫີນໃຫ້ຊ້ອນທັບກັນໄວ້ພາຍໃນເຈົ້າ ເພາະວ່າເຈົ້າບໍ່ຮູ້ເວລາທີ່ພຣະເຈົ້າໄດ້ມາຢ້ຽມຢາມເຈົ້າ.” (ລູກາ 19:42–441). {GC 17.1}
ພຣະເຢຊູເບິ່ງນະຄອນເຢຣູຊາເລັມຈາກຍອດພູເຂົາໝາກກອກເທດໃນລະຫວ່າງເທດສະການປັດສະຄາ. ພາບທີ່ເຫັນນັ້ນສວຍງາມ ແລະ ມີຄວາມສະຫງົບຢູ່ທົ່ວໄປ. ຄົນເຊື້ອສາຍຂອງຢາໂຄບຈາກທຸກທິດຕ່າງມາຮ່ວມຊຸມນຸມກັນທີ່ນັ້ນ ເພື່ອສະເຫຼີມສະຫຼອງເທດສະການແຫ່ງຊາດຄັ້ງໃຫຍ່ນີ້. ຜ້າເຕັນຂອງຜູ້ມາຮ່ວມງານກະຈາຍໄປຕາມພູເຂົາອັນຂຽວສົດ ແລະ ມີສວນທີ່ຖືກຈັດໄວ້ເໝືອນຂັ້ນໄດຕາມເນີນພູ. ພຣະຣາຊວັງອັນສະຫງ່າຜ່າເຜີຍ ແລະ ກຳແພງສູງໃຫຍ່ຂອງເມືອງຫຼວງຢືນຢູ່ໂດດເດັ່ນ. ເບິ່ງຄື ບຸດຕີຊີໂອນ ແມ່ນນະຄອນເຢຣູຊາເລັມນັ້ນເອງກຳລັງກ່າວຢ່າງຫຍິ່ງຍະໂສວ່າ: “ເຮົາຢູ່ໃນຕຳແໜ່ງຣາຊິນີ,…ເຮົາຈະບໍ່ປະສົບຄວາມໂສກເສົ້າຈັກເທື່ອ.” (ພຣະນິມິດ 18:7). ນະຄອນເຢຣູຊາເລັມສວຍງາມ ແລະ ຊາວເມືອງຖືວ່າສະຫວັນໂຜດຕົນເອງ ດັ່ງເຊັ່ນໃນສະໄໝບູຮານ ທີ່ນັກກະວີຫຼວງເຄີຍຂັບຮ້ອງເພງສັນລະເສີນວ່າ: “ຊີໂອນພູຂອງພຣະເຈົ້າ ສູງສົ່ງ ແລະ ງາມຫຼາຍ ນະຄອນຂອງກະສັດຜູ້ຍິ່ງໃຫຍ່ ທີ່ນຳເອົາຄວາມຊົມຊື່ນຍິນດີມາສູ່ທົ່ວທັງໂລກ.” (ເພງສັນລະເສີນ 48:2). ລຳແສງຕາເວັນທີ່ກຳລັງເຄື່ອນລັບຂອບຟ້າສະທ້ອນຈາກຫີນອ່ອນສີຂາວສະອາດ, ຫໍຄອຍ ແລະ ຍອດພຣະວິຫານຄຳຢ່າງເຈີດຈ້າແວວວາວ. ພຣະວິຫານງົດງາມ ບໍ່ມີບ່ອນຕຳໜິ ເປັນທີ່ພາກພູມໃຈຂອງຊາວຢິວທຸກຄົນ. ຈະມີລູກຫຼານຄົນໃດໃນອິດສະຣາເອນແດ່ ເມື່ອເຫັນພາບດັ່ງກ່າວແລ້ວຈະບໍ່ຮູ້ສຶກຊື່ນບານໃຈ? ຈະມີຈັກຄົນທີ່ບໍ່ຊົມເຊີຍ? ແຕ່ຄວາມຄິດຂອງພຣະເຢຊູແຕກຕ່າງກັນຫຼາຍ. “ຂະນະທີ່ພຣະອົງສະເດັດມາໃກ້ ແລະ ເຫັນຕົວເມືອງແລ້ວ ພຣະອົງຊົງຮ້ອງໄຫ້ສຽງດັງ.” (ລູກາ 19:41 ແປຈາກພາສາກຣີກ). ທ່າມກາງຄວາມຊົມຊື່ນຍິນດີຂອງຄົນທັງຫຼາຍທີ່ຮ່ວມຂະບວນສະເດັດ ຂະນະທີ່ພຣະອົງສະເດັດເຂົ້າໄປໃນນະຄອນຢ່າງຜູ້ມີໄຊ, ທ່າມກາງຄົນໂບກກ້ານຕານ ແລະ ສຽງໂຮ່ຮ້ອງ “ໂຮຊັນນາ” ທີ່ກ້ອງກັງວານຢູ່ຕາມເນີນພູ, ຄົນຫຼາຍພັນຄົນຮ້ອງສຽງດັງຂຶ້ນ ເພື່ອປະກາດແຕ່ງຕັ້ງພຣະເຢຊູໃຫ້ເປັນກະສັດ. ແຕ່ໃນເວລາດຽວກັນນັ້ນກໍເປັນທີ່ໜ້າປະຫຼາດໃຈທີ່ພຣະຜູ້ໄຖ່ຂອງໂລກໄດ້ມີຄວາມທຸກໂສກຢ່າງກະທັນຫັນ. ພຣະບຸດຂອງພຣະເຈົ້າ ຄືຜູ້ທີ່ພຣະເຈົ້າຊົງໃຊ້ມາຕາມພຣະສັນຍາ ຜູ້ທີ່ຊະນະຄວາມຕາຍ ແລະ ຄືນຊີວິດໃຫ້ແກ່ຜູ້ທີ່ລ່ວງລັບໄປນັ້ນ, ພຣະອົງຊົງຮ້ອງໄຫ້ສຽງດັງ ດ້ວຍຄວາມທຸກໃຈຢ່າງຮຸນແຮງເຫຼືອທົນ. {GC 17.2}
ແຕ່ພຣະເຢຊູບໍ່ໄດ້ຮ້ອງໄຫ້ເພື່ອພຣະອົງເອງ ເຖິງແມ່ນວ່າພຣະອົງຊົງຮູ້ດີວ່າພຣະອົງກຳລັງກ້າວໄປສູ່ທີ່ໃດ. ເບື້ອງໜ້າຄື ສວນເຄັດເຊມາເນ ສະຖານທີ່ທີ່ພຣະອົງຈະຕ້ອງແບກຮັບເອົາຄວາມທຸກທໍລະມານ ແລະ ປະຕູແກະ ບ່ອນທີ່ຄົນອິດສະຣາເອນນຳສັດມາຖວາຍເປັນເຄື່ອງບູຊາມາຕະຫຼອດຫຼາຍສະຕະວັດ. ປະຕູນີ້ເອງຈະຖືກເປີດອອກສຳລັບພຣະເຢຊູເມື່ອພຣະອົງຈະເປັນ “ດັ່ງລູກແກະພ້ອມຖືກນຳໄປຂ້າ.” (ເອຊາຢາ 53:7). ຫ່າງອອກໄປບໍ່ໄກຄືພູເຂົາຄານວາຣີ ສະຖານທີ່ທີ່ພຣະອົງຈະຖືກຄຶງໄວ້ເທິງໄມ້ກາງແຂນ. ເສັ້ນທາງທີ່ພຣະຄຣິສຈະຕ້ອງກ້າວຍ່າງໄປໃນອີກບໍ່ດົນນັ້ນຈະມືດມົວຢ່າງໜ້າຢ້ານ ເມື່ອພຣະອົງຈະຖວາຍພຣະອົງເອງເປັນເຄື່ອງບູຊາໄຖ່ບາບ. ມີເງົາມືດທອດຢູ່ເໜືອພຣະອົງ ໃນເວລາທີ່ຄົນອື່ນກຳລັງຊົມຊື່ນຍິນດີ, ແຕ່ເງົາມືດດັ່ງກ່າວ ບໍ່ໄດ້ເກີດຈາກການຄຳນຶງເຖິງເຫດການຮ້າຍທີ່ຈະເກີດຂຶ້ນກັບພຣະອົງ. ແມ່ນແຕ່ການສັງຫອນເຖິງຄວາມທຸກທໍລະມານທີ່ເກີນມະນຸດຈະທົນໄດ້ ກໍບໍ່ສາມາດເຮັດໃຫ້ພຣະອົງຜູ້ທີ່ບໍ່ເຄີຍເຫັນແກ່ຕົວ ເກີດຄວາມເສົ້າໝອງໄດ້. ແຕ່ພຣະອົງໂສກເສົ້າ ເນື່ອງຈາກຄົນໃນນະຄອນເຢຣູຊາເລັມຈຳນວນຫຼວງຫຼາຍ ທີ່ກຳລັງຈະພິນາດໄປຍ້ອນຄວາມມືດບອດ ແລະ ຄວາມດື້ດ້ານ ເຖິງແມ່ນວ່າ ພຣະອົງສະເດັດມາເພື່ອອວຍພອນ ແລະ ຊ່ວຍຄົນເຫຼົ່ານີ້ໃຫ້ລອດກໍຕາມ. {GC 18.1}
ຈາກບ່ອນທີ່ພຣະອົງຢືນຢູ່ນັ້ນ ກໍສາມາດເຫັນສະຖານທີ່ສຳຄັນແຫ່ງປະຫວັດສາດກວ່າ 1,000 ປີ, ຄືສະຖານທີ່ແຫ່ງການພິທັກຮັກສາ ແລະ ຄວາມໂປດປານຂອງພຣະເຈົ້າທີ່ມີຕໍ່ຊົນຊາດທີ່ພຣະອົງຊົງເລືອກ. ພູເຂົາໂມຣິຢາ ເປັນສະຖານທີ່ທີ່ ອີຊາກ ບຸດແຫ່ງພັນທະສັນຍາຖືກມັດໄວ້ເທິງແທ່ນບູຊາໂດຍບໍ່ດິ້ນສູ້ ເຊິ່ງເປັນສັນຍະລັກເລັງເຖິງການຖວາຍຕົວເປັນເຄື່ອງບູຊາຂອງພຣະບຸດພຣະເຈົ້າ. ເທິງພູເຂົາໂມຣິຢານັ້ນເອງ ພຣະເຈົ້າຊົງຢືນຢັນພຣະສັນຍາເລື່ອງພຣະເມຊີອາຕໍ່ບິດາແຫ່ງຄວາມເຊື່ອ ອັນເປັນພຣະສັນຍາແຫ່ງພຣະພອນອັນຮຸ່ງເຮືອງ. (ອ່ານ ປະຖົມມະການ 22:9, 16–18). ສະຖານທີ່ດັງກ່າວ ຍັງເປັນບ່ອນທີ່ກະສັດດາວິດຖວາຍເຄື່ອງບູຊາທີ່ລານນວດເຂົ້າຂອງອາໂຣນາ ເພື່ອດາບຂອງທູດມໍຣະນະຈະຢຸດສັງຫານປະຊາຊົນ. (ອ່ານ 1 ຂ່າວຄາວ 21). ການຖວາຍບູຊາໃນຄັ້ງນັ້ນເປັນສັນຍະລັກອັນເໝາະສົມ ທີ່ເລັງເຖິງພຣະຜູ້ຊ່ວຍໃຫ້ລອດ ຜູ້ຖວາຍພຣະອົງເອງເປັນເຄື່ອງບູຊາໄຖ່ບາບ ແລະ ເຮັດໜ້າທີ່ເປັນຄົນກາງລະຫວ່າງມວນມະນຸດທີ່ຫຼົງຜິດກັບພຣະຜູ້ເປັນເຈົ້າ. ນະຄອນເຢຣູຊາເລັມເຄີຍໄດ້ຮັບກຽດຈາກພຣະເຈົ້າເໜືອເມືອງອື່ນໃດເທິງແຜ່ນດິນໂລກ. ຕາມທີ່ເພງສັນລະເສີນ 132:13 ຂຽນໄວ້ວ່າ: “ອົງພຣະຜູ້ເປັນເຈົ້າໄດ້ເລືອກເຟັ້ນເອົາພູເຂົາຊີໂອນ ພຣະອົງຕ້ອງການເຮັດໃຫ້ພູນີ້ເປັນທີ່ປະທັບຂອງພຣະອົງ.” ບັນດາຜູ້ເຜີຍພຣະທຳໄດ້ປະກາດຕັກເຕືອນມາເປັນເວລາຫຼາຍຍຸກຫຼາຍສະໄໝໃນນະຄອນນີ້. ພວກປະໂຣຫິດເຄີຍແກວ່ງໝໍ້ຂາງເຄື່ອງຫອມໄປມາຕາມພິທີໃນນະຄອນນີ້ເຊັ່ນກັນ ແລະ ຄວັນເຄື່ອງຫອມນັ້ນ ໄດ້ລອຍຂຶ້ນສູ່ເບື້ອງພຣະພັກພຣະເຈົ້າ ພ້ອມດ້ວຍຄຳອະທິຖານຂອງຜູ້ເຂົ້າຮ່ວມນະມັດສະການ. ພວກເຂົາຍັງຖວາຍເລືອດຂອງລູກແກະ ທີ່ຖືກນຳມາຂ້າຢູ່ທຸກມື້ທຸກວັນ ອັນເປັນການເລັງເຖິງພຣະຜູ້ໄຖ່. ທີ່ນັ້ນ ສະຫງ່າຣາສີຂອງອົງພຣະຜູ້ເປັນເຈົ້າປາກົດຢູ່ເໜືອພຣະທີ່ນັ່ງກະລຸນາ ເປັນການສຳແດງວ່າພຣະອົງສະຖິດຢູ່. ຈາກບ່ອນນັ້ນບໍ່ໄກເປັນທີ່ຕັ້ງຂອງຖານຂັ້ນໄດໃນຄວາມຝັນຂອງຢາໂຄບ ທີ່ເຊື່ອມແຜ່ນດິນໂລກເຂົ້າກັບສະຫວັນ ຄືຂັ້ນໄດທີ່ຢາໂຄບຝັນເຫັນບັນດາທູດສະຫວັນຂອງພຣະເຈົ້າ ຂຶ້ນໆ ລົງໆ ແລະ ເປັນຂັ້ນໄດທີ່ເປີດທາງໄປສູ່ສະຖານທີ່ສັກສິດທີ່ສຸດໃຫ້ແກ່ມະນຸດ. (ເບິ່ງ ປະຖົມມະການ 28:12, ໂຢຮັນ 1:51, ເຮັບເຣີ 9:3). ຖ້າຫາກຊົນຊາດອິດສະຣາເອນໄດ້ຮັກສາຄວາມຈົງຮັກພັກດີທີ່ມີຕໍ່ສະຫວັນແລ້ວ ນະຄອນເຢຣູຊາເລັມກໍຄົງຈະດຳລົງຢູ່ຕະຫຼອດໄປໃນຖານະເມືອງທີ່ພຣະເຈົ້າຊົງເລືອກສັນ. (ເຢເຣມີຢາ 17:21–25). ແຕ່ປະຫວັດສາດຂອງຊົນຊາດທີ່ພຣະເຈົ້າຊົງໂປດປານນັ້ນ ມີແຕ່ເລື່ອງຄວາມບໍ່ສັດຊື່ ແລະ ຄວາມດື້ດ້ານຫົວແຂງ. ພວກເຂົາໄດ້ໝິ່ນປະໝາດຕໍ່ພຣະຄຸນຂອງສະຫວັນ, ໄດ້ບິດເບືອນສິດທິພິເສດ ແລະ ເມີນເສີຍຕໍ່ໂອກາດຕ່າງໆ. {GC 18.2}
ເຖິງແມ່ນວ່າຄົນອິດສະຣາເອນໄດ້ “ຫົວເຍາະເຍີ້ຍໃສ່ພວກຜູ້ນຳຂ່າວຂອງພຣະເຈົ້າ ໂດຍບໍ່ຍອມຮັບເອົາຖ້ອຍຄຳຂອງພຣະອົງ ແລະ ຫົວຂວັນໃສ່ຜູ້ທຳນວາຍຂອງພຣະອົງ” (2 ຂ່າວຄາວ 36:16), ແຕ່ພຣະອົງຍັງຄົງເມດຕາກະລຸນາ ແລະ ອົດທົນຕໍ່ພວກເຂົາ. ພຣະອົງຍັງຄົງເປັນພຣະເຈົ້າຜູ້ “ເຕັມໄປດ້ວຍຄວາມເມດຕາ ແລະ ເຕັມລົ້ນດ້ວຍພຣະຄຸນ ຜູ້ບໍ່ຮ້າຍງ່າຍ ແລະ ຜູ້ສຳແດງຄວາມຮັກອັນໝັ້ນຄົງ ແລະ ສັດຊື່.” (ອົບພະຍົບ 34:6). ພຣະອົງຍັງຄົງຮຽກຮ້ອງໃຫ້ຄົນອິດສະຣາເອນກັບໃຈ ເຖິງແມ່ນວ່າ ພວກເຂົາໄດ້ປະຕິເສດພຣະອົງຢ່າງຕໍ່ເນື່ອງກໍຕາມ. ດ້ວຍຄວາມຮັກອັນຍິ່ງໃຫຍ່ເກີນກວ່າຄວາມຮັກຂອງພໍ່ທີ່ມີຕໍ່ລູກ, ພຣະເຈົ້າຍັງຊົງ “ສືບຕໍ່ໃຊ້ຜູ້ທຳນວາຍຫຼາຍຄົນມາເຕືອນປະຊາຊົນຂອງພຣະອົງ ເພາະພຣະອົງບໍ່ປະສົງທຳລາຍພວກເຂົາ ແລະ ທີ່ສະຖິດຂອງພຣະອົງ.” (2 ຂ່າວຄາວ 36:15) ເມື່ອການທັກທ້ວງ, ການຕັກເຕືອນ ແລະ ການຮຽກຮ້ອງໃຫ້ກັບໃຈບໍ່ໄດ້ຜົນ, ພຣະເຈົ້າຊົງໃຊ້ພຣະບຸດຂອງພຣະອົງເປັນຂອງປະທານທີ່ດີທີ່ສຸດຈາກສະຫວັນ. ຕາມຄວາມຈິງແລ້ວພຣະອົງປະທານສະຫວັນທັງໝົດຜ່ານພຣະບຸດ. {GC 19.1}
ພຣະເຈົ້າຊົງໃຊ້ພຣະບຸດຂອງພຣະອົງມາ ເພື່ອຮຽກຮ້ອງຊາວເມືອງທີ່ແຂງກະດ້າງໃຫ້ກັບໃຈໃໝ່. ພຣະຄຣິສເອງ ຄືຜູ້ທີ່ນຳຄົນອິດສະຣາເອນອອກຈາກປະເທດເອຢິບ ແລະ ຂັບໄລ່ຊົນຊາດທັງຫຼາຍທີ່ບໍ່ນັບຖືພຣະເຈົ້າອອກໄປຕໍ່ໜ້າພວກເຂົາ. ພຣະອົງຊົງນຳຄົນອິດສະຣາເອນໃຫ້ລົງຫຼັກປັກຖານໃນແຜ່ນດິນທີ່ອຸດົມສົມບູນ ດັ່ງປູກເຄືອອະງຸ່ນອັນແຂງແຮງໄວ້ໃນດິນດີ. (ເບິ່ງ ເພງສັນລະເສີນ 80:8). ພຣະອົງຊົງປົກປ້ອງຄຸ້ມຄອງເຄືອອະງຸ່ນນັ້ນ ແລະ ຊົງໃຊ້ຄົນງານຂອງພຣະອົງໄປ ເພື່ອທະນຸບຳລຸງມັນໄວ້. ແລ້ວພຣະອົງຊົງຖາມວ່າ: “ມີອັນໃດແດ່ທີ່ຂ້ອຍບໍ່ໄດ້ເຮັດສຳລັບສວນນີ້?” (ເອຊາຢາ 5:1–4). ແຕ່ແທນທີ່ຈະໄດ້ໝາກອະງຸ່ນດີຕາມທີ່ຄາດໄວ້ ກໍກັບໄດ້ໝາກອະງຸ່ນສົ້ມ. ຢ່າງໃດກໍຕາມ, ພຣະອົງຍັງຄົງຫວັງວ່າຈະໄດ້ໝາກອະງຸ່ນດີ ຈຶ່ງສະເດັດມາດ້ວຍພຣະອົງເອງ ເພື່ອຊ່ວຍໃຫ້ສວນອະງຸ່ນຂອງພຣະອົງບໍ່ຕ້ອງຖືກທຳລາຍ. ພຣະອົງຊົງເບິ່ງແຍງເອົາໃຈໃສ່ເຄືອອະງຸ່ນຂອງພຣະອົງ ແລະ ພະຍາຍາມຊ່ວຍເຄືອອະງຸ່ນທີ່ພຣະອົງຊົງປູກໄວ້ຢ່າງບໍ່ຮູ້ອິດຮູ້ເມື່ອຍ. {GC 19.2}
ພຣະບຸດຂອງພຣະເຈົ້າເປັນຄວາມສະຫວ່າງ; ສະຫງ່າຣາສີມາຈາກພຣະອົງ. ພຣະອົງສະເດັດເຂົ້າ - ອອກ ທ່າມກາງຄົນຂອງພຣະອົງເປັນເວລາສາມປີ. “ພຣະອົງໄປທຸກຫົນທຸກແຫ່ງ ເຮັດຄຸນງາມຄວາມດີ ແລະ ຊົງໂຜດຮັກສາທຸກຄົນທີ່ຖືກອຳນາດຂອງມານຮ້າຍບຽດບຽນ.” ພຣະອົງປິ່ນປົວຄົນລະທົມໃຈ, ປະກາດອິດສະຫຼະພາບແກ່ຄົນທີ່ຖືກຈອງຈຳ, ປິ່ນປົວຄົນຕາບອດໃຫ້ເຫັນຮຸ່ງ ແລະ ຄົນຫູໜວກໃຫ້ໄດ້ຍິນ, ຊ່ວຍຄົນຂາພິການໃຫ້ຍ່າງໄດ້, ຮັກສາຄົນທີ່ເປັນພະຍາດຂີ້ທູດໃຫ້ຫາຍສະອາດ, ໃຫ້ຄົນທີ່ຕາຍແລ້ວຟື້ນຄືນຊີວິດ ແລະ ປະກາດຂ່າວດີແກ່ຄົນຍາກຈົນ. (ກິດຈະການ 10:38; ລູກາ 4:18; ມັດທາຍ 11:5). ພຣະອົງຊົງກະລຸນາຮຽກເອີ້ນທຸກຊົນຊັ້ນວ່າ: “ບັນດາຜູ້ທີ່ເຮັດການໜັກໜ່ວງ ແລະ ແບກພາລະໜັກ ຈົ່ງມາຫາເຮົາ ແລະ ເຮົາຈະໃຫ້ພວກເຈົ້າໄດ້ຮັບຄວາມເຊົາເມື່ອຍ.” (ມັດທາຍ 11:28). {GC 20.1}
ຄົນອິດສະຣາເອນໄດ້ “ຕອບສະໜອງໂດຍຄວາມຊົ່ວແທນຄວາມດີ ແລະ ໃຊ້ຄວາມກຽດຊັງຕອບແທນຄວາມຮັກ.” (ເພງສັນລະເສີນ 109:5). ເຖິງຢ່າງນັ້ນກໍດີ, ພຣະອົງຍັງຄົງສືບຕໍ່ພາລະກິດແຫ່ງຄວາມເມດຕາ ໂດຍບໍ່ຍອມທໍ້ຖອຍ. ພຣະອົງບໍ່ເຄີຍປະຕິເສດຄົນທີ່ສະແຫວງຫາພຣະຄຸນຂອງພຣະອົງ. ພຣະເຢຊູສະເດັດໄປບ່ອນຕ່າງໆ ຄືກັບຄົນບໍ່ມີເຮືອນຢູ່. ພຣະອົງທົນຕໍ່ຄວາມຍາກຈົນ ແລະ ການດູຖູກຂອງຄົນອື່ນເປັນປະຈຳທຸກວັນ, ທັງໝົດນີ້ ກໍເພື່ອແບ່ງເບົາພາລະ ແລະ ຊ່ວຍເຫຼືອຄົນທັງຫຼາຍໃນເລື່ອງທີ່ຈຳເປັນ ແລະ ຂໍຮ້ອງພວກເຂົາໃຫ້ຮັບເອົາຂອງປະທານແຫ່ງຊີວິດ. ເຖິງແມ່ນວ່າຄົນໃຈດື້ດ້ານຈະປະຕິເສດຄວາມເມດຕາຂອງພຣະອົງ, ແຕ່ພຣະເຢຊູຊົງຮັກ ແລະ ອີ່ຕົນສົງສານຫຼາຍຂຶ້ນດ້ວຍຄວາມຮັກທີ່ເກີນບັນລະຍາຍ. ແຕ່ຄົນອິດສະຣາເອນໄດ້ຫັນຫຼັງໃສ່ພຣະອົງຜູ້ເປັນມິດແທ້ ແລະ ເປັນຜູ້ທີ່ສາມາດຊ່ວຍເຫຼືອແຕ່ຜູ້ດຽວ. ພວກເຂົາໄດ້ດູຖູກການວິງວອນຂໍຮ້ອງດ້ວຍຄວາມຮັກຂອງພຣະອົງ, ໄດ້ປະຕິເສດຄຳສັ່ງສອນ, ແຖມຍັງເຍາະເຍີ້ຍຄຳຕັກເຕືອນຂອງພຣະອົງ. {GC 20.2}
ເວລາແຫ່ງຄວາມຫວັງກຳລັງຈະຜ່ານພົ້ນໄປ; ໂອກາດທີ່ຈະໄດ້ຮັບການໃຫ້ອະໄພໃກ້ຈະໝົດລົງ; ຈອກແຫ່ງພຣະພິໂຣດຂອງພຣະເຈົ້າ ທີ່ອົດທົນໄວ້ດົນນານ ໃກ້ຈະເຕັມແລ້ວ. ຄວາມຫ່າງເຫີນຈາກພຣະເຈົ້າ ແລະ ຄວາມດື້ດ້ານເປັນດັ່ງກ້ອນເມກທີ່ຄ່ອຍໆກໍ່ຕົວຂຶ້ນຕາມຍຸກສະໄໝຕ່າງໆ, ພໍເຖິງເວລານັ້ນກ້ອນເມກດັ່ງກ່າວ ກໍມືດດຳເຕັມທີ່. ພະຍຸໃກ້ຈະພັດຖະຫຼົ່ມໃສ່ຊົນຊາດອິດສະຣາເອນທີ່ຜິດບາບ. ຊ້ຳບໍ່ໜຳ, ພວກເຂົາດູຖູກ, ຂົ່ມເຫັງ, ປະຕິເສດ ແລະ ພ້ອມຈະຄຶງພຣະອົງໄວ້ເທິງໄມ້ກາງແຂນ ເຖິງແມ່ນວ່າ ພຣະອົງຄືຜູ້ດຽວທີ່ສາມາດຊ່ວຍເຫຼືອພວກເຂົາໃຫ້ພົ້ນຈາກຄວາມຈິບຫາຍທີ່ຈວນຈະເກີດຂຶ້ນກໍຕາມ. ການເປັນທີ່ໂປດປານຂອງພຣະເຈົ້າ ໄດ້ສິ້ນສຸດລົງສຳລັບຊົນຊາດອິດສະຣາເອນ ໃນວັນທີ່ພຣະຄຣິສຖືກຄຶງໄວ້ທີ່ໄມ້ກາງແຂນແຫ່ງຄານວາຣີ. ການທີ່ມະນຸດຄົນໃດຈະພິນາດ ກໍເປັນການສູນເສຍທີ່ຍິ່ງໃຫຍ່ເກີນກວ່າຊັບສົມບັດຂອງໂລກທັງໝົດ, ແຕ່ໃນຂະນະທີ່ເບິ່ງນະຄອນເຢຣູຊາເລັມ ພຣະອົງເຫັນຄວາມພິນາດຂອງຄົນໝົດທັງເມືອງ ແລະ ຄົນທັງຊາດ ຄືນະຄອນ ແລະ ຊົນຊາດທີ່ພຣະເຈົ້າເຄີຍເລືອກໄວ້ໃຫ້ເປັນດັ່ງສົມບັດພິເສດຂອງພຣະອົງ. {GC 20.3}
ຜູ້ເຜີຍພຣະທຳຂອງພຣະເຈົ້າເຄີຍຮ້ອງໄຫ້ເປັນທຸກໃຈ ຍ້ອນຄົນອິດສະຣາເອນຫ່າງເຫີນຈາກພຣະອົງ ແລະ ຍ້ອນຄວາມພິນາດທີ່ເກີດຂຶ້ນເພາະຄວາມບາບຂອງພວກເຂົາ. ເຢເຣມີຢາປາຖະໜາໃຫ້ຕາເປັນດັ່ງນ້ຳພຸ ເພື່ອຈະໄດ້ຮ້ອງໄຫ້ທັງເວັນທັງຄືນເພື່ອຝູງແກະຂອງພຣະເຈົ້າ ກໍຄືຄົນຮ່ວມຊາດຂອງເພິ່ນທີ່ຖືກຂ້າຟັນຕາຍ ແລະ ຖືກນຳໄປເປັນຊະເລີຍ. (ເບິ່ງ ເຢເຣມີຢາ 9:1; 13:17). ຜູ້ເຜີຍພຣະທຳເຫຼົ່ານັ້ນ ຮັບຮູ້ເຖິງເຫດການລ່ວງໜ້າບໍ່ເທົ່າໃດປີ, ແຕ່ຄວາມທຸກຂອງພວກເຂົາບໍ່ສາມາດປຽບທຽບກັບຄວາມທຸກຂອງພຣະເຢຊູ ຜູ້ຮູ້ແຈ້ງເຫັນຈິງເຖິງເຫດການທີ່ຈະເກີດຂຶ້ນໃນທຸກຍຸກທຸກສະໄໝຕໍ່ຈາກນັ້ນ. ພຣະອົງເຫັນທູດມໍຣະນະຍົກດາບຕໍ່ສູ້ນະຄອນ ອັນເປັນທີ່ສະຖິດຂອງພຣະເຢໂຮວາເປັນເວລາດົນນານ. ພຣະອົງຢືນຢູ່ທີ່ພູເຂົາໝາກກອກເທດ ເຊິ່ງເປັນບ່ອນດຽວກັນທີ່ແມ່ທັບ ຕີໂຕ ກັບກອງທັບຂອງເພິ່ນຈະຕັ້ງຄ້າຍຢູ່ໃນເວລາຕໍ່ມາ. ພຣະອົງເບິ່ງຂ້າມຮ່ອມພູໄປຍັງອາຄານຕ່າງໆຂອງພຣະວິຫານ. ນ້ຳຕາຫຼັ່ງໄຫຼໃນຂະນະທີ່ພຣະອົງຮູ້ເຫັນລ່ວງໜ້າວ່າ ກອງທັບຄົນຕ່າງຊາດຈະມາລ້ອມກຳແພງເມືອງ ພ້ອມທັງໄດ້ຍິນເຖິງສຽງດັງພຶບພັບພຶບພັບຂອງທະຫານຈຳນວນຫຼວງຫຼາຍທີ່ຈະຍ່າງເຂົ້າມາເພື່ອເຮັດເສິກສົງຄາມ, ໄດ້ຍິນສຽງແມ່ ແລະ ບັນດາລູກຮ້ອງຫາເຂົ້າຈີ່ໃນນະຄອນທີ່ຖືກລ້ອມໄວ້, ທັງໄດ້ເຫັນພຣະວິຫານ, ພຣະຣາຊວັງ ແລະ ຫໍຄອຍຖືກໄຟໄໝ້ໃຫ້ວອດວາຍ ເຫຼືອແຕ່ຄວັນທີ່ລອຍຂຶ້ນຈາກຊາກອາຄານທີ່ພັງລົງ. {GC 21.1}
ພຣະອົງຮູ້ແຈ້ງເຖິງຍຸກສະໄໝຕ່າງໆໃນອະນາຄົດ ແລະ ເຫັນຄົນແຫ່ງພັນທະສັນຍາ ຖືກກະຈາຍໄປຕາມປະເທດຕ່າງໆໃນໂລກ ເໝືອນຊາກເຮືອຖືກພັດຂຶ້ນຝັ່ງອັນເປົ່າປ່ຽວ. ການລົງໂທດນະຄອນເຢຣູຊາເລັມທີ່ກຳລັງຈະຕົກສູ່ຊາວນະຄອນໃນຄັ້ງນີ້ ປຽບເໝືອນການຈິບເຫຼົ້າແວງ ຈາກຈອກແຫ່ງພຣະພິໂຣດຂອງພຣະເຈົ້າ ແລະ ເມື່ອເຖິງເວລາແຫ່ງການພິພາກສາຄັ້ງສຸດທ້າຍແລ້ວນັ້ນ ນະຄອນເຢຣູຊາເລັມຈະຕ້ອງດື່ມໃຫ້ໝົດພ້ອມດ້ວຍຂີ້ຊາທີ່ຢູ່ກົ້ນຈອກນຳ. ພຣະເຢຊູເຕັມໄປດ້ວຍຄວາມເມດຕາ ແລະ ຄວາມຮັກອັນຍິ່ງໃຫຍ່ຈຶ່ງກ່າວດ້ວຍຄວາມໂສກເສົ້າເສຍໃຈວ່າ: “ໂອ ເຢຣູຊາເລັມເອີຍ ເຈົ້າຂ້າບັນດາຜູ້ທຳນວາຍ ເອົາຫີນແກວ່ງໃສ່ພວກຜູ້ທຳນວາຍທີ່ໃຊ້ມາຫາເຈົ້າ. ຫຼາຍເທື່ອແລ້ວ ເຮົາຢາກຈະຮວບຮວມເອົາປະຊາຊົນທັງໝົດຂອງເຈົ້າໄວ້ ເໝືອນດັ່ງແມ່ໄກ່ຮວບຮວມລູກຂອງຕົນໄວ້ໃຕ້ປີກ ແຕ່ເຈົ້າບໍ່ຍິນຍອມ.” (ມັດທາຍ 23:37). ພວກເຈົ້າເປັນຊົນຊາດທີ່ໄດ້ຮັບພຣະພອນຫຼາຍກວ່າຊົນຊາດທັງຫຼາຍໃນໂລກ. ແຕ່ຢາກໃຫ້ພວກເຈົ້າຮູ້ເວລາທີ່ພຣະເຈົ້າມາຢ້ຽມຢາມພວກເຈົ້າ, ທັງຢາກໃຫ້ພວກເຈົ້າຮູ້ວ່າ ແມ່ນສິ່ງໃດທີ່ເຮັດໃຫ້ພວກເຈົ້າມີຄວາມສະຫງົບສຸກ. ເຮົາໄດ້ຢັບຢັ້ງທູດແຫ່ງຄວາມຍຸຕິທຳໄວ້ ແລະ ໄດ້ຮ້ອງຂໍໃຫ້ພວກເຈົ້າຖິ້ມໃຈເກົ່າເອົາໃຈໃໝ່ເສຍກ່ອນ ແຕ່ກໍບໍ່ໄດ້ຜົນ. ພວກເຈົ້າບໍ່ພຽງແຕ່ປະຕິເສດຜູ້ຮັບໃຊ້, ຜູ້ເຜີຍພຣະທຳ ແລະ ຕົວແທນທີ່ພຣະເຈົ້າໃຊ້ມາເທົ່ານັ້ນ ແຕ່ໄດ້ປະຕິເສດພຣະຜູ້ໄຖ່ ເຊິ່ງເປັນອົງບໍຣິສຸດແຫ່ງອິດສະຣາເອນ, ຖ້າຫາກວ່າພວກເຈົ້າຖືກທຳລາຍ ພວກເຈົ້າຕ້ອງຮັບຜິດຊອບເອົາເອງ. “ເຈົ້າທັງຫຼາຍກໍຍັງບໍ່ຢາກມາຫາເຮົາເພື່ອຈະໄດ້ຊີວິດ.” (ໂຢຮັນ 5:40). {GC 21.2}
ພຣະເຢຊູຄຣິສເຫັນວ່າ ນະຄອນເຢຣູຊາເລັມເປັນສັນຍະລັກຂອງໂລກ ທີ່ແຂງກະດ້າງ ເພາະມີຈິດໃຈດື້ດ້ານ ແລະ ບໍ່ເຊື່ອໃນພຣະເຈົ້າ ຄືເປັນສັນຍະລັກຂອງໂລກທີ່ກຳລັງແລ່ນໄປສູ່ການຖືກລົງໂທດຢ່າງໄວວາ. ຄວາມທຸກເວດທະນາຂອງມະນຸດສະໂລກທີ່ຫຼົງໄຫຼໃນຄວາມບາບໄດ້ບີບຮັດຈິດໃຈຂອງພຣະເຢຊູ ຈົນພຣະອົງຮ້ອງອອກມາຢ່າງຂົມຂື່ນ. ພຣະອົງເຫັນຮ່ອງຮອຍນ້ຳຕາ ແລະ ຄາບເລືອດທີ່ໃຊ້ບັນທຶກປະຫວັດສາດຄວາມທຸກເວດທະນາຂອງມະນຸດ ແລະ ຮູ້ສຶກເມດຕາສົງສານຢ່າງບໍ່ມີຂອບເຂດຕໍ່ຄົນທີ່ຕ້ອງທົນທຸກລຳບາກເຫຼົ່ານັ້ນ. ພຣະອົງຊົງປາຖະໜາທີ່ຈະບັນເທົາຄວາມທຸກໃຫ້ໝົດທຸກຄົນ. ເຖິງຢ່າງໃດກໍຕາມ ພຣະອົງບໍ່ສາມາດຢຸດຢັ້ງຄວາມທຸກເວດທະນາຂອງມະນຸດສະໂລກທັງໝົດໄດ້ ເພາະວ່າຄົນສ່ວນຫຼາຍຈະບໍ່ມາຫາພຣະອົງເພື່ອຮັບຄວາມຊ່ວຍເຫຼືອ. ພຣະອົງພ້ອມຈະສະຫຼະຊີວິດຂອງພຣະອົງ ເພື່ອນຳຄວາມລອດພົ້ນມາເຖິງມືຂອງຄົນທັງຫຼາຍ ແຕ່ຈະມີໜ້ອຍຄົນມາຫາພຣະອົງເພື່ອຈະໄດ້ຊີວິດ. {GC 22.1}
ພຣະເຈົ້າແຫ່ງຟ້າສະຫວັນ ຜູ້ຊົງຣິດອຳນາດຍິ່ງໃຫຍ່ຮ້ອງໄຫ້! ພຣະບຸດຂອງພຣະເຈົ້າຜູ້ສູງສຸດເປັນທຸກໃຈ ແລະ ກົ້ມລົງດ້ວຍຄວາມໂສກເສົ້າ! ພາບດັ່ງກ່າວເຮັດໃຫ້ທົ່ວທັງສະຫວັນປະຫຼາດໃຈ, ເປັນພາບທີ່ສຳແດງໃຫ້ເຮົາຮູ້ວ່າ ຄວາມບາບເປັນສິ່ງທີ່ເສື່ອມເສຍຢ່າງຮ້າຍແຮງ ແລະ ສະແດງໃຫ້ເຫັນວ່າ ການຊ່ວຍຄົນຜິດບາບໃຫ້ລອດພົ້ນຈາກຜົນຂອງການລະເມີດຕໍ່ພຣະບັນຍັດຂອງພຣະເຈົ້າ ເປັນເລື່ອງທີ່ຍາກອີ່ຫຼີ; ເຖິງແມ່ນວ່າພຣະເຈົ້າຊົງຣິດທານຸພາບສູງສຸດ ແຕ່ເລື່ອງນີ້ຍັງເປັນສິ່ງທີ່ຍາກສຳລັບພຣະອົງ. ພຣະເຢຊູເບິ່ງທະລຸໄປເຖິງວາລະສຸດທ້າຍ ແລະ ຄົນລຸ້ນສຸດທ້າຍ; ພຣະອົງເຫັນຊາວໂລກຫຼົງໄປຕາມການຫຼອກລວງ ຄ້າຍຄືການຫຼອກລວງອັນເປັນເຫດໃຫ້ນະຄອນເຢຣູຊາເລັມຖືກທຳລາຍ. ຄວາມບາບອັນໜັກໜາຂອງຊາວຢິວ ແມ່ນການປະຕິເສດພຣະຄຣິສ, ໃນຂະນະທີ່ຄວາມບາບອັນຍິ່ງໃຫຍ່ຂອງຄຣິສຕຽນໃນຍຸກສຸດທ້າຍ ແມ່ນການປະຕິເສດພຣະບັນຍັດຂອງພຣະເຈົ້າ ເຊິ່ງເປັນຮາກຖານການປົກຄອງຂອງພຣະອົງໃນຟ້າສະຫວັນ ແລະ ແຜ່ນດິນໂລກ. ຄົນທັງຫຼາຍຈະດູຖູກກົດເກນຂອງພຣະເຢໂຮວາ ແລະ ຈະບໍ່ເອົາໃຈໃສ່ຕໍ່ຫຼັກການຂອງພຣະອົງທັງໝົດ. ຄົນນັບລ້ານເປັນທາດຂອງຄວາມບາບ ແລະ ເປັນທາດຂອງຊາຕານ ຈະຕ້ອງພິນາດໄປຕະຫຼອດນິຣັນ ຄືຄວາມຕາຍຄັ້ງທີສອງ, ແຕ່ໃນຂະນະດຽວກັນ ຄົນເຫຼົ່ານັ້ນກໍປິດຫູ ບໍ່ຍອມຟັງຖ້ອຍຄຳແຫ່ງຄວາມຈິງໃນມື້ທີ່ພຣະເຈົ້າຊົງຢ້ຽມຢາມພວກເຂົາ, ນັບວ່າເປັນການປິດຫູບັງຕາທີ່ເປັນຕາຢ້ານແທ້ ແລະ ເປັນຄວາມຫຼົງໄຫຼທີ່ແສນປະຫຼາດ. {GC 22.2}
ສອງວັນກ່ອນເທດສະການປັດສະຄາ ຫຼັງຈາກພຣະຄຣິສໄດ້ປະນາມຄວາມໜ້າຊື່ໃຈຄົດຂອງພວກຜູ້ນຳຊາວຢິວແລ້ວ, ພຣະອົງກໍສະເດັດອອກຈາກພຣະວິຫານເປັນເທື່ອສຸດທ້າຍ ແລະ ຂຶ້ນໄປຍັງພູເຂົາໝາກກອກເທດ ເພື່ອນັ່ງກັບເຫຼົ່າສາວົກທີ່ທົ່ງຫຍ້າ, ຈາກບ່ອນນັ້ນກໍສາມາດເບິ່ງລົງໄປເຫັນນະຄອນເຢຣູຊາເລັມ. ພຣະອົງໄດ້ແນມເຫັນກຳແພງເມືອງ, ຫໍຄອຍ ແລະ ພຣະຣາຊວັງອີກເທື່ອໜຶ່ງ ແລະ ກໍຫັນໄປເບິ່ງພຣະວິຫານອີກຄັ້ງໜຶ່ງ, ພຣະວິຫານນັ້ນສະທ້ອນແສງແວວວາວ ເປັນດັ່ງມົງກຸດງົດງາມຢູ່ເທິງພູສັກສິດ. {GC 23.1}
ໜຶ່ງພັນປີກ່ອນໜ້ານັ້ນ ຜູ້ປະພັນເພງສັນລະເສີນໄດ້ຍົກຍ້ອງພຣະຄຸນຂອງພຣະເຈົ້າ ທີ່ຊົງໂຜດໃຫ້ພຣະວິຫານໃນອິດສະຣາເອນເປັນທີ່ສະຖິດຂອງພຣະອົງ ໂດຍຂຽນໄວ້ວ່າ: “ພຣະອົງມີທີ່ປະທັບຢູ່ທີ່ນະຄອນເຢຣູຊາເລັມ ແລະ ມີທີ່ສະຖິດທີ່ເທິງພູຊີໂອນດ້ວຍ.” “ພຣະອົງຊ້ຳພັດເລືອກເອົາເຜົ່າຢູດາແທນ ທັງພູເຂົາຊີໂອນ ເຊິ່ງພຣະອົງຮັກຫຼາຍທີ່ສຸດນັ້ນ. ໃນທີ່ນັ້ນ ພຣະອົງໄດ້ສ້າງພຣະວິຫານຂອງພຣະອົງ ເປັນດັ່ງບ່ອນຂອງພຣະອົງຢູ່ເທິງສະຫວັນຊັ້ນຟ້າ.” (ເພງສັນລະເສີນ 76:2; 78:68, 69). ພຣະວິຫານຫຼັງທຳອິດ ຖືກສ້າງຂຶ້ນໃນສະໄໝທີ່ຊົນຊາດອິດສະຣາເອນມີຄວາມຈະເລີນຮຸ່ງເຮືອງທີ່ສຸດ, ກະສັດດາວິດໄດ້ຮວບຮວມຊັບສົມບັດຢ່າງຫຼວງຫຼາຍ ເພື່ອການສ້າງພຣະວິຫານ ແລະ ພຣະເຈົ້າຊົງນຳໃນການອອກແບບ.2 ກະສັດໂຊໂລໂມນຜູ້ສະຫຼຽວສະຫຼາດ ແລະ ມີປັນຍາຫຼາຍທີ່ສຸດໃນບັນດາກະສັດທັງຫຼາຍຂອງອິດສະຣາເອນ ເປັນຜູ້ເຮັດການກໍ່ສ້າງພຣະວິຫານໃຫ້ສຳເລັດ. ພຣະວິຫານຫຼັງນັ້ນເປັນອາຄານທີ່ງົດງາມທີ່ສຸດໃນປະຫວັດສາດ. ແຕ່ພຣະເຈົ້າຊົງກ່າວຜ່ານຜູ້ເຜີຍພຣະທຳຂອງພຣະອົງທີ່ຊື່ຮັກກາຍ ເຖິງພຣະວິຫານຫຼັງທີສອງນີ້ວ່າ: “ພຣະວິຫານຫຼັງໃໝ່ນີ້ຈະສະຫງ່າງາມກວ່າຫຼັງເກົ່າ.” “ເຮົາຈະເຮັດໃຫ້ບັນດາປະຊາຊາດສະທ້ານຫວັ່ນໄຫວ ເພື່ອຄວາມປາຖະໜາຂອງປະຊາຊາດທັງຫຼາຍຈະໄດ້ເຂົ້າມາ. ເຮົາຈະບັນຈຸວິຫານນີ້ໃຫ້ເຕັມດ້ວຍສະຫງ່າຣາສີ, ພຣະເຢໂຮວາຜູ້ຊົງຣິດອຳນາດຍິ່ງໃຫຍ່ຊົງກ່າວໄວ້ດັ່ງນີ້.” (ຮັກກາຍ 2:9, 7 ດັດແປງຈາກສະບັບ TKJV). {GC 23.2}
ຫຼັງຈາກກະສັດເນບູກາດເນັດຊາທຳລາຍພຣະວິຫານແລ້ວ ກໍມີການສ້າງພຣະວິຫານຫຼັງໃໝ່ຂຶ້ນມາປະມານ 500 ປີກ່ອນພຣະຄຣິສຊົງບັງເກີດ. ຜູ້ທີ່ກໍ່ສ້າງແມ່ນພວກທີ່ກັບມາຈາກການເປັນຊະເລີຍເສິກເປັນເວລາດົນນານ; ພວກເຂົາພົບເຫັນບ້ານເມືອງຖືກທຳລາຍໝົດ ແລະ ມີຜູ້ຄົນອາໄສພຽງໜ້ອຍດຽວ. ທ່າມກາງພວກຊະເລີຍເສິກທີ່ກັບມານັ້ນ ກໍມີຊາຍຊະລາບາງຄົນ ທີ່ເຄີຍເຫັນຄວາມສະຫງ່າງາມຂອງພຣະວິຫານ ທີ່ກະສັດໂຊໂລໂມນສ້າງ. ຄົນເຫຼົ່ານີ້ຮ້ອງໄຫ້ສຽງດັງ ເມື່ອເຫັນຮາກຖານຂອງອາຄານພຣະວິຫານຫຼັງໃໝ່ ເພາະເຫັນວ່າດ້ອຍກວ່າຫຼັງທຳອິດຫຼາຍ. ຜູ້ເຜີຍພຣະທຳໄດ້ບັນລະຍາຍເຖິງຄວາມຮູ້ສຶກຂອງຄົນເຫຼົ່ານັ້ນໃຫ້ເຫັນພາບວ່າ: “ໃນທ່າມກາງພວກເຈົ້າມີຜູ້ໃດແດ່ ທີ່ຍັງລະນຶກຄິດເຖິງຄວາມສະຫງ່າງາມຄັ້ງທຳອິດຂອງພຣະວິຫານໄດ້? ມາບັດນີ້ ພວກເຈົ້າເບິ່ງເຫັນເປັນຈັ່ງໃດ? ບໍ່ເຫັນມີຄຸນຄ່າຫຍັງເລີຍແມ່ນບໍ.” (ຮັກກາຍ 2:3; ເອຊະຣາ 3:12). ແລ້ວໃນຕອນນັ້ນ ພຣະເຈົ້າຊົງໃຫ້ຄຳສັນຍາວ່າ ຫຼັງໃໝ່ນີ້ຈະຍິ່ງໃຫຍ່ກວ່າຫຼັງທຳອິດ. {GC 23.3}
ແຕ່ພຣະວິຫານຫຼັງທີສອງບໍ່ໄດ້ສະຫງ່າງາມເທົ່າຫຼັງທຳອິດ ແລະ ກໍບໍ່ມີແສງຣັດສະໝີຂອງພຣະເຈົ້າປາກົດໃຫ້ເຫັນວ່າພຣະອົງສະຖິດຢູ່ ເໝືອນທີ່ເກີດຂຶ້ນໃນພຣະວິຫານຫຼັງທຳອິດ. ໃນພິທີເປີດ ກໍບໍ່ມີການສຳແດງຣິດອຳນາດຂອງພຣະເຈົ້າທີ່ເໜືອທຳມະຊາດ, ບໍ່ມີໄຟຕົກລົງມາຈາກຟ້າສະຫວັນ ເພື່ອເຜົາເຄື່ອງບູຊາທີ່ວາງໄວ້ເທິງແທ່ນບູຊາ. ໃນສະຖານທີ່ສັກສິດທີ່ສຸດ ກໍບໍ່ມີຣັດສະໝີຂອງພຣະເຈົ້າລະຫວ່າງເຄຣຸບ, ບໍ່ມີຫີບພັນທະສັນຍາ, ບໍ່ມີຝາອັດຫີບທີ່ເອີ້ນວ່າພຣະທີ່ນັ່ງແຫ່ງກະລຸນາ, ບໍ່ມີແຜ່ນສິລາທີ່ບັນທຶກພັນທະສັນຍາ ແລະ ບໍ່ມີພຣະສຸຣະສຽງຂອງພຣະເຈົ້າດັງກ້ອງລົງມາຈາກຟ້າສະຫວັນ ເພື່ອເປີດເຜີຍໃຫ້ປະໂຣຫິດຮູ້ເຖິງນ້ຳພຣະໄທຂອງພຣະເຢໂຮວາ. {GC 24.1}
ຄົນຢິວພະຍາຍາມຢູ່ຫຼາຍຮ້ອຍປີເພື່ອອະທິບາຍວ່າ ພຣະສັນຍາຂອງພຣະເຈົ້າທີ່ຊົງກ່າວຜ່ານຜູ້ເຜີຍພຣະທຳຮັກກາຍນັ້ນສຳເລັດແນວໃດ; ແຕ່ຄວາມຫຍິ່ງຜະຫຍອງເຮັດໃຫ້ພວກເຂົາຕາບອດ ແລະ ຍ້ອນວ່າບໍ່ມີຄວາມເຊື່ອ ພວກເຂົາຈຶ່ງບໍ່ສາມາດເຂົ້າໃຈເຖິງຄວາມໝາຍອັນແທ້ຈິງຂອງຜູ້ເຜີຍພຣະທຳ. ພຣະວິຫານຫຼັງທີສອງ ບໍ່ໄດ້ຮັບກຽດຈາກການປາກົດແຫ່ງແສງຣັດສະໝີຂອງພຣະເຢໂຮວາກໍຈິງ ແຕ່ໄດ້ຮັບກຽດເມື່ອອົງພຣະຜູ້ເປັນເຈົ້າໃນສະພາບມະນຸດສະເດັດເຂົ້າໄປໃນພຣະວິຫານນັ້ນ, ເພາະໃນພຣະເຢຊູຄຣິສ ສະພາບຂອງພຣະເຈົ້າດຳລົງຢູ່ໃນພຣະກາຍຢ່າງເຕັມບໍຣິບູນ. “ຄວາມປາຖະໜາຂອງປະຊາຊາດທັງຫຼາຍ” ໄດ້ສະເດັດມາທີ່ພຣະວິຫານຂອງພຣະອົງຢ່າງແທ້ຈິງ ເມື່ອພຣະເຢຊູໄທນາຊາເຣັດສັ່ງສອນ ແລະ ຮັກສາພະຍາດຢູ່ໃນພຣະວິຫານນັ້ນ. ມີແຕ່ເລື່ອງການສະຖິດຢູ່ຂອງພຣະຄຣິສເລື່ອງດຽວ ທີ່ເຮັດໃຫ້ພຣະວິຫານຫຼັງທີສອງມີຄວາມຮຸ່ງເຮືອງກວ່າຫຼັງທຳອິດ. ແຕ່ຄົນອິດສະຣາເອນໄດ້ປະຕິເສດພຣະອົງຜູ້ທີ່ສະຫວັນໃຊ້ມາເພື່ອໂຜດພວກເຂົາ. ເມື່ອພຣະອາຈານຜູ້ອ່ອນສຸພາບສະເດັດອອກຈາກປະຕູຄຳແຫ່ງພຣະວິຫານໃນມື້ນັ້ນ ສະຫງ່າຣາສີໄດ້ພາກຈາກພຣະວິຫານໄປໂດຍບໍ່ມີວັນຫວນຄືນ. ຖ້ອຍຄຳຂອງພຣະຜູ້ໄຖ່ໄດ້ສຳເລັດແລ້ວ: “ພຣະວິຫານຂອງພວກເຈົ້າຈຶ່ງຖືກປະຖິ້ມໃຫ້ຮ້າງເປົ່າຢ່າງໝົດສິ້ນ.” (ມັດທາຍ 23:38). {GC 24.2}
ພວກສາວົກຮູ້ສຶກປະຫຼາດໃຈ ກັບຄຳທຳນວາຍຂອງພຣະຄຣິສເລື່ອງພຣະວິຫານຈະຖືກທຳລາຍ ຈຶ່ງຢາກຮູ້ເພີ່ມເຕີມວ່າ ພຣະອົງໝາຍຄວາມວ່າແນວໃດ. ມີການທຸ້ມເທຊັບສິນ, ແຮງງານ ແລະ ຝີມືດ້ານສະຖາປັດຕະຍະກຳຢ່າງຫຼວງຫຼາຍກວ່າ 40 ປີ ເພື່ອຕົບແຕ່ງຕຶກອາຄານຂອງພຣະວິຫານໃຫ້ງາມຂຶ້ນ. ກະສັດເຮໂຣດມະຫາຣາດໄດ້ມອບຊັບສິນຂອງໂຣມ ແລະ ສົມບັດຂອງຊາວຢິວຢ່າງລົ້ນເຫຼືອ ເພື່ອປະກອບສ່ວນໃນການກໍ່ສ້າງ; ແມ່ນແຕ່ຈັກກະພັດກໍໄດ້ສົ່ງຂອງປະທານມາ ເພື່ອເພີ່ມຄວາມຫຼູຫຼາໃຫ້ແກ່ພຣະວິຫານນັ້ນ. ມີຫີນອ່ອນສີຂາວຂະໜາດໃຫຍ່ມະຫຶມາຖືກສົ່ງມາຈາກນະຄອນໂຣມ ເພື່ອການບູລະນະຕົບແຕ່ງ. ພວກສາວົກກໍຊີ້ໃຫ້ພຣະອາຈານເບິ່ງກ້ອນຫີນເຫຼົ່ານັ້ນ ໂດຍເວົ້າວ່າ: “ເບິ່ງແມ, ອາຈານເອີຍ! ຫີນຄືກ້ອນໃຫຍ່ແທ້! ອາຄານເຫຼົ່ານີ້ຊ່າງງົດງາມແທ້!” (ມາຣະໂກ 13:1 LCV). {GC 24.3}
ພຣະເຢຊູຊົງຕອບດ້ວຍຖ້ອຍຄຳທີ່ໜັກແໜ້ນ ແລະ ເປັນຕາໜ້າຕົກໃຈວ່າ: “ເຮົາບອກພວກເຈົ້າຕາມຄວາມຈິງວ່າ, ຫີນທຸກໆກ້ອນທີ່ຢອງທັບກັນຢູ່ນີ້ ຈະຖືກທຳລາຍລົງຈົນບໍ່ເຫຼືອຈັກກ້ອນ.” (ມັດທາຍ 24:2). {GC 25.1}
ພໍໄດ້ຍິນເຖິງການທຳລາຍຂອງນະຄອນເຢຣູຊາເລັມ ພວກສາວົກຄິດໄດ້ແຕ່ວ່າ ຕ້ອງແມ່ນການສະເດັດມາຂອງອົງພຣະຄຣິສ ເພື່ອຄອບຄອງອານາຈັກທັງຫຼາຍໃນໂລກ, ເພື່ອລົງໂທດຄົນຢິວທີ່ບໍ່ຍອມກັບໃຈ ແລະ ເພື່ອປົດແອກຂອງອານາຈັກໂຣມໃຫ້ຊົນຊາດອິດສະຣາເອນເປັນອິດສະຫຼະ. ພຣະເຢຊູເຄີຍບອກພວກສາວົກວ່າ ພຣະອົງຈະສະເດັດມາເປັນເທື່ອທີສອງ; ສະນັ້ນ, ເມື່ອພຣະອົງກ່າວເຖິງການລົງໂທດນະຄອນເຢຣູຊາເລັມ ພວກເຂົາຈຶ່ງຄິດເຖິງການສະເດັດມາຄັ້ງທີສອງຂອງພຣະອົງ. ໃນຂະນະທີ່ຍັງນັ່ງຢູ່ກັບພຣະອົງເທິງພູເຂົາໝາກກອກເທດ ພວກເຂົາຈຶ່ງຖາມວ່າ: “ຈົ່ງບອກພວກຂ້ານ້ອຍແດ່ວ່າ ເຫດການທັງໝົດນັ້ນຈະເກີດຂຶ້ນເມື່ອໃດ? ແລະມີສິ່ງໃດເປັນໝາຍສຳຄັນ ເພື່ອຊີ້ໃຫ້ເຫັນວ່າ ແມ່ນເວລາມາປາກົດຂອງທ່ານ ແລະ ເວລາສິ້ນສຸດຂອງໂລກ?” (ມັດທາຍ 24:3). {GC 25.2}
ພຣະເຢຊູຊົງເມດຕາພວກສາວົກ ຈຶ່ງປິດບັງອະນາຄົດໄວ້ຈາກພວກເຂົາ. ຖ້າຫາກວ່າໃນເວລານັ້ນ ພວກເຂົາໄດ້ຮັບຮູ້ເລື່ອງທີ່ຮ້າຍແຮງສອງເລື່ອງ ຄືການສິ້ນພຣະຊົນຢ່າງທຸກທໍລະມານຂອງພຣະຜູ້ໄຖ່ ແລະ ການທຳລາຍນະຄອນກັບພຣະວິຫານຂອງພວກເຂົາ ສາວົກຄົງຈະຕົກໃຈຢ້ານຈົນເຮັດຫຍັງບໍ່ໄດ້. ພຣະຄຣິສຈຶ່ງອະທິບາຍຫຍໍ້ໆ ເຖິງເຫດການຕ່າງໆທີ່ຈະເກີດຂຶ້ນກ່ອນການສິ້ນໂລກ. ໃນຂະນະນັ້ນ ພວກສາວົກບໍ່ໄດ້ເຂົ້າໃຈຄວາມໝາຍທັງໝົດ, ແຕ່ເມື່ອຄົນຂອງພຣະເຈົ້າຕ້ອງການຄວາມກະຈ່າງແຈ້ງເພີ່ມເຕີມ ພຣະອົງຈະຊ່ວຍໃຫ້ພວກເຂົາເຂົ້າໃຈຄຳສອນດັ່ງກ່າວໃຫ້ຫຼາຍຂຶ້ນ. ຄຳທຳນວາຍຂອງພຣະອົງມີສອງຄວາມໝາຍຄື: ຄວາມໝາຍທີໜຶ່ງ ແມ່ນກ່າວເຖິງການທຳລາຍນະຄອນເຢຣູຊາເລັມ, ສ່ວນຄວາມໝາຍທີສອງ ກ່າວເຖິງເຫດການອັນເປັນຕາຢ້ານກ່ອນວັນສິ້ນໂລກ. {GC 25.3}
ພຣະເຢຊູຊົງກ່າວໃຫ້ພວກສາວົກທີ່ນັ່ງຟັງ ເຖິງການລົງໂທດຊົນຊາດອິດສະຣາເອນທີ່ຫຼົງໄປຈາກພຣະເຈົ້າ ໂດຍສະເພາະແມ່ນໂທດທີ່ຈະຕ້ອງຮັບຍ້ອນການປະຕິເສດພຣະຄຣິສຜູ້ທີ່ພຣະເຈົ້າຊົງໃຊ້ມາ ເພື່ອຊົງໂຜດພວກເຂົາ ແລະ ໂທດຂອງພວກເຂົາທີ່ຄຶງພຣະອົງໄວ້ເທິງໄມ້ກາງແຂນ. ຈະມີໝາຍສຳຄັນແຈ່ມແຈ້ງແນ່ນອນ ບົ່ງບອກເຖິງການທຳລາຍນະຄອນ; ເວລາທີ່ໜ້າຢ້ານຫຼາຍນັ້ນຈະມາເຖິງຢ່າງກະທັນຫັນ. ພຣະຜູ້ໂຜດໃຫ້ພົ້ນຈຶ່ງເຕືອນຜູ້ຕິດຕາມພຣະອົງວ່າ: “ພວກເຈົ້າຈະເຫັນ ‘ສິ່ງປະຫຼາດອັນໜ້າຢ້ານ’ ທີ່ເຮັດໃຫ້ເກີດວິບັດ ຕັ້ງຢູ່ໃນພຣະວິຫານອັນສັກສິດຂອງພຣະເຈົ້າ ຕາມທີ່ຜູ້ທຳນວາຍດານີເອນໄດ້ກ່າວໄວ້. (ໃຫ້ຜູ້ອ່ານເຂົ້າໃຈເອງ). ເມື່ອນັ້ນ ໃຫ້ຜູ້ທີ່ຢູ່ໃນແຂວງຢູດາຍ ຕ້ອງປົບໜີໄປຍັງພູທັງຫຼາຍ.” (ມັດທາຍ 24:15, 16; ລູກາ 21:20, 21). ເມື່ອທຸງຂອງໂຣມ ອັນເປັນສັນຍະລັກຂອງການຂາບໄຫວ້ຮູບເຄົາລົບ ຖືກປັກໄວ້ໃນອານາເຂດສັກສິດ ເຊິ່ງຮວມທີ່ດິນຢູ່ນອກກຳແພງເມືອງຫຼາຍຮ້ອຍແມັດ, ນັ້ນເປັນໝາຍສຳຄັນ ໃຫ້ຜູ້ຕິດຕາມພຣະຄຣິສປົບໜີເພື່ອຄວາມປອດໄພ. ເມື່ອພວກເຂົາເຫັນໝາຍສຳຄັນທີ່ເຕືອນໄພນັ້ນ ກໍຕ້ອງຟ້າວໜີໂດຍບໍ່ຕ້ອງລໍຊ້າ. ເມື່ອສັນຍານທີ່ໃຫ້ໜີນັ້ນປາກົດແລ້ວ ຄົນທີ່ຢູ່ທົ່ວແຂວງຢູດາຍ ແລະ ຜູ້ທີ່ຢູ່ພາຍໃນນະຄອນເຢຣູຊາເລັມເອງ ຕ້ອງເຊື່ອຟັງ ແລະ ປະຕິບັດຕາມທັນທີ. ຜູ້ທີ່ບັງເອີນຢູ່ເທິງລະບຽງຫຼັງຄາໃນເວລານັ້ນ ຈະຕ້ອງບໍ່ເຂົ້າບ້ານ ເພື່ອໄປເອົາຂອງມີຄ່າທີ່ຕົນຫວງແຫນທີ່ສຸດ. ຜູ້ທີ່ຢູ່ຕາມໄຮ່ນາ ບໍ່ຕ້ອງເມືອເອົາເສື້ອກັນໜາວທີ່ປະວາງໄວ້ເມື່ອເຮັດວຽກຍາມແດດຮ້ອນ; ພວກເຂົາຈະຕ້ອງໜີ ໂດຍບໍ່ລັງເລແມ່ນແຕ່ໜ້ອຍ ເພື່ອຈະບໍ່ຖືກທຳລາຍພ້ອມກັບຄົນອື່ນໆ. {GC 25.4}
ໃນຊ່ວງເວລາທີ່ກະສັດເຮໂຣດປົກຄອງຢູ່ນັ້ນ, ນະຄອນເຢຣູຊາເລັມໄດ້ຮັບການເສີມແຕ່ງໃຫ້ສວຍສົດງົດງາມຫຼາຍຂຶ້ນກວ່າເກົ່າ ແລະ ໄດ້ມີການກໍ່ສ້າງຫໍຄອຍກັບປ້ອມຍາມ, ມີການຕໍ່ເຕີມກຳແພງເມືອງໃຫ້ເຂັ້ມແຂງຂຶ້ນ. ໂດຍທຳມະຊາດແລ້ວ ສະຖານທີ່ທີ່ຕັ້ງຂອງນະຄອນເຢຣູຊາເລັມປ້ອງກັນໄດ້ງ່າຍ, ແຕ່ເນື່ອງຈາກການກໍ່ສ້າງເສີມແຕ່ງຂອງກະສັດເຮໂຣດ ທຸກຄົນຖືວ່ານະຄອນນີ້ໜຽວແໜ້ນ ບໍ່ສາມາດຕີໃຫ້ແຕກໄດ້. ໃນເວລານັ້ນ ຖ້າຜູ້ໃດປະກາດໃນທີ່ສາທາລະນະວ່າ ນະຄອນເຢຣູຊາເລັມຈະຖືກທຳລາຍ ຄົນທັງຫຼາຍຈະຫາວ່າເປັນຄົນບ້າເສຍສະຕິ ແລະ ຕື່ນຂ່າວລື ເໝືອນຄົນໃນສະໄໝນ້ຳຖ້ວມໂລກຫົວຂວັນໂນອາ. ພຣະຄຣິສຊົງກ່າວວ່າ: “ຟ້າ ແລະ ແຜ່ນດິນກໍຈະລ່ວງພົ້ນໄປ, ແຕ່ຖ້ອຍຄຳຂອງເຮົາຈະບໍ່ລ່ວງໄປຈັກເທື່ອ.” (ມັດທາຍ 24:35). ພຣະເຈົ້າຊົງຕັດສິນລົງໂທດນະຄອນນີ້ ເພາະຄວາມຜິດບາບຂອງຄົນທີ່ອາໄສຢູ່ໃນນັ້ນ; ສ່ວນການທີ່ພວກເຂົາດື້ດ້ານບໍ່ຍອມເຊື່ອ ເປັນເຫດໃຫ້ການລົງໂທດນັ້ນຕ້ອງເກີດຂຶ້ນຢ່າງແນ່ນອນ. {GC 26.1}
ພຣະເຈົ້າຊົງກ່າວຜ່ານຜູ້ເຜີຍພຣະທຳມີກາວ່າ: “ຈົ່ງຟັງຂ້າພະເຈົ້າເທີ້ນ ບັນດາຜູ້ນຳຊາດອິດສະຣາເອນເອີຍ ພວກເຈົ້າທີ່ກຽດຊັງຄວາມຍຸຕິທຳ ແລະ ປ່ຽນຖືກໃຫ້ເປັນຜິດ. ພວກເຈົ້າກຳລັງສ້າງນະຄອນເຢຣູຊາເລັມ ນະຄອນຂອງພຣະເຈົ້າ ຢູ່ເທິງພື້ນຖານແຫ່ງຄາຕະກຳ ແລະ ຄວາມອະຍຸຕິທຳ. ພວກຜູ້ປົກຄອງເມືອງ ກໍປົກຄອງດ້ວຍເຫັນແກ່ສິນບົນ, ພວກປະໂຣຫິດ ກໍແປກົດບັນຍັດດ້ວຍເຫັນແກ່ຄ່າຈ້າງລາງວັນ, ພວກຜູ້ທຳນວາຍ ກໍບອກນິມິດຂອງຕົນດ້ວຍເຫັນແກ່ເງິນ ແລະ ພວກເຂົາທຸກຄົນຕ່າງກໍອ້າງວ່າ ອົງພຣະຜູ້ເປັນເຈົ້າຢູ່ກັບພວກຕົນ. ພວກເຂົາເວົ້າວ່າ, ‘ເຫດຮ້າຍໃດໆ ຈະບໍ່ມາຖືກພວກເຮົາດອກ ເພາະອົງພຣະຜູ້ເປັນເຈົ້າສະຖິດຢູ່ນຳພວກເຮົາ.’” (ມີກາ 3:9–11). {GC 26.2}
ຖ້ອຍຄຳເຫຼົ່ານີ້ ບັນລະຍາຍເຖິງລັກສະນະຂອງຊາວນະຄອນເຢຣູຊາເລັມທີ່ເປັນຄົນສໍ້ໂກງ ໃນຂະນະທີ່ຫຼົງຕົວເອງວ່າເປັນຄົນຊອບທຳ. ພວກເຂົາອ້າງວ່າ ຕົນໄດ້ປະຕິບັດຕໍ່ກົດບັນຍັດຂອງພຣະເຈົ້າຢ່າງເຄັ່ງຄັດ ໃນຂະນະທີ່ກຳລັງເຮັດຜິດຕໍ່ຫຼັກການທຸກຂໍ້ຂອງກົດບັນຍັດເຫຼົ່ານັ້ນ. ພວກເຂົາກຽດຊັງພຣະຄຣິສ ເພາະວ່າຄວາມບໍຣິສຸດຂອງພຣະອົງເປີດເຜີຍຄວາມຜິດບາບຂອງຕົນ. ຄົນເຫຼົ່ານັ້ນກ່າວຫາວ່າ ພຣະອົງເປັນຕົ້ນເຫດທີ່ພວກເຂົາຕ້ອງຮັບຄວາມລຳບາກ ອັນເປັນຜົນຂອງຄວາມບາບຂອງພວກເຂົາເອງ. ເຖິງແມ່ນພວກເຂົາວ່າພຣະອົງບໍ່ມີບາບ ແຕ່ກໍປະກາດວ່າ ພຣະອົງຕ້ອງຕາຍ ເພື່ອຄວາມຢູ່ລອດຂອງບ້ານເມືອງ. ເຫຼົ່າຜູ້ນຳຊາວຢິວກ່າວວ່າ: “ຖ້າພວກເຮົາປ່ອຍໃຫ້ລາວເຮັດຢູ່ຢ່າງນີ້ແລ້ວ ຄົນທັງຫຼາຍກໍຈະເຊື່ອລາວ ແລະ ພວກເຈົ້າໜ້າທີ່ໂຣມກໍຈະມາທຳລາຍພຣະວິຫານກັບປະເທດຊາດຂອງພວກເຮົາ.” (ໂຢຮັນ 11:48). ຖ້າຍອມໃຫ້ພຣະຄຣິສຖືກຂ້າແລ້ວ ພວກເຂົາກໍອາດຈະຮວມຕົວກັນເປັນຊາດທີ່ໝັ້ນຄົງແຂງແກ່ນ. ພວກເຂົາໃຫ້ເຫດຜົນຢ່າງນີ້ແຫຼະ ຈຶ່ງຕົກລົງຕາມຄຳຕັດສິນຂອງມະຫາປະໂຣຫິດຂອງພວກຕົນວ່າ ຈະເປັນການດີກວ່າ ຖ້າໃຫ້ຜູ້ໜຶ່ງຕາຍ ແທນທີ່ຄົນທັງຊາດຕ້ອງພິນາດ. {GC 27.1}
ດັ່ງນີ້ແຫຼະ ຜູ້ນຳຊາວຢິວຈຶ່ງ “ສ້າງນະຄອນເຢຣູຊາເລັມນະຄອນຂອງພຣະເຈົ້າ ຢູ່ເທິງພື້ນຖານແຫ່ງຄາຕະກຳ ແລະ ຄວາມອະຍຸຕິທຳ.” (ມີກາ 3:10). ໃນຂະນະທີ່ພວກເຂົາຂ້າພຣະຜູ້ຊ່ວຍໃຫ້ລອດຂອງຕົນເອງ ເພາະພຣະອົງຊົງຕັກເຕືອນພວກເຂົາໃນເລື່ອງຄວາມບາບ, ຄົນເຫຼົ່ານັ້ນກັບຫຼົງຕົວເອງວ່າເປັນຄົນຊອບທຳ ແລະ ເປັນຊົນຊາດທີ່ພຣະເຈົ້າຊົງກະລຸນາ ຈຶ່ງຄາດຫວັງໃຫ້ພຣະເຈົ້າຊ່ວຍກູ້ພວກເຂົາຈາກອຳນາດຂອງສັດຕູ. ຜູ້ເຜີຍພຣະທຳຈຶ່ງກ່າວຕໍ່ໄປອີກວ່າ: “ສະນັ້ນແຫຼະ ເພາະພວກເຈົ້າ ພູເຂົາຊີໂອນຈະຖືກໄຖເໝືອນໄຖນາ ນະຄອນເຢຣູຊາເລັມຈະກາຍເປັນກອງສິ່ງຮົກຮ້າງເພພັງ ແລະ ເນີນພູບ່ອນທີ່ຕັ້ງພຣະວິຫານກໍຈະກາຍເປັນປ່າ.” (ມີກາ 3:12). {GC 27.2}
ພຣະເຈົ້າຊົງຖ່ວງເວລາການລົງໂທດນະຄອນເຢຣູຊາເລັມເກືອບ 40 ປີ ຫຼັງຈາກພຣະຄຣິສປະກາດວ່ານະຄອນເຢຣູຊາເລັມຈະຕ້ອງຖືກທຳລາຍ. ພຣະເຈົ້າຊົງກະລຸນາອົດກັ້ນຕໍ່ຄົນທີ່ປະຕິເສດບໍ່ຮັບຂ່າວປະເສີດ ແລະ ຕໍ່ຄົນເຫຼົ່ານັ້ນທີ່ໄດ້ຂ້າພຣະບຸດຂອງພຣະອົງ. ຄຳອຸປະມາເລື່ອງຕົ້ນໝາກເດື່ອເທດທີ່ບໍ່ເກີດຜົນ ປຽບເໝືອນກັບການປະຕິບັດຂອງພຣະເຈົ້າຕໍ່ຊົນຊາດຢິວ. ມີການປະກາດສັ່ງວ່າ, “ຈົ່ງປ້ຳມັນຖິ້ມເສຍ ຈະເອົາໄວ້ໃຫ້ຮົກດິນລ້າໆເຮັດຫຍັງ?” (ລູກາ 13:7). ແຕ່ດ້ວຍພຣະເມດຕາກະລຸນາຂອງພຣະເຈົ້າ ຕົ້ນນັ້ນບໍ່ຖືກຕັດຖິ້ມໃນທັນທີທັນໃດ. ເຊັ່ນດຽວກັນ, ຍັງມີຄົນຢິວຫຼາຍຄົນທີ່ບໍ່ຮູ້ຈັກອຸປະນິໄສ ແລະ ພາລະກິດຂອງພຣະຄຣິສ, ໃນຂະນະດຽວກັນນັ້ນ ລູກຫຼານຍັງບໍ່ມີໂອກາດຮັບຮູ້ເຖິງແສງສະຫວ່າງທີ່ພໍ່ແມ່ປະຕິເສດ. ພຣະເຈົ້າຊົງປາຖະໜາທີ່ຈະສ່ອງສະຫວ່າງໃຫ້ຄົນຢິວຜ່ານການເທດສະໜາຂອງພວກອັກຄະສາວົກ ແລະ ຜູ້ທີ່ຮ່ວມມືກັບພວກເຂົາ ເພື່ອໃຫ້ຄົນຢິວເຂົ້າໃຈວ່າ ຄຳຂອງພວກຜູ້ເຜີຍພຣະທຳໄດ້ສຳເລັດລົງແນວໃດ ບໍ່ພຽງແຕ່ໃນການບັງເກີດ ແລະ ໃນຊີວິດຂອງພຣະຄຣິສເທົ່ານັ້ນ ແຕ່ໃນການສິ້ນພຣະຊົນ ແລະ ການຟື້ນຄືນພຣະຊົນຊີບອີກດ້ວຍ. ພຣະເຈົ້າບໍ່ໄດ້ກ່າວໂທດລູກຍ້ອນຄວາມຜິດບາບຂອງພໍ່ແມ່, ແຕ່ເມື່ອລູກຮັບຮູ້ເຖິງແສງສະຫວ່າງທີ່ພໍ່ແມ່ເຄີຍໄດ້ຮັບ ແລະ ຍັງປະຕິເສດແສງສະຫວ່າງເພີ່ມເຕີມທີ່ພຣະເຈົ້າກະລຸນາສ່ອງມາຍັງຕົນ ກໍເທົ່າກັບວ່າສົມຮູ້ຮ່ວມຄິດໃນບາບຂອງພໍ່ແມ່, ຄວາມຜິດບາບນັ້ນກໍຖືວ່າເຕັມອັດຕາ. {GC 27.3}
ແຕ່ການອົດທົນຢ່າງດົນນານຂອງພຣະເຈົ້າຕໍ່ຊາວນະຄອນເຢຣູຊາເລັມ ມີແຕ່ເຮັດໃຫ້ພວກເຂົາດື້ດ້ານບໍ່ຍອມກັບໃຈຫຼາຍຂຶ້ນກວ່າເກົ່າ. ພວກເຂົາກຽດຊັງພວກສາວົກຂອງພຣະເຢຊູ ແລະ ປະຕິບັດຕໍ່ຜູ້ຕິດຕາມພຣະຄຣິສຢ່າງໂຫດຮ້າຍທາລຸນ ເຊິ່ງເປັນການປະຕິເສດຄວາມເມດຕາເທື່ອສຸດທ້າຍ. ເວລານັ້ນ ພຣະເຈົ້າຈຶ່ງຖອນການປົກປ້ອງຄຸ້ມຄອງອອກຈາກພວກເຂົາ ແລະ ຍົກເລີກການຢັບຢັ້ງອຳນາດຂອງຊາຕານກັບພວກທູດຂອງມັນ. ແລ້ວຊົນຊາດອິດສະຣາເອນ ຈຶ່ງຕົກຢູ່ໃນມືຂອງຜູ້ນຳທີ່ພວກເຂົາໄດ້ເລືອກເອງ. ຊາວເມືອງໄດ້ດູຖູກພຣະຄຸນຂອງພຣະຄຣິສ ທີ່ສາມາດຊ່ວຍພວກເຂົາໃນການຄວບຄຸມຄວາມຄິດຊົ່ວ, ຄວາມຄິດຊົ່ວຈຶ່ງຄວບຄຸມພວກເຂົາແທນ. ຊາຕານຍົວະຄົນທັງຫຼາຍໃຫ້ເກີດອາລົມຕ່ຳຊ້າ ແລະ ປ່າເຖື່ອນ ຈົນກາຍເປັນຄົນທີ່ບໍ່ມີເຫດຜົນ, ພວກເຂົາໃຈຮ້າຍເປັນຟືນເປັນໄຟ ຈົນຕາບອດ ແລະ ໃຊ້ເຫດຜົນບໍ່ໄດ້. ພວກເຂົາໂຫດຫ້ຽມທາລຸນເໝືອນຊາຕານ; ບໍ່ວ່າຢູ່ໃນຄອບຄົວ ຫຼື ໃນສັງຄົມທົ່ວໄປ ຄົນຊົນຊັ້ນສູງ ຫຼື ຊັ້ນຕ່ຳກໍເກີດຄວາມຫວາດລະແວງ, ຄວາມອິດສາ, ຄວາມກຽດຊັງ, ການຜິດຖຽງກັນ, ການຫັກຫຼັງກັນ ແລະ ການຂ້າກັນທົ່ວໜ້າ. ບໍ່ມີບ່ອນໃດປອດໄພ, ຍາດຕິພີ່ນ້ອງ ແລະ ໝູ່ເພື່ອນກໍຫັກຫຼັງກັນ; ມີພໍ່ແມ່ຂ້າລູກ ແລະ ລູກຂ້າພໍ່ແມ່. ບັນດາຜູ້ປົກຄອງປະຊາຊົນບໍ່ສາມາດປົກຄອງໃຈຕົນເອງໄດ້, ເມື່ອຄວບຄຸມອາລົມບໍ່ໄດ້ ກໍກາຍເປັນຄົນທີ່ໃຊ້ອຳນາດຢ່າງປ່າເຖື່ອນ. ຄົນຢິວຍອມຟັງພະຍານເທັດ ເພື່ອກ່າວໂທດພຣະບຸດຂອງພຣະເຈົ້າຜູ້ບໍ່ມີຄວາມຜິດ; ບັດນີ້, ການເປັນພະຍານເທັດໃສ່ຮ້າຍກັນ ເຮັດໃຫ້ຊີວິດຂອງພວກເຂົາເອງບໍ່ແນ່ນອນ. ເປັນເວລາອັນດົນນານ ທີ່ການກະທຳຂອງຊາວເມືອງເປັນໄປຕາມຖ້ອຍຄຳທີ່ກ່າວວ່າ: “ພວກເຮົາບໍ່ຢາກຟັງເຖິງເລື່ອງພຣະເຈົ້າອົງບໍຣິສຸດຂອງຊາດອິດສະຣາເອນ.” (ເອຊາຢາ 30:11). ບັດນີ້, ຄວາມປາຖະໜາຂອງພວກເຂົາໄດ້ຮັບການຕອບສະໜອງ. ຄວາມຢຳເກງພຣະເຈົ້າບໍ່ໄດ້ລົບກວນຈິດໃຈຂອງພວກເຂົາອີກແລ້ວ, ຊາຕານເປັນຜູ້ນຳຊາດ ແລະ ເຈົ້າໜ້າທີ່ສູງສຸດຝ່າຍການປົກຄອງ ແລະ ຝ່າຍສາສະໜາກໍຢູ່ໃຕ້ອຳນາດຂອງມັນ. {GC 28.1}
ມີການແບ່ງແຍກພັກພວກໃນສັງຄົມ. ບາງຄັ້ງຫົວໜ້າກຸ່ມຈັບມືກັບຝ່າຍກົງກັນຂ້າມເພື່ອປຸ້ນ ແລະ ທໍລະມານເຫຍື່ອຜູ້ເຄາະຮ້າຍ ແລ້ວກໍຫັນກັບມາຍົກກຳລັງຕໍ່ສູ້ກັນ ແລະ ຂ້າຟັນກັນຢ່າງບໍ່ຮູ້ປານີ; ແມ່ນແຕ່ສະຖານທີ່ສັກສິດຂອງພຣະວິຫານ ກໍບໍ່ສາມາດຢຸດຢັ້ງຄວາມໂຫດຮ້າຍຂອງພວກເຂົາລົງໄດ້. ມີການຂ້າຟັນຜູ້ມາຮ່ວມນະມັດສະການຕໍ່ໜ້າແທ່ນບູຊາເລີຍ, ພຣະວິຫານຈຶ່ງເປັນມົນທິນດ້ວຍຊາກສົບຂອງຜູ້ທີ່ຖືກຂ້າຕາຍ. ຄົນເຫຼົ່ານີ້ຕາບອດ ແລະ ຖືກຍົວະໃຫ້ເຮັດຕາມພາລະກິດຈາກແດນນະຣົກ ແຖມຍັງຫຼົງຕົວເອງຢ່າງໝິ່ນປະໝາດ. ພວກເຂົາກ່າວວ່າ ຕົນບໍ່ຢ້ານວ່ານະຄອນເຢຣູຊາເລັມຈະຖືກທຳລາຍ ເພາະວ່າເປັນນະຄອນຂອງອົງພຣະຜູ້ເປັນເຈົ້າເອງ. ແລ້ວເພື່ອຈະຮວບຮວມອຳນາດໄວ້, ພວກເຂົາໃຫ້ສິນບົນແກ່ຜູ້ເຜີຍພຣະທຳເທັດ ໃຫ້ປະກາດແກ່ປະຊາຊົນວ່າ ‘ຈົ່ງລໍຖ້າການຊ່ວຍກູ້ຈາກພຣະເຈົ້າ’ ແມ່ນວ່າໃນຂະນະນັ້ນ ກອງທັບໂຣມໄດ້ລ້ອມພຣະວິຫານໄວ້ແລ້ວກໍຕາມ. ປະຊາຊົນຈຳນວນຫຼວງຫຼາຍຫຼົງເຊື່ອຈົນເຖິງທີ່ສຸດວ່າ ພຣະເຈົ້າຜູ້ຊົງຣິດອຳນາດສູງສຸດ ຈະເຂົ້າແຊກສະຖານະການເພື່ອປາບປາມພວກສັດຕູໃຫ້ປະລາໄຊ. ແຕ່ຄົນອິດສະຣາເອນໄດ້ໝິ່ນປະໝາດການປົກປ້ອງຂອງພຣະເຈົ້າແລ້ວ ຈຶ່ງບໍ່ມີແນວປ້ອງກັນ, ໂອ ນະຄອນເຢຣູຊາເລັມເອີຍ ເຈົ້າເປັນທຸກແທ້ໜໍ! ເຈົ້າແຕກແຍກກັນພາຍໃນ. ຖະໜົນຫົນທາງຂອງເຈົ້າສີແດງກ່ຳ ຍ້ອນເລືອດຂອງລູກຫຼານທີ່ຂ້າກັນເອງ ໃນຂະນະທີ່ກອງທັບຄົນຕ່າງຊາດຕີຫໍຄອຍໃຫ້ພັງລົງ ແລະ ຂ້າທະຫານຂອງເຈົ້າໃຫ້ຕາຍ! {GC 29.1}
ຄຳທຳນວາຍຂອງພຣະຄຣິສ ກ່ຽວກັບການທຳລາຍນະຄອນເຢຣູຊາເລັມ ສຳເລັດລົງຕາມທີ່ຊົງກ່າວໄວ້ທຸກປະການ. ຄົນຢິວໄດ້ປະສົບຄວາມຈິງຂອງຖ້ອຍຄຳທີ່ພຣະອົງຊົງກ່າວ ເພື່ອຕັກເຕືອນພວກເຂົາວ່າ: “ເຈົ້າຈະຕວງໃຫ້ເຂົາດ້ວຍເຄື່ອງຜອງອັນໃດ ພຣະເຈົ້າກໍຈະຕວງໃຫ້ເຈົ້າດ້ວຍເຄື່ອງຜອງອັນນັ້ນ.” (ມັດທາຍ 7:2). {GC 29.2}
ມີໝາຍສຳຄັນ ແລະ ປາກົດການແປກປະຫຼາດເກີດຂຶ້ນ ເປັນລາງບອກເຖິງຄວາມຈິບຫາຍທີ່ຈວນຈະເຂົ້າມາ. ໃນກາງຄືນມີແສງເໜືອທຳມະຊາດ ສ່ອງມາເໜືອພຣະວິຫານ ແລະ ແທ່ນບູຊາ, ມີພາບລົດມ້າ ແລະ ທະຫານກຽມເຂົ້າສົງຄາມປາກົດຢູ່ໃນເມກຍາມຕາເວັນຕົກດິນ. ພວກປະໂຣຫິດທີ່ເຮັດໜ້າທີ່ໃນພຣະວິຫານຍາມກາງຄືນ ກໍຕົກໃຈຢ້ານເມື່ອໄດ້ຍິນສຽງແປກປະຫຼາດ. ເກີດແຜ່ນດິນໄຫວ ແລະ ມີສຽງຄົນຈຳນວນຫຼວງຫຼາຍຮ້ອງຂຶ້ນວ່າ: “ໃຫ້ເຮົາອອກໄປຈາກທີ່ນີ້ກັນເທາະ.” ປະຕູໃຫຍ່ດ້ານຕາເວັນຕົກໜັກຫຼາຍ ຈົນຜູ້ຊາຍຊາວຄົນຕ້ອງໃຊ້ກຳລັງຫຼາຍກວ່າຈະປິດໄດ້, ມີເຫຼັກແທ່ງໜາໃຫຍ່ສຽບເລິກລົງໄປໃນພື້ນຫີນເປັນໄລກອນ, ແຕ່ປະຕູນີ້ຖືກເປີດອອກໃນຍາມທ່ຽງຄືນເອງ ໂດຍບໍ່ເຫັນວ່າມີຜູ້ໃດເຮັດ.3 {GC 29.3}
ຕະຫຼອດເວລາເຈັດປີ ມີຊາຍຄົນໜຶ່ງຍ່າງຂຶ້ນຍ່າງລົງຕາມຖະໜົນຫົນທາງໃນນະຄອນເຢຣູຊາເລັມ ແລ້ວປະກາດເຖິງວິບັດທີ່ຈະເກີດຂຶ້ນກັບນະຄອນນັ້ນ. ລາວຂັບຮ້ອງບົດໄວ້ທຸກທັງເວັນທັງຄືນວ່າ: “ມີສຽງດັງມາຈາກຕາເວັນອອກ! ເກີດສຽງກ້ອງຈາກຕາເວັນຕົກ! ມີສຽງສະທ້ອນມາຈາກລົມທັງສີ່! ເປັນສຽງຕໍ່ສູ້ນະຄອນເຢຣູຊາເລັມ ແລະ ຕໍ່ສູ້ພຣະວິຫານ! ເປັນສຽງຕໍ່ຕ້ານບັນດາເຈົ້າບ່າວ ແລະ ເຈົ້າສາວ! ເປັນສຽງຕໍ່ສູ້ປະຊາຊົນທັງປວງ!”4 ຄົນປະຫຼາດນີ້ຖືກຕີ ແລະ ຖືກຂັງຄຸກ ແຕ່ກໍບໍ່ມີຄຳຈົ່ມຄຳວ່າອອກຈາກປາກຂອງລາວເລີຍ. ເມື່ອຖືກປ້ອຍດ່າ ຫຼື ຂົ່ມເຫັງ ລາວໄດ້ແຕ່ຕອບວ່າ: “ຈະເກີດວິບັດແລ້ວ! ວິບັດແກ່ນະຄອນເຢຣູຊາເລັມ! ແລະ ວິບັດແກ່ປະຊາຊົນທີ່ອາໄສຢູ່ໃນເມືອງ!” ລາວບໍ່ຢຸດຮ້ອງຕັກເຕືອນ ຈົນລາວຖືກຂ້າຕາຍໃນການປິດລ້ອມເມືອງທີ່ຕົນໄດ້ທຳນວາຍໄວ້. {GC 30.1}
ບໍ່ມີຄຣິສຕຽນເສຍຊີວິດເມື່ອນະຄອນເຢຣູຊາເລັມຖືກທຳລາຍແມ່ນແຕ່ຄົນດຽວ. ພຣະຄຣິສໄດ້ເຕືອນສາວົກຂອງພຣະອົງ ແລະ ທຸກຄົນທີ່ເຊື່ອຄຳຂອງພຣະອົງກໍເຝົ້າລໍຖ້າໝາຍສຳຄັນທີ່ພຣະອົງສັນຍາໄວ້. ພຣະເຢຊູຊົງກ່າວວ່າ: “ເມື່ອໃດເຈົ້າທັງຫຼາຍເຫັນກອງທັບຕ່າງໆ ມາຕັ້ງອ້ອມນະຄອນເຢຣູຊາເລັມ, ເມື່ອນັ້ນແຫຼະ ພວກເຈົ້າຈະຮູ້ວ່າ ເມືອງຈະຖືກທຳລາຍໃນໄວໆ. ເມື່ອນັ້ນ ໃຫ້ຜູ້ທີ່ຢູ່ໃນແຂວງຢູດາຍ ຕ້ອງປົບໜີໄປຍັງພູທັງຫຼາຍ, ໃຫ້ຜູ້ທີ່ຢູ່ໃນເມືອງຕ້ອງອອກໄປ.” (ລູກາ 21:20, 21). ຜູ້ບັນຊາການທະຫານ ໄກອຸສ ເຊຕຽວ ກາລຸສ (Gaius Cestius Gallus) ໄດ້ນຳກອງທັບໂຣມມາອ້ອມນະຄອນເຢຣູຊາເລັມ ແລ້ວກໍຖອນທັບກັບເມືອຢ່າງກະທັນຫັນໂດຍບໍ່ມີໃຜຄາດຄິດ. ກ່ອນທີ່ຈະຖອຍທັບໄປ ສະຖານະການເບິ່ງຄືເໝາະສົມໃຫ້ທະຫານໂຣມໂຈມຕີທັນທີ. ໃນຂະນະນັ້ນ ຊາວເມືອງເຢຣູຊາເລັມບໍ່ມີຄວາມຫວັງວ່າຈະສາມາດຕ້ານທານການບຸກໄວ້ໄດ້ ຈຶ່ງພ້ອມທີ່ຈະຍົກທຸງຂາວຍອມຈຳນົນຢູ່ແລ້ວ, ແຕ່ແມ່ທັບໂຣມກໍຖອຍທັບ ໂດຍບໍ່ປາກົດວ່າເພິ່ນຈະມີເຫດຜົນອັນໃດເລີຍ, ພຣະເຈົ້າຊົງຄວບຄຸມສະຖານະການ ເພື່ອປະໂຫຍດຂອງປະຊາກອນຂອງພຣະອົງ. ນີ້ແມ່ນໝາຍສຳຄັນທີ່ພຣະອົງສັນຍາໄວ້ ໃຫ້ພວກຄຣິສຕຽນທີ່ລໍຖ້າໃນເວລານັ້ນ; ເປັນໂອກາດທີ່ເປີດໄວ້ໃຫ້ແກ່ທຸກຄົນທີ່ຍອມເຊື່ອຟັງຄຳເຕືອນຂອງພຣະຜູ້ໂຜດໃຫ້ພົ້ນ. ພຣະເຈົ້າຊົງຄວບຄຸມເຫດການ ເພື່ອຈະບໍ່ມີຄົນຢິວ ຫຼື ຊາວໂຣມຄົນໃດຂັດຂວາງການປົບໜີຂອງພວກຄຣິສຕຽນ. ເມື່ອແມ່ທັບເຊຕຽວຖອຍທະຫານກັບເມືອ ພວກຊາວຢິວກໍອອກຈາກນະຄອນເຢຣູຊາເລັມ ແລະ ໄລ່ຕາມກອງທັບໂຣມ, ໃນຂະນະທີ່ສອງຝ່າຍກຳລັງຕໍ່ສູ້ກັນຢູ່ ພວກຄຣິສຕຽນກໍມີໂອກາດໜີອອກຈາກເມືອງ. ໃນເວລານັ້ນ ພວກສັດຕູທີ່ອາໄສຢູ່ຕາມຊົນນະບົດບໍ່ໄດ້ຢູ່ໃນແຖບນັ້ນ ຈຶ່ງບໍ່ມີຜູ້ໃດສະກັດກັ້ນການໜີ, ສາເຫດກໍຍ້ອນວ່າເວລາທີ່ທະຫານໂຣມມາລ້ອມເມືອງແມ່ນເທດສະການ “ປຸກຕູບຢູ່” ແລະຄົນຢິວທຸກຄົນມາຮວມຕົວກັນ ເພື່ອສະເຫຼີມສະຫຼອງເທດສະການ; ສະນັ້ນ, ພວກຄຣິສຕຽນທົ່ວແຜ່ນດິນຈຶ່ງສາມາດໜີໂດຍບໍ່ມີຜູ້ໃດບຽດບຽນ. ພວກເຂົາຟ້າວໜີໄປບ່ອນທີ່ປອດໄພ ຄືເມືອງເປລາ (Pella) ໃນດິນແດນເປເຣຍ ຢູ່ຟາກເບື້ອງແມ່ນ້ຳຈໍແດນພຸ້ນ. {GC 30.2}
ກອງກຳລັງຊາວຢິວທີ່ໄລ່ຕາມແມ່ທັບເຊຕຽວກັບກອງທັບໂຣມ ໄດ້ໂຈມຕີທ້າຍຂະບວນຢ່າງດຸເດືອດ ຈົນຢ້ານວ່າຈະສາມາດທຳລາຍພວກເຂົາໃຫ້ໝົດ. ກອງທັບໂຣມຈຶ່ງຖອຍທັບຕໍ່ໄປດ້ວຍຄວາມຍາກລຳບາກ, ສ່ວນຊາວຢິວແທບຈະບໍ່ໄດ້ຮັບຄວາມເສຍຫາຍ ຈຶ່ງນຳສິ່ງຂອງທີ່ຢຶດກັບເມືອນະຄອນເຢຣູຊາເລັມ ພ້ອມກັບໂຮ່ຮ້ອງສຽງ ‘ໄຊໂຍ.’ ເຖິງແມ່ນວ່າເຫດການນີ້ຈະເບິ່ງເປັນຄວາມສຳເລັດ ແຕ່ມັນສົ່ງຜົນໃຫ້ເກີດເລື່ອງຮ້າຍຕໍ່ມາ, ເພາະເປັນເຫດໃຫ້ພວກເຂົາຍິ່ງຕໍ່ຕ້ານພວກໂຣມຫຼາຍຂຶ້ນ ຈົນມີຄວາມພິນາດເກີນບັນລະຍາຍຕົກສູ່ນະຄອນນັ້ນຢ່າງໄວວາ. {GC 31.1}
ຕໍ່ມາ ເມື່ອແມ່ທັບຕີໂຕມາປິດລ້ອມນະຄອນເຢຣູຊາເລັມອີກ ກໍເກີດໄພພິບັດຄັ້ງໃຫຍ່. ເວລານັ້ນ ແມ່ນເທດສະການປັດສະຄາ ແລະ ມີຄົນຢິວກວ່າລ້ານຄົນຮວມກັນຢູ່ພາຍໃນກຳແພງເມືອງ. ສະບຽງອາຫານທີ່ເຄີຍກັກຕຸນໄວ້ ຄົງພຽງພໍໃຫ້ຄົນໃນເມືອງກິນຢູ່ຫຼາຍປີ ແຕ່ອາຫານເຫຼົ່ານັ້ນ ໄດ້ຖືກທຳລາຍຍ້ອນຄວາມອິດສາ ແລະ ການແກ້ແຄ້ນຂອງກຸ່ມຕ່າງໆຂອງຊາວຢິວທີ່ຂັດແຍ້ງກັນເອງ ຈຶ່ງເກີດພາວະອົດຢາກຢ່າງຮ້າຍແຮງ. ເຂົ້າສາລີຂາຍເປັນເງິນແທ່ງ 50 ກກ ຕໍ່ເຂົ້າ 7 ລິດ. ຄົນທີ່ຫິວແຮງຈົນເຈັບທ້ອງກໍເອົາສາຍແອວໜັງ, ເກີບໜັງ ຫຼື ວ່າໜັງຫຸ້ມໂລ້ມາກັດແຫ້ນກິນ. ມີຄົນຈຳນວນຫຼວງຫຼາຍລັກອອກໄປໃນກາງຄືນ ເພື່ອເກັບໃບໄມ້ນອກກຳແພງເມືອງ ເຖິງແມ່ນວ່າຫຼາຍຄົນຖືກຈັບ ແລະ ຖືກຂ້າຖິ້ມດ້ວຍການທໍລະມານຢ່າງໂຫດຫ້ຽມກໍຕາມ. ມີຫຼາຍຄັ້ງທີ່ເຈົ້າຂອງກັບເຂົ້າເມືອງຢ່າງປອດໄພ ແຕ່ຖືກຄົນອື່ນປຸ້ນເອົາໃບຜັກໃບຫຍ້າທີ່ຕົນອົດສາສ່ຽງຊີວິດເກັບຫາມາໄດ້. ຄົນມີອຳນາດໄດ້ທໍລະມານຜູ້ທີ່ຢູ່ໃຕ້ອຳນາດຢ່າງຜິດມະນຸດສະທຳ ເພື່ອບັງຄັບໃຫ້ພວກທີ່ຫິວໂຊເຫຼົ່ານັ້ນ ມອບອາຫານໃຫ້ແກ່ພວກເຂົາ ໃນກໍລະນີທີ່ໄດ້ເຊື່ອງຊ່ອນອາຫານໄວ້ເລັກໜ້ອຍ. ຫຼາຍເທື່ອ ຄົນທີ່ທໍລະມານຄົນອື່ນເຊັ່ນນີ້ ກໍກິນອີ່ມໜຳສຳລານ ແຕ່ຢາກກັກຕຸນອາຫານໄວ້ສຳລັບອະນາຄົດເທົ່ານັ້ນ. {GC 31.2}
ຫຼາຍພັນຄົນເສຍຊີວິດຍ້ອນຂາດອາຫານ ແລະ ພະຍາດໂຣກລະບາດ. ຄວາມຮັກແພງເອັນດູທີ່ຄວນມີໃນຄອບຄົວເບິ່ງຄືຫາຍໄປໝົດແລ້ວ; ຜົວລັກອາຫານເມຍ ແລະ ເມຍກໍລັກອາຫານຜົວ; ລູກກໍຍາດເອົາອາຫານຈາກປາກຂອງພໍ່ແມ່ຜູ້ແກ່ຊະລາ. ຜູ້ເຜີຍພຣະທຳເຄີຍຖາມວ່າ, “ຍິງຜູ້ໜຶ່ງລືມໄລລູກທີ່ຕົນຄອດໄດ້ຫຼືບໍ່?” ຄຳຖາມນີ້ກໍໄດ້ຮັບຄຳຕອບພາຍໃນກຳແພງນະຄອນທີ່ຖືກສາບ. “ແມ່ຜູ້ທີ່ຮັກລູກຮັກຜົວ ກໍຕົ້ມລູກຕົນເອງກິນ.” (ເອຊາຢາ 49:15; ເພງຄ່ຳຄວນ 4:10). ຄຳຕັກເຕືອນທີ່ຜູ້ເຜີຍພຣະທຳເຄີຍກ່າວໄວ້ 1,400 ປີ ກ່ອນໜ້ານັ້ນ ກໍສຳເລັດອີກເທື່ອໜຶ່ງວ່າ: “ແມ່ນແຕ່ຍິງຜູ້ດີມີຖານະສູງ ທີ່ລ້ຳລວຍຮັ່ງມີ ແລະ ບໍ່ເຄີຍຍ່າງໄປມາໃສໂດຍຕົນເອງຈັກເທື່ອ ກໍຈະປະພຶດແບບດຽວກັນ. ເມື່ອສັດຕູປິດລ້ອມເມືອງຂອງນາງຢູ່ນັ້ນ ນາງຈະກາຍເປັນຄົນໝົດຫວັງ ເພາະຂາດອາຫານການກິນ ຈົນຕ້ອງລີ້ກິນລູກຂອງຕົນເອງທີ່ຫາກໍເກີດໃໝ່ໆ ຕະຫຼອດທັງສາຍແຮ່ດ້ວຍ ນາງຈະບໍ່ຍອມແບ່ງປັນໃຫ້ຜົວທີ່ຮັກ ແລະ ລູກຄົນອື່ນໆຂອງຕົນກິນນຳ.” (ພຣະບັນຍັດສອງ 28:56, 57). {GC 32.1}
ພວກຜູ້ນຳທະຫານໂຣມພະຍາຍາມຂູ່ໃຫ້ຊາວຢິວຢ້ານກົວ ເພື່ອພວກເຂົາຈະຍອມຈຳນົນ. ຊະເລີຍທີ່ຕໍ່ສູ້ເມື່ອຖືກຈັບກໍຈະຖືກຕີດ້ວຍແສ້, ຖືກທໍລະມານ ແລະ ຖືກຄຶງໄວ້ທີ່ໄມ້ກາງແຂນຢູ່ຕໍ່ໜ້າກຳແພງເມືອງ; ທຸກມື້ກໍມີຄົນຫຼັກຮ້ອຍຖືກປະຫານຊີວິດດ້ວຍການຄຶງເຊັ່ນນີ້. ເຫດການອັນເປັນຕາຢ້ານກົວດັ່ງກ່າວ ກໍສືບຕໍ່ຈົນຮ່ອມພູເຢໂຮຊາຟັດ ແລະ ພູເຂົາຄານວາຣີ ມີໄມ້ກາງແຂນປັກກັນໄວ້ຖີ່ຫຼາຍ ຈົນຍາກທີ່ຈະຍ່າງຜ່ານໄປໄດ້. ຊາວຢິວເຄີຍກ່າວຄຳສາບແຊ່ງອັນໜັກໜ່ວງຕໍ່ໜ້າບັນລັງພິພາກສາຂອງປີລາດວ່າ: “ໃຫ້ໂທດເລື່ອງຄວາມຕາຍຂອງລາວ ຕົກຖືກພວກເຮົາ ແລະ ລູກຫຼານຂອງພວກເຮົາ.” (ມັດທາຍ 27:25). ຄຳສາບນີ້ຕົກຖືກພວກເຂົາຢ່າງຮ້າຍແຮງ. {GC 32.2}
ແມ່ທັບຕີໂຕຄົງຍິນດີໃຫ້ເຫດຮ້າຍເຫຼົ່ານີ້ສິ້ນສຸດລົງ ເພື່ອນະຄອນເຢຣູຊາເລັມຈະບໍ່ຕ້ອງຮັບເອົາຜົນຄຳສາບແຊ່ງຢ່າງເຕັມທີ່. ເພິ່ນຕົກໃຈຢ້ານທີ່ເຫັນຊາກສົບຄົນຕາຍກອງຂຶ້ນສູງຕາມຮ່ອມພູ. ຕີໂຕຢືນຢູ່ເທິງຍອດພູເຂົາໝາກກອກເທດ ແລະ ເບິ່ງໄປຍັງພຣະວິຫານອັນສະຫງ່າງາມເໝືອນຖືກສະກົດຈິດ. ເພິ່ນສັ່ງທະຫານບໍ່ໃຫ້ແຕະຕ້ອງກ້ອນຫີນໃຫຍ່ຂອງພຣະວິຫານນັ້ນແມ່ນແຕ່ກ້ອນດຽວ. ກ່ອນທີ່ຈະບຸກຢຶດເຂດພຣະວິຫານອັນແຂງແກ່ນນັ້ນ ເພິ່ນຮ້ອງຂໍພວກຜູ້ນຳຊາວຢິວດ້ວຍຄວາມຈິງໃຈວ່າ ຢ່າຫົວດື້ຂັດຂືນ ເພາະວ່າບໍ່ຢາກໃຫ້ພຣະວິຫານເປັນມົນທິນຍ້ອນເລືອດຂອງຄົນທີ່ຈະຖືກຂ້າ. ຖ້າພວກເຂົາຍອມອອກມາຕໍ່ສູ້ຢູ່ບ່ອນອື່ນ ກໍຈະບໍ່ມີທະຫານໂຣມເຂົ້າໄປໃນບ່ອນສັກສິດນັ້ນ. ທ່ານໂຢເຊຟັດ (Josephus) ເອງໄດ້ອ້ອນວອນຢ່າງສຸດຝີປາກ ເພື່ອໂນ້ມນ້າວພວກເຂົາໃຫ້ຍອມຈຳນົນ ເຊິ່ງຈະເປັນທາງລອດພົ້ນໃຫ້ນະຄອນຂອງພວກເຂົາ, ສະຖານນະມັດສະການ ແລະ ພວກເຂົາເອງ. ແຕ່ຖ້ອຍຄຳຂອງເພິ່ນຖືກໂຕ້ຕອບດ້ວຍຄຳຫຍາບຄາຍຢ່າງຂົມຂື່ນ. ມີຄົນແກວ່ງລູກສອນໃສ່ຜູ້ໄກ່ເກ່ຍຄົນສຸດທ້າຍນີ້ ໃນຂະນະທີ່ເພິ່ນຢືນຮ້ອງຂໍພວກເຂົາ. ຊາວຢິວເຄີຍປະຕິເສດຄຳຮ້ອງຂໍຂອງພຣະບຸດຂອງພຣະເຈົ້າ ແລ້ວບັດນີ້ການວິງວອນຂອງຄົນອື່ນ ມີແຕ່ຈະເຮັດໃຫ້ພວກເຂົາຍິ່ງຂັດຂືນຫຼາຍຂຶ້ນຈົນເຖິງທີ່ສຸດ. ແມ່ທັບຕີໂຕພະຍາຍາມຮັກສາພຣະວິຫານບໍ່ໃຫ້ຖືກທຳລາຍ ແຕ່ກໍບໍ່ມີປະໂຫຍດຫຍັງ ເພາະວ່າພຣະເຢຊູຄຣິສ ຜູ້ຍິ່ງໃຫຍ່ກວ່າເພິ່ນໄດ້ກ່າວໄວ້ວ່າ ຈະບໍ່ໃຫ້ມີກ້ອນຫີນທັບຊ້ອນກັນເຫຼືອຢູ່ ແມ່ນແຕ່ກ້ອນດຽວ. {GC 32.3}
ທະຫານໂຣມຕົກຕະລຶງ ແລະ ໃຈຮ້າຍຍ້ອນພວກຜູ້ນຳຊາວຢິວດື້ດ້ານຕາບອດ ແລະ ຍ້ອນປະຊາຊົນທີ່ຖືກປິດລ້ອມໃນເມືອງ ໄດ້ເຮັດອາດຊະຍາກຳອັນເປັນຕາໜ້າລັງກຽດ. ສຸດທ້າຍແມ່ທັບຕີໂຕ ຈຶ່ງຕັດສິນໃຈບຸກຢຶດພຣະວິຫານ, ແຕ່ມີຄວາມຕັ້ງໃຈວ່າ ຖ້າເປັນໄປໄດ້ຈະກູ້ພຣະວິຫານໄວ້ບໍ່ໃຫ້ຖືກທຳລາຍ. ເຖິງຢ່າງໃດກໍຕາມ, ທະຫານບໍ່ໄດ້ຟັງຄຳສັ່ງຂອງເພິ່ນ. ພໍຕົກຄ່ຳຄືນ ເມື່ອເພິ່ນກັບໄປພັກຜ່ອນໃນຜ້າເຕັນຂອງຕົນ, ຊາວຢິວກໍອອກມາຈາກພຣະວິຫານ ແລະ ໂຈມຕີທະຫານໂຣມເຊິ່ງຢູ່ຂ້າງນອກ. ໃນລະຫວ່າງການຕໍ່ສູ້ນັ້ນ ມີທະຫານຄົນໜຶ່ງແກວ່ງດົ້ນຟືນທີ່ລຸກໄໝ້ຢູ່ ຜ່ານປະຕູລະບຽງພຣະວິຫານເຂົ້າໄປຂ້າງໃນ. ທັນໃດນັ້ນຝາຫ້ອງທີ່ເຮັດດ້ວຍໄມ້ສົນສີດາກໍລຸກໄໝ້ ແລ້ວລາມໄປເຖິງຫ້ອງອື່ນໆ. ຕີໂຕຕາມດ້ວຍພວກນາຍພົນ ແລະ ທະຫານແລ່ນໄປເບິ່ງ ແລ້ວເພິ່ນຈຶ່ງສັ່ງໃຫ້ທະຫານມອດໄຟ ແຕ່ບໍ່ມີຜູ້ໃດຟັງ. ພວກທະຫານໂກດຮ້າຍຫຼາຍ ຕ່າງຄົນຕ່າງແກວ່ງຟືນທີ່ລຸກໄໝ້ເຂົ້າໄປໃນຫ້ອງຕ່າງໆທີ່ຕິດກັບພຣະວິຫານ ແລ້ວກໍຊັກດາບອອກມາ ຂ້າຟັນຄົນທີ່ລີ້ໄພໃນນັ້ນຈຳນວນຫຼວງຫຼາຍ ຈົນເຮັດໃຫ້ເລືອດໄຫຼລົງຂັ້ນໄດພຣະວິຫານຄືກັບສາຍນ້ຳ. ຄົນຢິວຫຼາຍພັນຄົນເສຍຊີວິດ ແຕ່ໃນຂະນະນັ້ນມີສຽງດັງກວ່າສຽງການຕໍ່ສູ້ດັງກ້ອງຂຶ້ນ ແມ່ນສຽງຂອງຄົນທີ່ຮ້ອງວ່າ: “ອີຄາບົດ! (Ichabod)” ແປວ່າຣັດສະໝີຂອງພຣະເຈົ້າໄດ້ພາກໄປເສຍແລ້ວ. {GC 33.1}
“ຕີໂຕບໍ່ສາມາດຫ້າມຄວາມໂກດຮ້າຍຂອງທະຫານໄດ້. ເພິ່ນເຂົ້າໄປກວດເບິ່ງພາຍໃນພຣະວິຫານກັບເຈົ້າໜ້າທີ່ຂອງເພິ່ນ. ພວກເຂົາອັດສະຈັນໃຈກັບຄວາມງົດງາມຮຸ່ງເຮືອງ. ໃນຂະນະນັ້ນໄຟຍັງລາມບໍ່ຮອດສະຖານສັກສິດ ເພິ່ນຈຶ່ງພະຍາຍາມເປັນເທື່ອສຸດທ້າຍ ເພື່ອປ້ອງກັນບໍ່ໃຫ້ຫ້ອງສັກສິດຖືກທຳລາຍ. ຕີໂຕຈຶ່ງແລ່ນອອກມາ ຮ້ອງຂໍໃຫ້ທະຫານດັບໄຟບໍ່ໃຫ້ລາມໄປອີກ. ນາຍຮ້ອຍຄົນໜຶ່ງ ຊື່ວ່າລີເບຣາລິດ (Liberalis) ໄດ້ຍົກໄມ້ຄ້ອນປະຈຳຕຳແໜ່ງຂຶ້ນ ຫວັງບັງຄັບໃຫ້ທະຫານຍອມຟັງຄຳສັ່ງ ແຕ່ວ່າຄວາມນັບຖືທີ່ທະຫານມີຕໍ່ອົງຈັກກະພັດ ກໍບໍ່ສາມາດຢຸດຢັ້ງພວກເຂົາໄດ້ຍ້ອນສາມສາເຫດຄື ຄວາມຄຽດແຄ້ນເຄືອງໃຈທີ່ມີຕໍ່ຄົນຢິວ, ຄວາມດຸເດືອດໃນລະຫວ່າງການຕໍ່ສູ້ ແລະ ຄວາມບໍ່ຮູ້ຈັກພໍທີ່ຫວັງວ່າຈະໄດ້ປຸ້ນເອົາຊັບສົມບັດໃຫ້ຫຼາຍທີ່ສຸດ. ພວກທະຫານເຫັນທຸກສິ່ງອ້ອມຮອບຕົວເປັນທອງຄຳທີ່ສະທ້ອນແສງໄຟແວວວາວ ແລະ ຄິດວ່າພາຍໃນຫ້ອງສັກສິດຂອງພຣະວິຫານ ຕ້ອງມີຊັບສົມບັດອັນປະເມີນຄ່າບໍ່ໄດ້. ມີທະຫານຄົນໜຶ່ງລັກສອດກະບອງໄຟເຂົ້າໄປຜ່ານບານພັບປະຕູ ໃນທັນໃດນັ້ນທັງອາຄານກໍລຸກເປັນໄຟ. ຍ້ອນຄວັນໜາ ແລະ ໄຟ ພວກເຈົ້າໜ້າທີ່ຈຶ່ງຕ້ອງຖອຍອອກມາ ແລະ ປ່ອຍໃຫ້ຕຶກອາຄານອັນສະຫງ່າງາມນັ້ນ ເປັນໄປຕາມສະພາບການຂອງມັນ.” {GC 33.2}
“ຖ້າພາບທີ່ເຫັນນັ້ນເປັນຕາໜ້າຕົກໃຈສຳລັບທະຫານໂຣມ ແລ້ວມັນເປັນແນວໃດໃນສາຍຕາຄົນຢິວ? ຈອມພູເຂົາທັງຍອດ ອັນເປັນດັ່ງມົງກຸດຂອງນະຄອນນັ້ນ ກໍລຸກໄໝ້ຄ້າຍຄືພູເຂົາໄຟ. ອາຄານຕ່າງໆກໍພັງເພລົງໄປຕາມໆກັນດ້ວຍສຽງດັງສະໜັ່ນ ແລ້ວຊາກອາຄານເຫຼົ່ານັ້ນ ກໍຖືກກືນກິນດ້ວຍໄຟທີ່ໄໝ້ຢ່າງຮຸນແຮງດັ່ງເຫວນະຣົກ. ແຜ່ນໄມ້ສົນສີດາເທິງຫຼັງຄາລຸກໄໝ້ເປັນແຜ່ນໄຟ, ຍອດຫໍຕ່າງໆທີ່ໂອບດ້ວຍທອງຄຳ ຖືກເຜົາຮ້ອນຈົນກາຍເປັນສີແດງ, ສ່ວນຫໍໜ້າປະຕູໃຫຍ່ສົ່ງໄຟ ແລະ ຄວັນຂຶ້ນສູ່ຟ້າຄືກັບເມນເຜົາສົບ. ເນີນພູທີ່ອ້ອມຮອບກໍສະຫວ່າງສະໄຫວ. ມີຄົນຈັບກຸ່ມກັນເບິ່ງພາບສະຫຍອງດ້ວຍຄວາມຕຶງຄຽດ ໃນຂະນະທີ່ການທຳລາຍຂະຫຍາຍວົງກວ້າງອອກໄປ. ມີຄົນແອອັດຢູ່ເທິງກຳແພງເມືອງ ແລະ ບ່ອນສູງຕ່າງໆໃນນະຄອນ; ໜ້າຕາບາງຄົນຊີດຂາວຍ້ອນຄວາມທຸກໃຈ ແລະ ຄວາມກັງວົນ, ສ່ວນຄົນອື່ນກໍໜ້າບຶ້ງໜ້າຂືມ ຍ້ອນຄວາມຄັບແຄ້ນໃຈ. ສຽງທະຫານໂຣມໂຮ່ຮ້ອງດັງຂະນະທີ່ແລ່ນໄປມາ, ກັບສຽງຮ້ອງຄວນຄາງຂອງຊາວຢິວທີ່ດື້ດ້ານເຊິ່ງກຳລັງພິນາດໃນກອງໄຟ ກໍດັງຂຶ້ນປະສົມປະສານກັບສຽງດັງຂອງແປວໄຟ ແລະ ສຽງດັງສະໜັ່ນຂອງໄມ້ຄານເຮືອນທີ່ພັງລົງມາ. ມີສຽງຮ້ອງກີກສະທ້ອນຕາມເນີນພູ ກັບສຽງເນື່ອງນັນຂອງຄົນທີ່ຢູ່ເທິງບ່ອນສູງ, ສ່ວນຕະຫຼອດແນວກຳແພງມີແຕ່ສຽງຮ້ອງໄຫ້ຄວນຄາງ. ຄົນທີ່ກຳລັງຂາດໃຈຍ້ອນຄວາມອົດຢາກ ກໍຮວບຮວມກຳລັງເພື່ອຮ້ອງໂຮ່ເປັນຄັ້ງສຸດທ້າຍ ເພາະຄວາມທຸກ ແລະ ຄວາມພິນາດທີ່ເກີດຂຶ້ນ.” {GC 34.1}
“ການຂ້າຟັນກັນພາຍໃນນະຄອນນັ້ນ ຍັງເປັນຕາຢ້ານກວ່າເຫດການຂ້າງນອກ. ເກີດການນອງເລືອດ, ທັງຊາຍທັງຍິງ, ເດັກນ້ອຍ ແລະ ຄົນຊະລາ, ທັງຄົນທີ່ຕໍ່ສູ້ ແລະ ຄົນທີ່ອ້ອນວອນຂໍຄວາມເມດຕາ ຕ່າງກໍຖືກຟາດຟັນແບບບໍ່ເລືອກໜ້າ. ຈຳນວນຄົນທີ່ຖືກຂ້າຫຼາຍກວ່າທະຫານທີ່ຂ້າພວກເຂົາ ຈົນທະຫານໂຣມຕ້ອງປີນຂ້າມກອງຊາກສົບ ເພື່ອສືບຕໍ່ການທຳລາຍ.”5 {GC 35.1}
ຫຼັງຈາກພຣະວິຫານຖືກທຳລາຍບໍ່ດົນ, ນະຄອນເຢຣູຊາເລັມທັງໝົດ ກໍຕົກຢູ່ໃນກຳມືຂອງທະຫານໂຣມ. ພວກຜູ້ນຳຂອງຊາວຢິວກໍອອກຈາກປ້ອມ ແລະ ຫໍຄອຍອັນແຂງແຮງໜຽວແໜ້ນ, ແມ່ທັບຕີໂຕຈຶ່ງເຂົ້າໄປໄດ້ ເພາະບໍ່ມີຜູ້ໃດຢູ່ໃນນັ້ນ. ເພິ່ນເບິ່ງປ້ອມອັນຍິ່ງໃຫຍ່ເຫຼົ່ານັ້ນດ້ວຍຄວາມອັດສະຈັນໃຈ ແລະ ປະກາດວ່າ ຕ້ອງແມ່ນພຣະເຈົ້າປະທານໃຫ້ແນ່ນອນ ເພາະບໍ່ມີເຄື່ອງພັງກຳແພງໃດເລີຍ ທີ່ສາມາດເຈາະປ້ອມເຫຼົ່ານັ້ນໄດ້. ເມືອງທັງໝົດພ້ອມດ້ວຍພຣະວິຫານຖືກທຳລາຍລົງພຽງໜ້າດິນ ແລະ ດິນນັ້ນກໍ “ຖືກໄຖດັ່ງໄຖນາ.” (ເຢເຣມີຢາ 26:18). ມີຄົນເສຍຊີວິດຫຼາຍກວ່າໜຶ່ງລ້ານຄົນໃນເຫດການປິດລ້ອມເມືອງ ແລະ ການຂ້າຟັນກັນທີ່ຕາມມາ. ສ່ວນຄົນທີ່ລອດຕາຍນັ້ນ ບາງຄົນຖືກຈັບໄປເປັນຊະເລີຍ, ບາງຄົນຖືກຂາຍເປັນທາດ, ບາງຄົນຖືກລາກກັບໄປຍັງນະຄອນໂຣມເພື່ອໃຫ້ນາຍພົນອວດໄຊຊະນະ, ບາງຄົນຖືກໂຍນໄປໃຫ້ສັດປ່າກິນໃນສະໜາມກິລາ ເພື່ອສ້າງຄວາມບັນເທີງ ແລະ ບາງຄົນກໍພະເນຈອນໄປໃນໂລກ ຄືກັບຄົນບໍ່ມີເຮືອນຢູ່. {GC 35.2}
ຄົນຢິວໄດ້ຫາເລື່ອງໃສ່ຕົວເໝືອນດັ່ງຄົນທີຕໍ່ສາຍໂສ້ມັດຕົນເອງ, ການກະທຳຂອງພວກເຂົາເປັນເຫດໃຫ້ຕ້ອງຮັບໂທດ ເໝືອນກັບວ່າ ພວກເຂົາໄດ້ຕື່ມຄວາມບາບໃສ່ຈອກແຫ່ງການລົງໂທດຈົນເຕັມດ້ວຍມືຂອງຕົນເອງ. ຄວາມພິນາດທີ່ເກີດຂຶ້ນກັບຊົນຊາດຢິວ ແລະ ບັນຫາທຸກຢ່າງເຊິ່ງຄົນລອດຕາຍທີ່ກະຈັດກະຈາຍຕ້ອງປະສົບພົບພໍ້ນັ້ນ ລ້ວນແຕ່ເປັນການເກັບກ່ຽວຜົນຈາກເມັດທີ່ພວກເຂົາເອງເປັນຜູ້ຫວ່ານ. ຜູ້ເຜີຍພຣະທຳກ່າວວ່າ: “ໂອ ອິດສະຣາເອນເອີຍ ເຈົ້າໄດ້ທຳລາຍຕົນເອງ” “ເຈົ້າສະດຸດກໍເພາະຄວາມຊົ່ວຊ້າຂອງເຈົ້າ.” (ໂຮເສອາ 13:9 TKJV; 14:1 TKJV). ຫຼາຍຄົນມັກເວົ້າວ່າ ຄວາມທຸກຂອງຄົນຢິວເກີດຈາກການລົງໂທດຂອງພຣະເຈົ້າ ແລະ ຊາຕານຜູ້ທີ່ເປັນຈອມຫຼອກລວງ ກໍຢາກໃຫ້ຄົນເຂົ້າໃຈຜິດຢ່າງນັ້ນ ເພາະເປັນການປິດບັງຜົນງານຂອງມັນເອງ. ແຕ່ຊາວຢິວໄດ້ປະຕິເສດຄວາມຮັກ ແລະ ຄວາມເມດຕາຂອງພຣະເຈົ້າຢ່າງໃຈແຂງກະດ້າງ ເປັນເຫດໃຫ້ພຣະອົງຖອນການປົກປ້ອງຄຸ້ມຄອງອອກໄປຈາກພວກເຂົາ ແລະ ຍອມໃຫ້ຊາຕານປົກຄອງຄົນອິດສະຣາເອນຕາມໃຈຂອງມັນ. ຄວາມໂຫດຫ້ຽມປ່າເຖື່ອນທີ່ເກີດຂຶ້ນໃນຊ່ວງລະຫວ່າງການທຳລາຍນະຄອນເຢຣູຊາເລັມນັ້ນ ເປັນຕົວຢ່າງຂອງຄວາມອາຄາດທີ່ຊາຕານມີຕໍ່ຄົນທີ່ຍອມຕົກຢູ່ພາຍໃຕ້ອຳນາດຂອງມັນ. {GC 35.3}
ເຮົາບໍ່ສາມາດຢັ່ງຮູ້ໄດ້ວ່າ ພຣະຄຣິສຊົງຊ່ວຍເຫຼືອພວກເຮົາຫຼາຍສ່ຳໃດ ທີ່ພວກເຮົາໄດ້ຮັບຄວາມສະຫງົບສຸກ ແລະ ການປົກປ້ອງຄຸ້ມຄອງໃຫ້ປອດໄພ. ຍ້ອນຣິດອຳນາດຂອງພຣະເຈົ້າໄດ້ຢັບຢັ້ງຊາຕານໄວ້ ມັນຈຶ່ງບໍ່ສາມາດຄອບງຳຊີວິດຂອງມະນຸດໄດ້ທັງໝົດ. ຄົນທີ່ບໍ່ເຊື່ອຟັງ ແລະ ພວກເນລະຄຸນທັງຫຼາຍ ສົມຄວນຂອບຄຸນພຣະເຈົ້າ ທີ່ພຣະອົງຊົງຫ້າມອຳນາດຊົ່ວຮ້າຍຂອງຊາຕານ ດ້ວຍຄວາມເມດຕາ ແລະ ຄວາມອົດທົນຂອງພຣະອົງ. ແຕ່ເມື່ອມະນຸດພົ້ນຂີດພຣະເມດຕາແລ້ວ ການຄຸ້ມຄອງກໍຖືກຖອນຄືນ. ພຣະເຈົ້າບໍ່ເໝືອນເຈົ້າໜ້າທີ່ຝ່າຍປົກຄອງຜູ້ເປັນມະນຸດ ທີ່ລົງໂທດຄົນທີ່ເຮັດຜິດຕໍ່ກົດໝາຍຕາມຄຳພິພາກສາ, ແຕ່ພຣະອົງຊົງປ່ອຍຜູ້ທີ່ປະຕິເສດພຣະເມດຕາຂອງພຣະອົງ ໃຫ້ຮັບຜົນຈາກການກະທຳຂອງຕົນເອງ. ທຸກຄັ້ງທີ່ມະນຸດປະຕິເສດຄວາມສະຫວ່າງ, ທຸກຄັ້ງທີ່ດູຖູກບໍ່ເອົາໃຈໃສ່ຕໍ່ຄຳຕັກເຕືອນ, ທຸກຄັ້ງທີ່ໃຫ້ອາລົມເປັນໃຫຍ່ ແລະ ທຸກຄັ້ງທີ່ລະເມີດຕໍ່ກົດບັນຍັດຂອງພຣະເຈົ້າ ແມ່ນການຫວ່ານເມັດພືດແຫ່ງຄວາມຊົ່ວຮ້າຍລົງໃນດິນ ເຊິ່ງຈະຕ້ອງເກັບກ່ຽວພາຍຫຼັງຢ່າງແນ່ນອນ. ເມື່ອຂັດຂືນຕໍ່ພຣະວິນຍານຂອງພຣະເຈົ້າຢ່າງຕໍ່ເນື່ອງ ສຸດທ້າຍພຣະວິນຍານນັ້ນກໍຈະຖືກຖອນໄປຈາກຄົນບາບ ແລ້ວກໍບໍ່ເຫຼືອອຳນາດທີ່ຈະຄວບຄຸມອາລົມຄວາມຕ້ອງການ ແລະ ບໍ່ມີແນວປ້ອງກັນພວກເຂົາຈາກຄວາມກຽດຊັງ ແລະ ການປອງຮ້າຍຂອງຊາຕານ. ການທຳລາຍນະຄອນເຢຣູຊາເລັມເປັນບົດຮຽນທີ່ຕັກເຕືອນຢ່າງໃຫຍ່ຫຼວງ ແລະ ເປັນຕາຢ້ານ ສຳລັບທຸກຄົນທີ່ເຫັນວ່າພຣະຄຸນຂອງພຣະເຈົ້າເປັນເລື່ອງບໍ່ສຳຄັນ ແລະ ທຸກຄົນທີ່ຂັດຂືນຕໍ່ສຽງຮຽກຮ້ອງແຫ່ງພຣະເມດຕາຂອງພຣະເຈົ້າ. ບໍ່ເຄີຍມີຫຼັກຖານທີ່ຊັດເຈນກວ່ານີ້ອີກວ່າ ພຣະເຈົ້າຊົງກຽດຊັງຄວາມບາບ ແລະ ຄົນຜິດຈະຕ້ອງຮັບໂທດຢ່າງແນ່ນອນ. {GC 36.1}
ຄຳທຳນວາຍຂອງພຣະຜູ້ໂຜດໃຫ້ພົ້ນ ເລື່ອງການລົງໂທດນະຄອນເຢຣູຊາເລັມນັ້ນ ຈະສຳເລັດອີກເທື່ອໜຶ່ງ ເຊິ່ງເຫດການທຳລາຍນະຄອນຫຼວງຂອງອິດສະຣາເອນໃນຄາວນັ້ນເປັນພຽງເງົາສະຫຼົວ. ເພາະວ່າໄພພິບັດເຊິ່ງຕົກສູ່ນະຄອນທີ່ພຣະເຈົ້າຊົງເລືອກນັ້ນ ສະທ້ອນໃຫ້ເຫັນເຖິງຄວາມພິນາດຂອງໂລກມະນຸດທີ່ປະຕິເສດພຣະເມດຕາຈາກພຣະເຈົ້າ ແລະ ຢຽບຢ້ຳກົດບັນຍັດຂອງພຣະອົງ. ປະຫວັດສາດອັນມືດດຳແຫ່ງອາດຊະຍາກຳ ແລະ ຄວາມທຸກຂອງມະນຸດສືບຕໍ່ເນື່ອງກັນມາຫຼາຍຮ້ອຍປີ. ຜູ້ໃດຄິດເຖິງເລື່ອງນີ້ຍາມໃດກໍຮູ້ສຶກບໍ່ສະບາຍໃຈ, ຍິ່ງຄິດຫຼາຍກໍຍິ່ງໜັກໃຈ. ການປະຕິເສດອຳນາດຂອງສະຫວັນໄດ້ສ້າງຜົນເສຍຫາຍທີ່ຮ້າຍແຮງ. ແຕ່ພາບອັນມືດດຳກວ່ານັ້ນຍັງໄດ້ເປີດເຜີຍໃຫ້ເຫັນຜ່ານຄຳພະຍາກອນ. ໃນການບັນທຶກປະຫວັດສາດມີເລື່ອງການຕໍ່ສູ້, ຄວາມຂັດແຍ້ງ, ການປະຕິວັດ ແລະ “ການສູ້ຮົບທັງໝົດຂອງນັກຮົບອັນມີສຽງວຸ້ນວາຍ ແລະ ເສື້ອຄຸມອັນເປື້ອນດ້ວຍເລືອດ.” (ເອຊາຢາ 9:5 ດັດແປງຈາກສະບັບ TKJV.) ແຕ່ສິ່ງເຫຼົ່ານີ້ຍັງເປັນເລື່ອງເລັກນ້ອຍ ເມື່ອທຽບກັບເຫດການອັນໜ້າຢ້ານຂອງວັນທີ່ພຣະວິນຍານຂອງພຣະເຈົ້າຈະຖືກຖອນໄປຈາກຄົນຊົ່ວຢ່າງໝົດສິ້ນ. ໃນຄາວນັ້ນຈະບໍ່ມີພຣະວິນຍານຄອຍຢັບຢັ້ງອາລົມຮຸນແຮງ ແລະ ຄວາມໂກດຮ້າຍແບບຊາຕານໄວ້ໄດ້. ໃນເວລານັ້ນ ມະນຸດທັງຫຼາຍຈະໄດ້ເຫັນເຖິງຜົນຂອງການປົກຄອງຂອງຊາຕານຢ່າງທີ່ບໍ່ເຄີຍເຫັນມາກ່ອນ. {GC 36.2}
ແຕ່ໃນວັນນັ້ນຄົນຂອງພຣະເຈົ້າກໍຈະໄດ້ຮັບການຊ່ວຍກູ້ ເຊັ່ນດຽວກັນກັບໃນສະໄໝທີ່ນະຄອນເຢຣູຊາເລັມຖືກທຳລາຍ, ຄືທຸກຄົນທີ່ມີຊື່ບັນທຶກໄວ້ໃນປຶ້ມທະບຽນແຫ່ງຊີວິດ (ອ່ານ ເອຊາຢາ 4:3). ພຣະຄຣິສຊົງກ່າວວ່າ ພຣະອົງຈະສະເດັດກັບມາຄັ້ງທີສອງ ເພື່ອຮວບຮວມຜູ້ສັດຊື່ຂອງພຣະອົງໃຫ້ໄປຢູ່ກັບພຣະອົງ. “ເມື່ອນັ້ນ ໝາຍສຳຄັນແຫ່ງບຸດມະນຸດກໍຈະປາກົດຂຶ້ນໃນທ້ອງຟ້າ ແລະ ມະນຸດທຸກຊາດເທິງແຜ່ນດິນໂລກ ກໍຈະຕີເອິກຮ້ອງໄຫ້ຄ່ຳຄວນ ແລະ ເຫັນບຸດມະນຸດກຳລັງມາເທິງເມກໃນທ້ອງຟ້າ ດ້ວຍຣິດທານຸພາບ ແລະ ສະຫງ່າຣາສີອັນຍິ່ງໃຫຍ່. ພຣະອົງຈະໃຊ້ບັນດາເທວະດາຂອງພຣະອົງອອກໄປດ້ວຍສຽງແກດັງກ້ອງສະໜັ່ນຍັງທິດທັງສີ່ ເພື່ອຮວບຮວມເອົາປະຊາຊົນຂອງພຣະເຈົ້າ ທີ່ພຣະອົງໄດ້ເລືອກໄວ້ ຕັ້ງແຕ່ສຸດຂອບຟ້າເບື້ອງນີ້ ຈົນເຖິງສຸດຂອບຟ້າເບື້ອງນັ້ນ.” (ມັດທາຍ 24:30, 31). ແລ້ວໃນເວລານັ້ນ ທຸກຄົນທີ່ບໍ່ປະຕິບັດຕາມຂ່າວປະເສີດ ກໍຈະຖືກປະຫານດ້ວຍລົມຈາກພຣະໂອດ6ຂອງພຣະອົງ ແລະ ຈະຖືກລ້າງຜານໃຫ້ດັບສູນ ດ້ວຍແສງອັນຮຸ່ງເຮືອງ ໃນເວລາທີ່ພຣະອົງສະເດັດກັບມາ. (ເບິ່ງ 2 ເທສະໂລນິກ 2:8). ເລື່ອງນີ້ຈະເໝືອນຄົນອິດສະຣາເອນໃນສະໄໝບູຮານ ຄືຄົນຊົ່ວທຳລາຍຕົນເອງ ແລະ ຫຼົ້ມຈົມຍ້ອນຄວາມບາບຂອງຕົນ. ພວກເຂົາເຮັດບາບມາຕະຫຼອດ ຈົນຊີວິດຫ່າງເຫີນຈາກພຣະເຈົ້າຫຼາຍ ແລະ ອຸປະນິໄສເຕັມໄປດ້ວຍຄວາມຊົ່ວຊ້າຫຼາຍ ຈົນສະຫງ່າຣາສີຂອງພຣະເຈົ້າ ກັບກາຍເປັນໄຟທີ່ເຜົາຜານສຳລັບຕົນ. {GC 37.1}
ມະນຸດເອີຍ ຈົ່ງລະວັງ! ຢ່າເມີນເສີຍຕໍ່ບົດຮຽນທີ່ພຣະຄຣິສຊົງກ່າວໄວ້. ພຣະອົງໄດ້ຕັກເຕືອນສາວົກຂອງພຣະອົງ ເຖິງການທຳລາຍນະຄອນເຢຣູຊາເລັມ ແລະ ສອນໃຫ້ຮູ້ໝາຍສຳຄັນຕ່າງໆ ເພື່ອພວກເຂົາຈະໄດ້ໜີລອດ. ເຊັ່ນດຽວກັນ ພຣະອົງຊົງເຕືອນມວນມະນຸດ ເຖິງການທຳລາຍໂລກເປັນຄັ້ງສຸດທ້າຍ ແລະ ຊົງສອນໝາຍສຳຄັນ ເພື່ອໃຫ້ຮູ້ວ່າວັນນັ້ນຈວນຈະເຖິງແລ້ວ ເພື່ອວ່າທຸກຄົນຈະສາມາດໜີຄວາມຮ້າຍກາດທີ່ຈະເກີດຂຶ້ນ. ພຣະເຢຊູຊົງກ່າວວ່າ: “ຈະມີໝາຍສຳຄັນໃນດວງອາທິດ, ດວງຈັນ ແລະ ດວງດາວທັງປວງ ແລະ ຈະມີຄວາມທຸກຮ້ອນເທິງແຜ່ນດິນໂລກຕາມປະເທດຕ່າງໆ.” (ລູກາ 21:25; ມັດທາຍ 24:29; ມາຣະໂກ 13:24–26; ພຣະນິມິດ 6:12–17). ໃຫ້ຄົນທັງຫຼາຍທີ່ເຫັນເຫດການເຫຼົ່ານີ້ຈົ່ງຮູ້ວ່າ: “ເວລາມາໃກ້ແລ້ວ ພ້ອມທີ່ຈະເກີດຂຶ້ນ.” (ມັດທາຍ 24:33). ພຣະເຢຊູຈຶ່ງເຕືອນວ່າ: “ດັ່ງນັ້ນ ຈົ່ງເຝົ້າລະວັງ” (ມາຣະໂກ 13:35). ຜູ້ທີ່ເອົາໃຈໃສ່ຕໍ່ຄຳຕັກເຕືອນນີ້ ຈະບໍ່ຖືກປະຖິ້ມໃຫ້ຢູ່ໃນຄວາມມືດ ຈົນມື້ນັ້ນຫຼອນໃສ່ຢ່າງກະທັນຫັນ. ແຕ່ສຳລັບທຸກຄົນທີ່ບໍ່ເຝົ້າລະວັງຢູ່, ວັນທີ່ພຣະເຈົ້າສະເດັດມາກໍຈະເປັນດັ່ງ “ຂະໂມຍມາໃນເວລາກາງຄືນ.” (1 ເທສະໂລນິກ 5:2–5). {GC 37.2}
ຊາວໂລກປັດຈຸບັນບໍ່ພ້ອມຮັບເອົາຄຳຕັກເຕືອນຂອງພຣະເຈົ້າທີ່ຊົງກ່າວໄວ້ສຳລັບຍຸກນີ້ ກໍບໍ່ຕ່າງຫຍັງກັບຄົນຢິວສະໄໝນັ້ນ ທີ່ບໍ່ພ້ອມຮັບເອົາຄຳເຕືອນຂອງພຣະອົງເລື່ອງການທຳລາຍນະຄອນເຢຣູຊາເລັມ. ບໍ່ວ່າຈະເກີດຂຶ້ນເວລາໃດກໍຕາມ, ແຕ່ສຳລັບຄົນອະທຳແລ້ວ ມື້ນັ້ນຈະມາຢ່າງກະທັນຫັນຈົນຕັ້ງຕົວບໍ່ທັນ. ເມື່ອຊີວິດດຳເນີນໄປຢ່າງປົກກະຕິ, ເມື່ອຄົນທັງຫຼາຍກຳລັງສະໜຸກສະໜານ, ຄ້າຂາຍ ແລະ ເຮັດວຽກຫາເງິນ, ເມື່ອຜູ້ນຳສາສະໜາຍົກຍ້ອງການພັດທະນາຂອງມະນຸດ ແລະ ທຸກຄົນຫຼົງໄຫຼໄປກັບຄວາມປອດໄພອັນປອມແປງ, ເມື່ອນັ້ນແຫຼະ ການທຳລາຍຈະເກີດຂຶ້ນຢ່າງກະທັນຫັນ ໃສ່ຄົນປະໝາດ ແລະ ຄົນຊົ່ວ ເໝືອນຂະໂມຍທີ່ແອບລັກເຄື່ອງເວລາທ່ຽງຄືນຈາກເຮືອນທີ່ບໍ່ມີການເຝົ້າຍາມ; “ແລະພວກເຂົາຈະໜີບໍ່ພົ້ນເປັນແນ່.” (1 ເທສະໂລນິກ 5:3). {GC 38.1}